ଜସେପ୍ ଆରି ପର୍ଟିପର୍ କଗ୍ଲେ
1 ଜସେପ୍ ମିସର୍ ଦେସ୍ତ ତାହିୱାୟାତିଲେ, ପାରତି ରୱାନ୍ କାମାୟ୍କିନାକାନ୍, ଇଚିସ୍, ମିସର୍ନି ପଟିପର୍ ତର୍ନି ରାକ୍ୟାକିନାକାନ୍ ମୁଡ଼୍ମେଲ୍ୟା, ବିନେନିକାନ୍ ଇସ୍ମାଏଲ୍ଲିୟାର୍ତାଂ ଜସେପତିଂ କଡ଼୍ଜି ମାଚାନ୍ । 2 ମତର୍ ନିତ୍ରେମାପ୍ରୁ ଜସେପ୍ତି ଇଞ୍ଜ ମାଚାନ୍, ଲାଗିଂ ହେୱାନ୍ ଦନ୍ନିକାନ୍ ଆତାନ୍; ଆରେ ହେୱାନ୍ ତା ମିସର୍ନି ମୁଣିକା ଇଞ୍ଜ ବାହା କିତାନ୍ । 3 ଇବେ ନିତ୍ରେମାପ୍ରୁ ତା ଜସେପ୍ ଇଞ୍ଜ ମାନାନ୍ ଆରି ହେୱାନ୍ ଇମ୍ଣି ଇମ୍ଣି କାମାୟ୍ କିତିସ୍, ନିତ୍ରେମାପ୍ରୁ ତା କେଇଦ ହେ ୱିଜ଼ୁ ପୁରା କିତାନ୍ନା, ଇଦାଂ ତା ମୁଣିକା ହୁଡ଼୍ତାନ୍ । 4 ଲାଗିଂ ଜସେପ୍ ତା କାଣ୍କୁତ ଉପ୍କାର୍ ପାୟାଜ଼ି ତା ହେବାତ ବାଚିକିୟାତାନ୍, ଆରେ, ହେୱାନ୍ ଜସେପତିଂ ତା ଇଲ୍ମୁଣିକା କିଜ଼ି ତା କେଇଦ ୱିଜ଼ୁ ହେଲାୟ୍ କିତାନ୍ । 5 ଇବାନି ହେୱାନ୍ ଜସେପତିଂ ତା ଇଲ୍ ଆରି ୱିଜ଼ୁନି ମୁଣିକା କିନି ଦିନ୍ତାଂ ନିତ୍ରେମାପ୍ରୁ ଜସେପ୍ ହିନାନ୍ କାଜିଂ ହେ ମିସର୍ନି ଲକ୍ନି ଇଲ୍ ଜପି ଆର୍ସିବାଦ୍ କିତାନ୍: ଆରେ, ଇଲ୍ ଆରି ଜମିନି ୱିଜ଼ୁ ସମ୍ପତି କାଜିଂ ନିତ୍ରେମାପ୍ରୁତି ଆର୍ସିବାଦ୍ ଆର୍ତାତ୍ । 6 ଇଦାଂକାଜିଂ ପର୍ଟିପର୍ ଜସେପତି କେଇଦ ତାଦି ୱିଜ଼ୁ ଇଲାକେ ବଜ୍ ହିତାନ୍, ଜେ ତା ତିନାକା ପିସ୍ତି ଆରେ ଇନାକାପା ବିସ୍ରେ ଜାତୁନ୍ ଅୱାତାନ୍ । ଜସେପ୍ ହୁଡ଼୍ଦେଂ ବେସି ହଲ୍ନାକାନ୍ ମାଚାନ୍ ।
7 ଆରେ ହେ ଗଟ୍ଣା ପାଚେ ତା ମୁଣିକା ଡକ୍ରୁହି ଜସେପ୍ ଜପି କାଣ୍କୁ ତୁହିଦେଂ ଲାଗାତାତ୍; ପାଚେ ତାଂ ଇଚାତ୍, "ଏନ୍ ନା ଲାହାଂ ହୁଞ୍ଜା ।" 8 ମତର୍ ଜସେପ୍ ଏଡ଼ାଜ଼ି ତା ମୁଣିକା ଡକ୍ରୁହିଂ ଇଚାନ୍, ହୁଡ଼ା, ଇ ଇଞ୍ଜ ଇନାକା ମାନାତ୍ ନା "ମାପ୍ରୁ ତା ଜାତୁନ୍ ଅଉନ୍, ହେୱାନ୍ ନା କେଇଦ ତା ସବୁ ହେଲାୟ୍ କିତ୍ତାନ୍ନା । 9 ଇ ଇଞ୍ଜ ନା ତାଂ ଗାଜା ଇନେର୍ ହିଲୁର୍; ଏନ୍ ହେୱାନ୍ତି ଡକ୍ରି, ଇଦାଂକାଜିଂ କେବଲ୍ ନିଂ ପିସ୍ତି ନା କାଜିଂ ଆରେ ଇନାକା ମୁନା ଆକାୟ୍ । ଇବେଣ୍ଡାଂ ଆନ୍ ଇନେସ୍ ଏଚେ ଗାଜା ବାନ୍ୟା କାମାୟ୍ ଆରି ଇସ୍ୱର୍ତି ବିରୁଦ୍ତ ପାପ୍ କିଦେଂ ଆଡ୍ନାଙ୍ଗ୍ ?" 10 ଆତିସ୍ପା ହେ କଗ୍ଲେ ଦିନ୍ତିଂ ଦିନ୍ ଜସେପତିଂ ଏଲେଙ୍ଗ୍ ଇନାତ୍; ମତର୍ ଜସେପ୍ ତା ଲାହାଂ ହୁଞ୍ଜେଙ୍ଗ୍ କି ତା ଲାଗାଂ ମାଞ୍ଜେଙ୍ଗ୍ ରାଜି ଆଉନ୍ ।
11 ଇଦାଂପାଚେ ଦିନେକ୍ ଜସେପ୍ ନିଜ୍ କାମାୟ୍ କାଜିଂ ଇଲ୍ ବିତ୍ରେ ହାଚାନ୍, ଆରେ, ଇଲ୍ନି ଆଡ଼ିଏନ୍ ବିତ୍ରେତାଂ ଇନେର୍ ହେବେ ହିଲ୍ୱାତାର୍ । 12 ଲାଗିଂ ହେଦେଲ୍ ଜସେପତି ହେନ୍ଦ୍ରା ଆସ୍ତି ନା ଲାହାଂ ହୁଞ୍ଜା ଇଞ୍ଜି ଜିକାଟାଣା କିତାତ୍; ମତର୍ ଜସେପ୍ ତା କେଇଦ ଜାର୍ ହେନ୍ଦ୍ରା ପିସ୍ତି ବାର୍ତ ହନ୍ଚି ହାଚାନ୍ । 13 ଏଚେକାଡ଼୍ଦ ହେ କଗ୍ଲେ ଜସେପତିଂ ତା କେଇଦ ଜାର୍ ହେନ୍ଦ୍ରା ପିସ୍ତି ବାର୍ତ ହାନାକା ହୁଡ଼୍ତାତ୍, 14 ହେଏଚେକାଡ଼୍ଦ ହେଦେଲ୍ ତା ଇଲ୍ନି ମାନାୟ୍ତିଂ କୁକ୍ଚି ଇଚାତ୍, "ହୁଡ଼ାଟ୍, ହେୱାନ୍ ନା ଲାହାଂ ଅପ୍ମାନ୍ କିଦ୍ନି କାଜିଂ ରୱାନ୍ ଏବ୍ରିୟତିଂ ତାହିୱାତାର୍ଣ୍ଣା; ହେୱାନ୍ ନା ଲାହାଂ ହୁଞ୍ଜ୍ନି କାଜିଂ ବିତ୍ରେ ନା କଚଣ୍ତ ୱାଜ଼ିମାଚାନ୍; ପାଚେ ଆନ୍ ରାଗାଂ ଆଲାଜ଼ି କୁକ୍ତାଂ; 15 ଆନ୍ ରାଗାଂ ଆଲାଜ଼ି କୁକ୍ନାକା ୱେନ୍ଜି ହେୱାନ୍ ଜାର୍ ହେନ୍ଦ୍ରା ନା ଲାଗାୟ୍ ତୁହିଜି ବାର୍ତ ହନ୍ତାତ୍ ।"
16 ଆରେ, ହେ କଗ୍ଲେ ତା ମୁଣିକା ଇଞ୍ଜୱାନି ପାତେକ୍ ହେ ହେନ୍ଦ୍ରା ଜାର୍ ଲାଗାୟ୍ ଇଡ଼୍ତାତ୍ । 17 ଇଦାଂପାଚେ ହେଦେଲ୍ ତା ଡକ୍ରାହିଂ ହେ କାତା ଇସାବ୍ରେ ଇଚାତ୍, "ଏନ୍ ଇମ୍ଣି ଏବ୍ରିୟ ଆଡ଼ିଏନିଂ ମା ଲାଗେ ତାହିୱାତାୟ୍ନା, ହେୱାନ୍ ନା ବାନ୍ୟାବେବାର୍ କାଜିଂ ନା ଲାଗାୟ୍ ୱାଜ଼ି ମାଚାନ୍, 18 ଆରେ, ଆନ୍ ରାଗାଂ ଆଲାଜ଼ି କୁକ୍ତିଲେ ହେୱାନ୍ ନା ଲାଗାୟ୍ ଇ ହେନ୍ଦ୍ରା ତୁହିଜି ବାର୍ତ ହନ୍ଚି ହାଚାନ୍ ।"
19 ହେଏଚେକାଡ଼୍ଦ ନି ଆଡ଼ିଏନ୍ ନା କାଜିଂ ଇବାନି ବେବାର୍ କିତାନ୍ନା; ତା ଡକ୍ରୁହି ୱେଇଦାଂ ଇ କାତା ୱେନ୍ଜି ଜସେପତିଂ ମୁଣିକା ରିସା ଆତାନ୍ । 20 ଆରେ ଜସେପତି ମୁଣିକା ତାଂ ଅଜ଼ି ରାଜାର୍ବନ୍ଦିର୍ତି ବାହାନି ଜଇଲ୍ତ ଇଡ଼୍ତାନ୍; ପାଚେ ଜସେପ୍ ହେ ଜଇଲ୍ତ ମାଚାନ୍ । 21 ମତର୍ ନିତ୍ରେମାପ୍ରୁ ଜସେପତି ଲାହାଂ ମାଚାନ୍, ଆରେ, ତା କାଜିଂ ଦୟା ହପ୍ଚି ଜଇଲ୍ଇଟ୍ନାକାନ୍ କାଣ୍କୁତ ତାଂ ଉପ୍କାର୍ଲଗୁ ଆତାନ୍ । 22 ହେବେ ହେ ଜଇଲ୍ଇଟ୍ନାକାନ୍ ବନ୍ଦିହାଡ଼ାନି ସବୁ ବନ୍ଦିଲକ୍ତି ବଜ୍ ଜସେପତିଂ କେଇଦ ହେଲାୟ୍ କିତାନ୍; ଆରେ, ହେୱାର୍ ଇନା କିତାର୍, ହେ ସବୁନି ମୁଣିକା ହେୱାନ୍ ଆତାନ୍ । 23 ଜଇଲ୍ଇଟ୍ନାକାନ୍ ଜସେପତି କେଇଦ ହିତି ଇମ୍ଣି ବିସ୍ରେ ହୁଡ଼୍ୱାତାନ୍, ଇନେକିଦେଂକି ନିତ୍ରେମାପ୍ରୁ ତା ସାକ୍ୟା ମାଚାନ୍; ଆରେ, ହେୱାନ୍ ଇନାକା କିତିସ୍, ନିତ୍ରେମାପ୍ରୁ ହେଦାଂ ଜିତା ଆତାନ୍ ।
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)