1 ଆଗେ ଇସ୍ୱର୍‌ ସାର୍ଗେ ଆରି ପୁର୍ତିତିଂ ଉପ୍‌ଜାଣ୍‌ କିତାନ୍‌ । 2 ପୁର୍ତି ସିଣ୍‌ଦା ଆରି ୱାରାକା ମାଚାତ୍‌, ଆରେ ଡେଙ୍ଗା ଏଜ଼ୁଙ୍ଗ୍ ଜପି ମାଜ୍‌ଗା ମାଚାତ୍; ଆରେ, ଇସ୍ୱର୍‌ତି ଜିବୁନ୍‌ ଏଜ଼ୁଙ୍ଗ୍ ଜପି ମେଙ୍ଗ୍‌ଜି ମାଚାତ୍‌ । 3 ଇଦାଂପାଚେ ଇସ୍ୱର୍‌ ଇଚାନ୍‌, "ଅଜଡ଼୍‌ ଆଏତ୍‌," ହେବେ ଅଜଡ଼୍‌ ଆତାତ୍‌ । 4 ଆରେ ଇସ୍ୱର୍‌ ଅଜଡ଼୍‌ତିଂ ହୁଡ଼୍‌ତାନ୍‌ ଜେ ହେଦାଂ ହାର୍‌ଦାକା; ହେବେ ଇସ୍ୱର୍‌ ମାଜ୍‌ଗାତାଂ ଅଜଡ଼୍‌ତିଂ ବିନେ କିତାନ୍‌ । 5 ଆରେ, ଇସ୍ୱର୍‌ ଅଜଡ଼୍‌ନି ତର୍‌ ୱେଡ଼ା ଆରି ମାଜ୍‌ଗାନି ତର୍‌ ନାଣା ହିତାନ୍‌ । ହେବେ ମ୍ଡିସି ଆରି ଅଜଡ଼୍‌ ଆଜ଼ି ପର୍‌ତୁମ୍‌ ଦିନ୍‌ ଆତାତ୍‌ ।

6 ଇଦାଂପାଚେ ଇସ୍ୱର୍‌ ଇଚାନ୍‌, ଏଜ଼ୁଙ୍ଗ୍ ବିତ୍ରେ ୱାରାକା ଉବ୍‌ଜାଜ଼ି ଏଜ଼ୁକାଂ ରି ବାଗ୍‌ତାଂ ବିନେ ଆଏତ୍‌ । 7 ଇ ଲାକେ ଇସ୍ୱର୍‌ ୱାରାକା ରଚ୍‌ଚି ୱାରାକା ଜପିନି ଏଜ଼ୁଙ୍ଗ୍‌ତାଂ ୱାରାକା ଏଜ଼ୁତାଂ ତାରେନ୍‌ନି ଏଜ଼ୁକାଂ ବିନେ କିତାନ୍‌; ଲାଗିଂ ହେ ଲାକେ ଆତାତ୍‌ । 8 ଆରେ ଇସ୍ୱର୍‌ ହେ ୱାରାକା ତର୍‌ ଆକାସିଂ ହିତାନ୍‌ । ଆରେ, ମ୍ଡିକା ଆରି ନାଡ଼ିସ୍‌ ଆଜ଼ି ରି ଦିନା ଆତାତ୍‌ ।

9 ଇଦାଂପାଚେ ଇସ୍ୱର୍‌ ଇଚାନ୍‌, "ଆକାସିଂନି ତାରେନ୍‌ନି ସବୁ ଏଜ଼ୁଙ୍ଗ୍‌ ର ବାହାତ ରୁଣ୍ଡା ଆଏକ୍‌ ଆରେ ମେଦ୍‌ନି ଚଞ୍ଜ୍ୟା ଆଏତ୍‌ ।" ହେବେ ହେ ଲାକେ ଆତାତ୍‌ । 10 ଆରେ, ଇସ୍ୱର୍ ମେଦ୍‌ନି ତର୍‌ ପୁର୍‌ତି ଆରି ଏଜ଼ୁଙ୍ଗ୍‌ନି ତର୍‌ ହାମ୍‌ଦୁର୍‌ ହିତାନ୍‌; ଆରେ ଇସ୍ୱର୍‌ ହେଦାଂ ହାର୍‌ଦାକା ହୁଡ଼୍‌ତାନ୍‌ । 11 ଇଦାଂପାଚେ ଇସ୍ୱର୍‌ ଇଚାନ୍‌, "ପୁର୍‌ତି କାଚ୍‌ରା ଆରି ଜାର୍‌ଜିବୁନ୍‌ କୁଚା ଆରି ଜିବୁନ୍‌କୁ ଆଡ୍‌ନିସମାନ୍‌ ଜାର୍‌ ଜାର୍‌ ଇସାବ୍‌ରେ ପାଡ଼୍‌ ଉପ୍‌ଜାଣ୍‌ ପାଡ଼୍‌ ମାର୍‌ ମେଦ୍‌ନି ଜପି ଉପ୍‌ଜାଣ୍‌ କିଏତ୍‌ ।" ହେବେ ହେ ଲାକେ ଆତାତ୍‌ । 12 ଇଚିସ୍‌, ପୁର୍ତି କାଚ୍ରା ଆରି ଜାର୍‌ ଜାର୍‌ ଜାତି ଇସାବ୍ରେ ଜିବୁନ୍‌ ଉପ୍‌କାର୍‌ କୁଚା ଆରି ଜାର୍‌ ଜାର୍‌ ଜାତି ଇସାବ୍ରେ ଜାର୍‌ ଜିନି ପାଡ଼୍‌ ଉପ୍‌ଜାଣ୍‌ ମାର୍‌କୁ ଉପ୍‌ଜାଣ୍‌ କିତାତ୍‌; ଆରେ, ଇସ୍ୱର୍‌ ହେଦାଂ ହାର୍ଦାକା ହୁଡ଼୍‌ତାନ୍‌ । 13 ହେବେ ମ୍ଡିକା ଆରି ନାଡ଼ିସ୍‌ ଆଜ଼ି ତିନି ଦିନ୍‌ ଆତାତ୍‌ ।

14 ଇଦାଂପାଚେ ଇସ୍ୱର୍‌ ଇଚାନ୍‌, "ନାଣାତାଂ ୱେଡ଼ାତିଂ ବିନେ କିନି କାଜିଂ ଆକାସ୍‌ତ ଅଜଡ଼ିଙ୍ଗ୍‌ ଉପ୍‌ଜାଣ୍‌ ଆୟେକ୍‌; ଆରେ, ହେ ସବୁ ଚିନ୍‌, କାଡ଼୍‌ ଆରି ଦିନ୍‌କୁ ଆରି ବାର୍‌ହେକ୍‌ନି କାରଣିଂ ଆୟେକ୍‌ । 15 ଆରେ ପୁର୍ତିତ ଅଜଡ଼୍‌ ହିନି କାଜିଂ ଆକାସିକାଂ ହେ ହୁକାଂ ମାନେକ୍‌," ହେବେ ହେ ଲାକେ ଆତାତ୍‌ । 16 ଇ ଲାକେ ଇସ୍ୱର୍‌ ଦିନ୍‌ତ ରାଜ୍‌ କାମାୟ୍‌ କିଦେଂ ର ଗାଜାଜଡ଼୍‌, ଆରି ମ୍ଡିକାନି ରାଜ୍‌ କାମାୟ୍‌ କିଦେଂ ହେଦାଂତାଂ ହାରୁ ର ଅଜଡ଼୍‌ ଉବ୍‌ଜାତିକ୍‌, ଆରେ ପା ହୁକାଂ ରଚ୍‌ଚାନ୍‌ । 17 ହେବେ ନିତ୍ରେମାପ୍ରୁ ପୁର୍ତିତ ଅଜଡ଼୍‌ ହିନି କାଜିଂ ଆରି ମ୍ଡିକା ଜପି ରାଜ୍‌ କାମାୟ୍‌ କିନି କାଜିଂ, 18 ଆରେ ଅଜଡ଼୍‌ତିଂ ମାଜ୍‌ଗାତାଂ ବିନେ କିନି କାଜିଂ, ଇସ୍ୱର୍‌ ଆକାସିକାଂ ହେ ହୁକାଂ ରଚ୍‌ଚାନ୍‌; ଆରେ ଇସ୍ୱର୍‌ ଇ ୱିଜ଼ୁ ହାର୍ଦାକା ହୁଡ଼୍‌ତାନ୍‌ । 19 ତାପାଚେ ମ୍ଡିକା ଆରି ନାଡ଼ିସ୍‌ ଆଜ଼ି ଚାର୍‌ ଦିନ୍‌ ଆତାତ୍‌ ।

20 ଇଦାଂପାଚେ ଇସ୍ୱର୍‌ ଇଚାନ୍‌, "ଏଜ଼ୁଙ୍ଗ୍‌ ବେସି ଲାକେ ଜଲମ୍‌ନି ପାରାଣିଙ୍ଗ୍‌ ପାରାଣ୍‌ ଆୟେକ୍‌ ଆରି ପୁର୍ତିନି ଜପିନି ଆକାସିକାଂ ପଟିଙ୍ଗ୍‌ ଉମେକ୍‌ ।" 21 ଆରେ ଇସ୍ୱର୍‌ ଗାଜା ତିମିଙ୍ଗ୍‌ ମିନ୍‌ ଆରି ଜାର୍‌ ଜାର୍‌ ଜାତି ଇସାବ୍ରେ ବେସି ଲାକେ ହାମ୍‌ଦୁର୍‌ ରାନ୍ତି ଜାତ୍‌କୁ ଆରି ଜାର୍‌ ଜାର୍‌ ଜାତି ଇସାବ୍ରେ ପଟିକାଂ ଉପ୍‌ଜାଣ୍‌ କିତାନ୍‌ । ଇସ୍ୱର୍‌ ଇ ୱିଜ଼ୁ ହାର୍ଦାକା ହୁଡ଼୍‌ତାନ୍‌ । 22 ଆରେ, ଇସ୍ୱର୍‌ ହେୱାକାଂ ଆର୍ସିବାଦ୍‌ କିଜ଼ି ଇଚାନ୍‌, "ବାଡାତାକାର୍‌ ଆରି ବେସିକୁଟୁମ୍‌ ଆଜ଼ି ହାମ୍‌ଦୁର୍‌ନି ଏଜ଼ୁଙ୍ଗ୍‌ ବାର୍ତି କିୟାଟ୍‌, ଆରେ ପୁର୍ତିତ ପଟିଂ ବେସିବାଡା ଆଏକ୍‌ ।" 23 ହେବେ ମ୍ଡିକା ଆରି ନାଡ଼ିସ୍‌ ଆଜ଼ି ପାଞ୍ଚ୍‌ ଦିନ୍‌ ଆତାତ୍‌ ।

24 ଇଦାଂପାଚେ ଇସ୍ୱର୍‌ ଇଚାନ୍‌, "ପୁର୍ତିତ ଜାର୍‌ ଜାର୍‌ ଜାତି ଇସାବ୍ରେ ପାରାଣିଙ୍ଗ୍‌, ଇଚିସ୍‌, ନାଟି ପସୁଙ୍ଗ୍‌ ଆରି ପଟତାଂନି ଜାତ୍‌ ଆରି ଜାର୍‌ ଜାର୍‌ ଜାତି ଇସାବ୍ରେ ପୁର୍ତିନି ରାନ୍ତି ପସୁଙ୍ଗ୍‌ ଉପ୍‌ଜାଣ୍‌ ଆଏକ୍‌ ।" ହେବେ ହେ ଲାକେ ଆତାତ୍‌ । 25 ଇ ଲାକେ ଇସ୍ୱର୍‌ ଜାର୍‌ ଜାର୍‌ ଜାତି ଇସାବ୍ରେ ରାନ୍ତି ପସୁଙ୍ଗ୍‌ ଆରି ଜାର୍‌ ଜାର୍‌ ଜାତି ଇସାବ୍ରେ ନାଟିପସୁଙ୍ଗ୍‌ ଆରି ଜାର୍‌ ଜାର୍‌ ଜାତି ଇସାବ୍ରେ ସବୁ ବୁଇଁତହାରାସି ପଟତାଂନି ଜାତ୍‌ ରଚ୍‌ଚାନ୍‌; ଆରେ ଇସ୍ୱର୍‌ ହେ ସବୁ ହାର୍ଦାକା ହୁଡ଼୍‌ତାନ୍‌ ।

26 ଇଦାଂପାଚେ ଇସ୍ୱର୍‌ ଇଚାନ୍‌, "ଆନ୍‌ ଜାର୍ତି ମୁର୍ତିତାଂ ଆରି ଜାର୍‌ ଲାକେ ମାନାୟ୍‌ତିଂ ରଚ୍‌ନାଂ । ହେୱାର୍‌ ଏସ୍‌ତହାରାନି ମିନ୍‌କୁ ଆରି ହାରୁଗାଜା ପଟିକାଂ ଆରି ପସୁକାଂ ଆରି ୱିଜ଼ୁ ପୁର୍ତି ଆରି ବୁମିତ ତାଂନି ସବୁ ପଟତାଂନି ଜାତ୍‌ ଜପି ରାଜ୍‌ କିନାର୍‌ ।" 27 ଇଦାଂପାଚେ ଇସ୍ୱର୍‌ ଜାର୍‌ ମୁର୍ତିତାଂ ମାନାୟ୍‌ତିଂ ରଚ୍‌ଚାନ୍‌; ଇସ୍ୱର୍‌ତି ଜାର୍‌ ମୁର୍ତିତାଂ ହେୱାନ୍‌ ତାଂ ରଚ୍‌ଚାନ୍‌; ଆଣ୍ଡ୍ରେନ୍‌ ଆରି କଗ୍‌ଲେ କିଜ଼ି ହେୱାନ୍‌ ହେୱାରିଙ୍ଗ୍‌ ରଚ୍‌ଚାନ୍‌ । 28 ଆରେ ଇସ୍ୱର୍‌ ହେୱାରିଙ୍ଗ୍‌ ଆର୍ସିବାଦ୍‌ କିତାନ୍‌; ଆରେ, ଇସ୍ୱର୍‌ ହେୱାରିଙ୍ଗ୍‌ ଇଚାନ୍‌, "ବାଡାଆଡୁ ଆରି ବେସିକୁଟୁମ୍‌ ଆଡ, ଆରେ, ପୁର୍ତିତିଂ ବାର୍ତି କିଜ଼ି ଆଦିକାର୍‌ କିୟାଟ୍‌, ଆରେ ଏସ୍‌ତହାରାନି ମିନ୍‌କୁକାଂ ଆରି ହାରୁତାଂ ଗାଜା ପଟିଂ ଆରି ବୁଇଁତ ପଟତାଂନି ପସୁକାଂ ଜପି ରାଜ୍‌ କିୟାଟ୍‌ ।" 29 ଇସ୍ୱର୍‌ ଆରେ ଇଚାନ୍‌, "ହୁଡ଼ାଟ୍‌, ଆପ୍‌ ବୁମିନି ସବୁ ଜାର୍‌ଜିନି କୁଚା ଆରି ସବୁ ଜାର୍‌ଜିନି ପାଡ଼୍‌କୁ ମାର୍‌ ମିଙ୍ଗେଙ୍ଗ୍‌ ହିତ୍‌ତାପ୍‌, ହେଦାଂ ମି କାଦି ଆନାତ୍‌ । 30 ଆରେ, ପୁର୍ତିନି ୱିଜ଼ୁ ପସୁ ଆରି ହାରୁତାଂ ପଟିଂ ଆରି ବୁଇଁତ ପଟତାଂନି ଜାତ୍‌, ଇ ୱିଜ଼ୁ ପାରାଣିଙ୍ଗ୍‌ ତିନି କାଜିଂ ଆପ୍‌ ସବୁ ହାର୍ଦି କୁଚା ହିତ୍‌ତାପ୍‌" ହେବେ ହେ ଲାକେ ଆତାତ୍‌ । 31 ଇସ୍ୱର୍‌ ଜାର୍‌ ରଚ୍‌ଚି ସବୁ ଆଡ଼୍‌ମାଡ଼୍‌ କାଜିଂ ହୁଡ଼୍‌ତାନ୍‌, ଆରେ ହୁଡ଼ାଟ୍‌, ୱିଜ଼ୁ ବେସିହାର୍ଦାକା ଆତାତ୍‌ । ହେବେ ମ୍ଡିସି ଆରି ଅଜଡ଼୍‌ ଆସି ଚଅ ଦିନ୍‌ ଆତାତ୍‌ ।