ମାନାୟ୍ତି ବାନ୍ୟା କାମାୟ୍
1 ଇଲାକେ ଏଚେକାଡ଼୍ଦ ପୁର୍ତିତ ମାନାୟ୍ତି ଲମର୍ ବାଡାଦେଂ ଲାଗାତାତ୍ ଆରି ହେୱାର୍ତି ହେନି ଗାଡ଼୍ଚେକ୍ ଜଲମ୍ ଆତିକ୍; 2 ହେଏଚେକାଡ଼୍ଦ ଇସ୍ୱର୍ତି ମାଜ଼ିର୍ ମାନାୟ୍ ଗାଡ଼୍ଚେକାଂ ହଲ୍ନାକାଦିଂ ହୁଡ଼୍ଜି, ହେୱାର୍ ଇନ୍ଦେଲିଙ୍ଗ୍ ମାନ୍ କିତାର୍, ହେୱାର୍ ୱିଜ଼େକ୍ ବିତ୍ରେତାଂ ବିବା କିଦେଂ ଲାଗାତାର୍ । 3 ହେବେ ନିତ୍ରେମାପ୍ରୁ ଇଚାନ୍, "ମା ୱାସ୍କି ମାନାୟ୍ ଜପି ସବୁୱେଡ଼ାଙ୍ଗ୍ ମାନ୍ଗୁତ୍, ଇନେକିଦେଂକି ହେୱାର୍ତି ବିପତ୍ ହାସ୍ଦ ହେୱାର୍ ଜେଇ ମତର୍; ଇଦାଂକାଜିଂ ହେୱାର୍ତି ବୟଁସ୍ ସହେ କଡ଼େ ବାର୍ହୁ ଆନାତ୍ ।" 4 ହେ ସମୁତ ପୁର୍ତିତ ବେସି ବିରର୍ ମାଚାର୍; ଆରେ, ତାପାଚେ ଇସ୍ୱର୍ତି ମାଜ଼ିର୍ ମାନାୟ୍ତି ଗାଡ଼୍ଚେକାଂ ମେହାତାର୍, ହେୱାର୍ତାଂ ହିମ୍ଣାୱାକ୍ଡ଼ା ଆତାର୍; ହେୱାର୍ ପା ଆଗେନି ବେସି ବିରର୍ ମାଚାର୍ ।
5 ଇଦାଂପାଚେ ନିତ୍ରେମାପ୍ରୁ ହୁଡ଼୍ତାନ୍ ଜେ, ପୁର୍ତିତ ମାନାୟ୍ତି ଚାପ୍କାର୍ ଏଚେକ୍ ଗାଜା, ଆରେ ତାତି ମାନ୍ନି ବାବ୍ନାନି ୱିଜ଼ୁ ହାନ୍ଦାଇ ଏଚେକ୍ ବାନ୍ୟା ମତର୍ । 6 ଇଦାଂପାଚେ ନିତ୍ରେମାପ୍ରୁ ପୁର୍ତିତ ମାନାୟ୍ତିଂ ରଚ୍ଚି କାଜିଂ ଏତୁ କିଜ଼ି ମାନ୍ତ ଦୁକ୍ କିତାନ୍ । 7 ହେବେ ନିତ୍ରେମାପ୍ରୁ ଇଚାନ୍, "ଆପ୍ ବୁମିତାଂ ଜାର୍ ଉବ୍ଜାୟ୍ କିତି ମାନାୟ୍ତିଂ, ଆରେ ମାନାୟ୍ ଲାହାଙ୍ଗ୍ ପସୁ ଆରି ପଟତାଂନି ଜାତ୍ ଆରି ହାରୁ ପଟିକାଂ ବୁଡାୟ୍ କିନାସ୍; ଇନେକିଦେଂକି ଆପ୍ ହେୱାରିଂ ରଚ୍ଚିଲେ ମାଦାଂ ମାନ୍ତ ଏତ୍ ୱାନାତା ।" 8 ମତର୍ ନହ ନିତ୍ରେମାପ୍ରୁତି କାଣ୍ଗାତ ଉପ୍କାର୍ ପାୟାତାନ୍ ।
ନହତି କାତା
9 ନହତି ଲାତ୍ରାର୍ ଏଲେଙ୍ଗ୍ । ନହ ଜାର୍ ଇ ସମୁତ ମାନାୟାର୍ ବିତ୍ରେ ଦାର୍ମି ହୁଦାର୍ ଲଗୁ ମାଚାନ୍; ନହ ଇସ୍ୱର୍ତି ଲାହାଙ୍ଗ୍ ବୁଲାଚାଲା କିତାନ୍ ।
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)