1 ଅବ୍ରାମ୍‌ତି ଡକ୍ରି ସାରିଙ୍ଗ୍‌ ହିମ୍‌ଣାୱାକ୍‌ଡ଼ା ହିଲାତାର୍‌, ଆରେ, ହାଗାର ତର୍‌ନି ହେୱାନ୍ତି ର ମିସର୍‌ନି ଆଡ଼୍‌ୟାଣି ମାଚାତ୍‌ । 2 ତାପାଚେ ସାରି ଅବ୍ରାମ୍‌ତିଂ ଇଚାତ୍‌, "ହୁଡ଼ାଟ୍‌ ନିତ୍ରେମାପ୍ରୁ ନାଙ୍ଗ୍‌ ବାଞ୍ଜ୍‌ଣି କିତ୍‌ତାନ୍ନା; ଲାଗିଂ ଆନ୍‌ ଗୱାରି କିଦ୍‌ନାଙ୍ଗା, ଏନେଙ୍ଗ୍‌ ନା ଇ ଆଡ଼ିୟାଣିଂ ମେହାଆ; କାତେହିନା ଆନ୍‌ ଇଦେଲ୍‌ କାଜିଂ ହିମ୍‌ଣା ପାୟା ଆଦେଂ ଆଡ୍‌ନାଙ୍ଗ୍‌ ।" ୱାଟିଂ ଅବ୍ରାମ୍‌ ସାରିତି କାତାତ ରାଜି ଆତାନ୍‌ । 3 ଅବ୍ରାମ୍‌ କିଣାନ୍‌ ଦେସ୍‌ତ ଦସ୍‌ ବାର୍ହୁ ବାହା କିତି ପାଚେ ହେୱାନ୍ତି ଡକ୍ରି ସାରି ଜାର୍‌ ମିସରିୟା ଆଡ଼ିୟାଣି ହାଗାରତିଂ ଅଜ଼ି ଜାର୍‌ ଡକ୍ରା ଅବ୍ରାମ୍‌ ଲାହାଂ ବିବା ହିତାତ୍‌ । 4 ଇଦାଂପାଚେ ଅବ୍ରାମ୍‌ ହାଗାରତିଂ ହୁଞ୍ଜ୍‌ଞ୍ଚିଲେ, ହେଦେଲ୍‌ ଏସ୍‌ପିସ୍ତାତ୍‌; ଆରେ, ଜାର୍‌ତିଂ ଏସ୍‌ପିସ୍ତାକା ଇଦାଂ ପୁନ୍‌ଞ୍ଜି ହେଦେଲ୍‌ ବାଇହିଂ ପଲ୍ୟାନିକା ଇଞ୍ଜି ଗିଣ୍‌ କିଦେଂ ଲାଗାତାତ୍ ।

5 ତାପାଚେ ସାରି ଅବ୍ରାମ୍‌ତିଂ ଇଚାତ୍‌, ନା କାଜିଂ ଇ ଅନ୍ୟାୟ୍‌ନି ପାଡ଼୍‌ ନିଦାଂ ଆୟେତ୍‌; ଆନ୍‌ ଜାର୍‌ନି ଇମ୍‌ଣି ଆଡ଼ିୟାଣିତି ନି ୱାକ୍‌ତ ହିତ୍‌ତାନ୍‍ନା, "ହେଦେଲ୍‌ ନଂ ଜାର୍‌ତି ଏସ୍‌ପିସ୍ତାକା ପୁନ୍‌ଜି ନାଂ ଗ୍ଡାଇଦାନାତା; ନିତ୍ରେମାପ୍ରୁ ନିଦାଂ ଆରି ନାଦାଂ ବିଚାର୍‌ କିଏନ୍‌ ।"

6 ହେବେ ଅବ୍ରାମ୍‌ ସାରିଙ୍ଗ୍‌ ଇଚାନ୍‌, "ହୁଡ଼ା, ନି ଆଡ଼ିୟାଣି ନି କେଇଦ ମାନାତ୍‌; ନିଂ ଇନାକା ହାର୍‌ ଚନ୍‌ଞ୍ଜାନାତ୍‌, ହେଦାଂ ତା କାଜିଂ କିୟା ।" ହେବେ ସାରି ହାଗାର କାଜିଂ କାଟିକିନି ବେବାର୍‌ କିତିଲେ, ହେଦେଲ୍‌ ତା ଲାଗେତାଂ ହନ୍ତାତ୍‌ ।

7 ଇଦାଂପାଚେ ନିତ୍ରେମାପ୍ରୁତି ଦୁତ୍‌ ବାଟା ବିତ୍ରେ ରଞ୍ଜାଙ୍ଗ୍‌ ଚିମ୍‌ରା ବାହାତ, ଇଚିସ୍‌, ସର୍‌ନି ହାସ୍‌ଦ ଇମ୍‌ଣି ଚିମ୍‌ରା ଜାରାଣ୍‌ ମାନାତ୍‌, ହେ ଲାଗାୟ୍‌ ହେଦେଲିଂ ହୁଡ଼୍‌ଜି ଇଚାନ୍‌ । 8 "ଆଗ ସାରିତି ଆଡ଼ିୟାଣି ହାଗାର, ଏନ୍‌ ଇମେତାଂ ୱାତାୟ୍‌ ? ଆରେ, ଇମେତାକେ ହାନାୟ୍‌ ?"

ହେବେ ହେଦେଲ୍‌ ଇଚାତ୍‌, "ଆନ୍‌ ଜାର୍‌ ବାଇତଡ଼ା ସାରି ତାକେଣ୍ଡାଂ ହନ୍‌ନାଙ୍ଗା ।"

9 ହେଏଚେକାଡ଼୍‌ଦ ନିତ୍ରେମାପ୍ରୁତି ଦୁତ୍‌ ହେଦେଲିଂ ଇଚାତ୍‌, "ଏନ୍‌ ଜାର୍‌ ବାଇତଡ଼ା ଲାଗେ ମାସ୍‌ଦି ହାଲ୍‌ଜି ହୁଦାର୍‌ ବାବ୍ରେ ହେଦେଲ୍‌ତି କେଇଦ ତଲ୍ୟା ଆ ।" 10 ନିତ୍ରେମାପ୍ରୁତି ଦୁତ୍‌ ଆରେ ଇଚାତ୍‌, "ଆପ୍ ମି ଲାତ୍ରାତିଂ ଏଲେଙ୍ଗ୍‌ ବାଡାୟ୍‌ କିନାପ୍‌, ଜେ ବେସି କାଜିଂ ହେଦାଂ ଗାଣାକିୟା ଆଉତ୍‌ ।" 11 ନିତ୍ରେମାପ୍ରୁତି ଦୁତ୍‌ ଆରେରଗ ଇଚାତ୍‌, ହୁଡ଼ା, ଏନ୍‌ ଏସ୍‌ପିସ୍ତାୟ୍‌ନା, ଏନ୍‌ ମାଜ଼ି ଗାଟାନାୟ୍‌, ହେୱାନ୍ତି ତର୍‌ ଇସ୍ମାଏଲ୍‌ ହିନାୟ୍‌, ଇନେକିଦେଂକି ନିତ୍ରେମାପ୍ରୁ ନି ଦୁକ୍‌ ୱେଚାନ୍‌ନା । 12 ଆରେ, ହେୱାନ୍‌ ମାନାୟ୍‌ତି ବିତ୍ରେ ରାନ୍ତି ଗଦ ଲାକେ ଆନାନ୍‌, "ହେୱାନ୍ତି କେଇ ୱିଜ଼ାର୍‌ ବିରୁଦ୍‌ତ ଆରି ୱିଜ଼ାର୍‌ କେଇ ହେୱାନ୍ତି ବିରୁଦ୍‌ତ ମାନ୍‌ଗାନାତ୍‌, ଆରେ, ହେୱାନ୍‌ ଜାର୍‌ ଟଣ୍ଡାର୍‌ ଲାହାଂ ବେରୁତାଂ ବାହା କିନାନ୍‌ ।"

13 ଆରେ ହାଗାର ଜାର୍‌ ଲାହାଂ କାତାବାର୍ତାକିନି ନିତ୍ରେମାପ୍ରୁତି ଇ ତର୍‌ ଇଡ଼୍‌ତାତ୍‌, ଇଚିସ୍‌, ମଦର୍ସକ ଇସ୍ୱର୍‌, ଏ ଇସ୍ୱର୍‌, ଏନ୍‌ ନାଂ ହୁଡ଼୍‌ଦାନାୟା; ଇନେକିଦେଂକି ହେଦେଲ୍‌ ଇଚାତ୍‌, "ଇନେର୍‌ ନାଂ ହୁଡ଼୍‌ଦାନାନ୍‌, ହେୱାନିଂ ହୁଡ଼୍‌ତି ପାଚେ ଆନ୍‌ କି ଇବେ ଆରେରଗ ଜିନାଂ ।" 14 ଲାଗିଂ ହେ କୁଇନି ତର୍‌ ବେର୍‌-ଲହୟ-ରୟି ଇଡ଼୍‌ତାର୍‌ । ହେ କୁଇନି କାଦେସ୍‌ ଆରି ବେରଦ ବିତ୍ରେ ମାନାତ୍‌ ।

15 ଇଦାଂପାଚେ ହାଗାର ଅବ୍ରାମ୍ କାଜିଂ ମାଜ଼ି ଗାଟାତିଲେ, ଅବ୍ରାମ୍‌ ହାଗାରତାଂ ଗାଟାତି ଜାର୍‌ ହେ ମାଜ଼ିତି ତର୍‌ ଇସ୍ମାଏଲ୍‌ ହିତାର୍‌ । 16 ଅବ୍ରାମ୍‌ତି ଅସେ ଚ ବାର୍ହୁ ବୟଁସ୍‌ତ ହାଗାର ଅବ୍ରାମ୍‌ କାଜିଂ ଇସ୍ମାଏଲ୍‌ତିଂ ଗାଟାତାତ୍‌ ।