1 यहोवा देवे मोशेहे कोयो, 2 "पेहला मोयनाआ पेहला दिहोहो तु मिलापवालू तोंबु उबू कोइ देजी. 3 आन तियामेहें साक्शीइ पेटीही मिकीत कोइत पोड़दाआ विसमेहें कोइ देजा. 4 आन रोटाआ टेबलोहो मायते लेत जात कोइत जो किबी तियापोअ होबाड़ीलोअ ओय तियाहा होबाड़ी देजा; ताहां दिवाआ खांबाहा मायते लेत जात कोइत तियाआ दिवाहा पेटाड़ी देजा. 5 आन साक्शीपत्राआ पेटीइ सामने होनाआ देवान्याहा, जों आगरबत्तीइ काजे होय तियाहा मिकजा, आन मिलापवाला तोंबाआ बाअणाआ पोड़दाहा लागाड़ी देजा. 6 आन मिलापवाला तोंबाआ बाअणाआ सामने आगीइ देवान्यो मिकजा. 7 आन मिलापवाला तोंबाआ आन देवान्याआ विसमेहें तोपल्यो मिकीत कोइत तियामेहें पाईं पोअजा. 8 आन शारु वोल वाड़ बोणावजा, आन खोलीइ बाअणापोअ पोड़दाहा टांगी देजा."

9 "आन सोको तेल लेत कोइत रोअलाअ जागाहा आन जो किबी तियाम ओय तो आखो सोको कोअजा, आन आखो सामान लेत कोइत तियाहा सोको कोअजा; ताहां तो सोको ठरे. 10 आखा सामानोअरीज आगीइ देवान्याहा अभिशेक कोइत तियाहा गाराहा कोअजा; ताहां तों जाअखो सोको ठोरे. 11 खांबोअरीज तोपल्याहा बी अभिशेक कोइत तियाहा माआ कोअते सोको कोअजा.

12 "ताहां आरोन आन तियाआ पोर्‍याहा मिलापवाला तोंबाआ बाअणापोअ लेत जात कोइत पाअयों वाअहीं उंगलावजा, 13 आन आरोनोहो सोके आंगड़े पोवाड़जा, आन तियाहा होपीत कोइत तियाहा सोको कोअजा के तो माआ काजे पुंजाराआ काम कोए. 14 आन तियाआ पोर्‍याहा जागे लेत आवित कोइत कोट पोवाड़जा, 15 आन जेहें कोइत तु तियांआं बाह्हाहा अभिशेक कोअयुहू, तेहेंज कोइत तियांहां बी अभिशेक कोअजी, के ते माआ काजे पुंजाराआ काम कोए; आन तियांआं अभिशेक तियांआं पिड़ी पिड़ीइ काजे तियांआं हादाफोल्याआ पुंजाराआ निशाणी ठोरे."

16 एहें कोइत मोशे, जो जो आदेश यहोवा तियाहा आप्युतो तियाआ पुरमाणे कोअयो. 17 आन बिहीरा वोरहोअ पेहला मोयनाआ पेल्लेए दिहे मिलापवालू तोंबू उबू कोअयू. 18 मोशे मिलापवालू तोंबू उबू कोआड़्यु, आन तियाआ पाया कोएं तियांआं पाट्ये लागाड़ीत कोइत तियांमेहें तियाआ खांबोहो उबू कोअयू; 19 आन तिये मिलापवालू तोंबू उबू कोअयू आन तियापोअ सेवी देदो; जेहें कोइत यहोवा मोशेहे कोयो तेहें कोइत तिये कोअयो. 20 आन तिये साक्शी पत्र लेत कोइत पेटीमेहें मिक्यो, आन पेटीमेहें डांडाहा लागाड़ीत कोइत तियापोअ दयासनोअ टापणो मिक्यो; 21 आन तिये शप्पतोअ पेटीही तिया तोंबामेहें पोताड़्यी, आन विसमेर्‍याआ पोड़दाहा टांगीत कोइत साक्शीपत्राआ पेटीही तियाआ मायते कोअयो; जेहें कोइत यहोवा मोशेहे कोयो तेहें कोइत कोअयो.

22 आन तिये मिलापवाला तोंबामेहें रोअलाअ तोंबाआ पालामाआ वोल विसमेर्‍याआ पोड़दाआ बाअथे रोटाआ टेबल लागाड़्यु; 23 आन तियापोअ तिये यहोवाआ आगाड़ी रोटू वारुहूं कोइत मिक्यू; जेहें कोइत यहोवा मोशेहे कोयो तेहेंज कोइत कोअयो.✝40:23 निर्ग 25:30; 39:36; लेवी 24:5-9 24 आन तिये मिलापवाला तोंबामेहें रोटाआ टेबलोअ हुंबर रोअलाअ जागाअ देहामोअ वोल दिवाआ खांब मिक्यो, 25 आन तिये दिवाहा यहोवा देवोअ आगाड़ी पेटाड़ी देदो; जेहें कोइत यहोवा मोशेहे आदेश आप्युतो. 26 आन तिये मिलापवाला तोंबाआ विसमेर्‍याआ पोड़दाआ आगाड़ी होनाअ देवान्याहा मेक्यो, 27 आन तिये तियापोअ हाजी गोंदाण्यी आगरबत्ती पेटाड़्यी; जेहें कोइत यहोवा मोशेहे आदेश आप्युतो. 28 आन तिये रोअलाअ बाअणापोअ पोड़दाहा लागाड़्यो. 29 आन मिलापवाला तोंबाआ बाअणापोअ आगीइ देवान्यो मिकीत कोइत तियापोअ आगीइ गाराहा आन ओनोअ भेट कोअयो; जेहें कोइत यहोवा मोशेहे आदेश आप्युतो. 30 आन तिये मिलापवाला तोंबु आन देवान्याआ विसमेहें तोपल्यो मिकीत कोइत तियामेहें तुवीइलाअ काजे पाईं टाक्यो, 31 आन मोशे आन आरोन आन तियाआ पोर्‍या तियां तियांआं आथेन गुडा तुवे; 32 आन जेहेलाम जेहेलाम ते मिलापवाला तोंबामेहें नेत देवान्याआ जागे जातेते ताहां ताहां ते आथेन गुडा तुवताते; जेहें कोइत यहोवा मोशेहे कोयो तेहें कोइत कोअयो. 33 आन तिये रोअलाअ तोंबाआ शारु वोल आन देवान्याआ आहने-पासे खोलीइ पोड़दू उबू कोआड़्यू, आन खोलीइ बाअणाहा पोड़दा लागाड़ी देदा. एहें कोइत मोशे आखो काम पुरो कोअयो.

34 ताहां वाद्लो मिलापवाला तोंबा पोअ सावलू कोअयू, आन यहोवाअ उजालो रोअलाअ तोंबा पोअ पोआइत गोयो. 35 आन वाद्लो मिलापवाला तोंबापोअ रुकाइत गोयो, आन यहोवाअ उजाला रोअलाआ तोंबामेहें पोआइत गोयो, तिहीं वाअहीं मोशे तियामेहें फोहीत ने सेक्यू. 36 इस्राएलोअ आखी वाटेमेहें एहेलोहो ओवतो तो, के जाहां जाहां तो वाद्लो रोअलाआ जागामेहें रोत उपोअ जातो रोतोतो, ताहां ताहां तें आगाड़ी जातेते. 37 आन जर तो तिहींज रोत ने जाय, ताहां जेदिहीं जाआं तो ने जाय तेदिहीं जाआं ते तिहींज रोतेते. 38 इस्राएलोअ माअहोंअ पुरा प्रवासोमेहें दिहे ते रोअलाअ जागापोअ यहोवाआ वाद्लो, आन राती तिया वाद्लामेहें आग तियां माअहोंहों देखाअतीते.