Levítico 21

पुंजारहांआं सोकाय

1 यहोवा देवे मोशेहे कोयो, "आरोनोअ बेटाह्हा जे पुंजारा होये तियांहां कोजी, के तुमाआ माअहूं मेर्‍योअ कोडोज बी मोए, ताहां तियाआ वाखरी तुमामेर्‍योअ कोडोज सोताहा एठो मा कोइत लेहा; 2 तुमाआ आहनेए कोर्‍याआ, मोन्ज्ये तुमाआ आयही, नेताहां आब्हू, नेताहां बेटुह्हू, नेताहां बेटिह्ही, नेताहां पायहोअ कोअते, 3 नेताहां तुमाआ कुवारी बोअह्ही जियीइ वेहवाल ने ओवो ओय, जियांअरी आहनेए नातो ओय; तियांआं काजे तो सोताहा एठो कोइत सेकेहे.✝21:3 यहे 44:25 4 पोन तो पुंजारु होय तिहींवाअहीं तियाआ माअहूंमेहें तो मुख्य होय, तियाहा काजे तो सोताहा एहेलुहू एठु ने कोइत लेअहूं जोवे के तो एठो ओत जाय. 5 ते तियांआं मुन्काआ टाली बी ने कोअहूं जोवे, आन ने तियांआं दाड़ी कोअहूं जोवे, आन ने तियांआं डिलोहो दुखाड़ीत लेअहूं जोवे.✝21:5 लेवी 19:27,28; कायदा 14:1 6 ते तियांआं देवोअ काजे पवित्र बोणीत रोअहूं जोवे, आन तियांआं देवोअ नाव एठो ने कोअहूं जोवे; काहाके ते यहोवा देवोअ गाराहा जे तियांआं देवोअ रोटू होय, सोड़व्या कोअताहा; तिहींइं काजे ते पवित्र बोणीत रोअहूं जोवे. 7 ते धोन्दावाली नेताहां इजोत गोल्यी बोईंइरी वेहवाल ने कोअहूं जोवे, आन ने टाकल्यी बोईंइरी वेहवाल कोअहूं जोवे;काहाके पुंजारु ओ तियाआ देवोअ काजे सोकू होय. 8 तियाहा काजे तु पुंजाराहा पवित्र मानजी, काहाके तो तुमाआ देवोअ काजे रोटू भेट कोअहे; तिहींइं कोअते तो ताआ नजरेम पवित्र ठोरुहूं जोवे; काहाके आंय तुमुहूं सोके कोअनारु यहोवा देव सोकू होंव. 9 आन जर पुंजाराआ बेटिह्ही धोन्दावाली बोणीत कोइत सोताहा एठी ओत जाय, ताहां ते तियीइ आब्हाहा एठु ठोरवेहे; तियीही आगीमेहें लागाड़ी देअहूं जोवे.

10 "जो तियाआ पायहोम रोत मुख्य पुंजारु ओय, जियाआ मुंडीपोअ अभिशेकोअ तेल ओल्योय, आन जियाआ सोके आंगड़े पोवीइलोअ काजे पुंजाराआ पदोपोअ निवड़ाखु ओवयू ओय, तो तियाआ मुन्काआ सिंग्ये सुटले ने रोअहूं देअहूं जोवे, आन तियाआ आंगड़े ने फाड़ुहूं जोवे; 11 आन ने तो एखा तोड़ोअ जागे जाअहूं जोवे, आन ने तियाआ आयही नेताहां आब्हाआ काजे सोताहा एठो कोअहूं जोवे; 12 तो पवित्र जागाम रोत बारथे बी ने निहुंहूं जोवे, आन तियाआ देवोअ पवित्र जागाहा एठु ने कोअहूं जोवे; काहाके तो तियाआ देवोअ अभिशेकोअ तेलोअ टोपू पोवीत होये; आंय यहोवा देव होय. 13 आन तो कुवारी पोर्‍यीइरीज वेहवाल कोअहूं जोवे. 14 जे रोंडोअ, नेताहां टाकल्यी, नेताहां फाल्कुत, नेताहां धोन्दावाली ओय, एहेलिही कोड्लीइरीज वेहवाल ने कोअहूं जोवे, तो तियांआंज माअहुंउं विसमेहें रोत एखी कुवारी पोर्‍यीइरी वेहवाल कोअहूं जोवे. 15 आन तो तियाआ पोर्‍याहा तियांआं माअहूंम एठो ने कोअहूं जोवे; काहाके आंय तियाहा सोको कोअनारु यहोवा देव होय."

16 फाश्योअ यहोवा देवे मोशेहे कोयो, 17 "आरोनोहों को के ताआ आवनारी पिड़ीमेहें जिया कोडाआ किज बी गुनू ओय, ताहां तो तियाआ यहोवा देवोअ काजे रोटू अर्पण कोइलाआ काजे आहने ने आवुहूं जोवे. 18 कोडो बी काहा नाहां रोतो जियामेहें दोस ओय, तों आहने ने आवुहूं जोवे, तों आंदलो ओय, नेताहां लेंगड़ो ओय, नेताहां नाक सापटो ओय, नेताहां तियाआ डिलोअ एखु भाग वादार ओय, 19 नेताहां तियाआ गुडू, नेत आथ पांगलु ओय ताहां, 20 नेताहां तो टुंगाल ओय, नेताहां वांगरु ओय, नेताहां तियाआ डोआमेहें दोश ओय, नेताहां तिया माअहुंहूं खोजलुन विवलू ओय, नेताहां इजड़ो ओय; 21 आरोनोअ पुंजाराआ पारवाड़ीमेहें जिया कोडामेहें कोड्लुज बी दोश ओय, ताहां तो यहोवा देवोहो आगीइ गाराहा कोइलोअ काजे आहने ने आवुहूं जोवे; जों गुनावालो ओय तों कोयोंज बी तियाआ देवोअ रोटू अर्पण कोइलोअ काजे आहने ने आवुहूं जोवे. 22 तों तियाआ देवोअ रोटू जाअखा पवित्र जागामेएं आन जाअखा सोका जागामेएं बेनू जागेए रोटू खात सेकेहे; 23 पोन तियाआ दोशोअ वाखरी तो विसमेर्‍याआ पोड़दाआ मायते ने आवुहूं जोवे आन ने देवान्याआ जागे, जियावाअहीं एहेलोहो ने ओवुहूं जोवे, के तो माआं पवित्र जागाहा एठु कोए; काहाके आंय तियांहां सोकू कोअनारु यहोवा देव होंव." 24 तियाहा काजे मोशे आरोनोहों आन तियाआ बेटाह्हाहा आन आक्खा इस्राएलवालाहां ए गोठी कोत देखाड़्यी.