1 Apetulo na Ayohane pabhakibhanga tangu bhatendanga kwatangachianga bhandu ngani ja Ayesu, akaakung’i na akaakolo bha ajemelei bha Nyuumba ja Annoongo pamo na Masadukayo bhakaikanga. 2 Bhakatumbalanga muno, kwakubhee bhenabho akandundame bhatendanga kwataangachianga bhandu yakubhee Ayesu akayoa, chikubho hecho chilangia ndaa yakubhehe bhabhawilinge bhapakuyokanga. 3 Bahi, bhakaakamulanga Apetulo na Ayohana na kwa kubhehe kilo chite kubhandikila, bhakabhabhekanga pahi ja ujemelehi mpaka malabhi jakwe. 4 Nambo bhandu bhajingi pakati jabhenji bhabhakajoanga malobhe gabhenji Apetulo na Ayohana bhakahobhalelanga, na bhandu bhabhakahobhalelanga bhakabhandikila handa akanalome elupu nhano.

5 Malabhi jakwe, akaakolo bha Bhayahudi, akanahota na bhabhajiganga Malagilo ga Amusa bhakakondekanga pamo konokwe ku Yelusalemu. 6 Bhakakongananga pamo na Aanasi Akung’i akolo, Akayafa, Ayohana, Alekisanda na bhangi bhabhabhilinge bha chilagwa cha Akung’i akolo. 7 Pabhakajemeanga akandundame nnoongi jabhenji, bhakaakonyanga, "Mwangota ntenditinge chikubho heche kwa uwecho niki na ukolo gwa aganiki?"

8 Popopo, Apetulo, kongo abhikulongolelwa na Mboomo ja Annoongo, akaajangulanga, "Akanachilongola na akanahota bha ku Isilaeli! 9 Handa ntukonyitinge leleni ngani ja chenichela chikubho chammbone chatendilwe jonijola mundu jwakibha nagwabha na namuna chibhalamite, 10 bahi, mwangota na bhandu bhoha bha ku Isilaeli hipalikwa kuimanyanga yakubhehe mundu hojo jwaajemite nnongi jinunji leleni, jwamomi, kwa machili ga lihina lyakwe Ayesu bha ku Nazaleti yakubhe mwangota nkaabhamba panchalaba, nambo Annoongo akayoa. 11 Jonjoni Ayesu nga Majandiko ga Annoongo gatendakulobhola.

‘Liganga limulikanitinge mwangota akaachengi,

nangocheni litekubhee liganga likolongwa lya kulupalilwa.’

12 Ayesu jikajabhe nga jwaakombola kwaokoanga bhandu kwa kubhee pachilambo poa lyakwa lihina lyengi tutupekiwe lya kutuokoa twenga."

13 Bhenaangota akanahota ya Chebule bhakibhanga bhatendakuimanyanga kubhee Apetulo na Ayohana bhakibhanga bhandu bhanga chomanga wala kumanya kohakola, bhakakangachanga namuna chibhatendita kulongelanga kwa kutongamanikanga. Bhakaimanyanga kubhee bhakibhanga bhachilondanikinge na Ayesu. 14 Nambo pabhakammonanga mundu jola jwatekulamiwa ajemite pamo nabho, bhangakombolanga kulongelanga chilebhe. 15 Henela, bhakaakulumikianga bhapitange panja ja Chebule, akanahota bhakaigalilanga nkati bhabhikulongelanga pantemela. 16 Bhakakonyananga, "Twaatendele chiniki bhandu habha? Kila mundu jwaatama ku Yelusalemu atendakuimanya kubhee nnolelo hogogo gwa kangachika gutendikwe, natwenga ngakombola kukana chikubho hecheche. 17 Nambo ili tupate kwaakanikia chikubho heche chikotokujenela kupunda pakati ja bhandu, twaanyamukange bhakotokulongelanga na mundu johajola kwa lihina lya Ayesu." 18 Henela bhakaakemanga kabhele akaakolo bha Chebule nkati, bhakaakalipilanga kabhele bhakotokulongelanga palugwinjili, wala kujigana kwa lihina lya Ayesu. 19 Nambo Apetulo na Ayohana bhakajangulanga, "Nhamuange mwangota mwabhene chichibhi chammbone, handa nga yammbone nnoongi ja Annoongo kunnyeketelanga mwangota au Annoongo? 20 Kwa kubhee ngakombola kuleka kulobhola ngani ja hikubho yela ituhibhonite na kuijoanga." 21 Bahi, bhena akanahota bha Chebule bhakaanyamukanga kwa kukalipa muno, ngapena bhakaalekeleanga. Bhangakombolanga kwaalagianga ligongo bhandu bhoha bhakibhanga bhatendakwalumbalila Annoongo ligongo lya chilebhe hecho. 22 Jono mundu jwatekulamiwa akapunda yaaka makomi ncheche.

23 Popopo pabhakalekelelwanga, Apetulo na Ayohana bhakabhujanga kwaachabhenji, bhakaalobholelanga genigala gabhatekulobholelwanga na akaakung’i akolo na akanahota. 24 Nabhena pabhakajoanikianga ngani heyo bhakalondekananga pamo mu kwajoopa Annoongo gubhakalobhwilangaje, "Mwenga Hangwana Annoongo nga jwanhalakie kunani kwa Annoongo na pachilambo, bahali na yoha hihibhile! 25 Himwatendile antumichi bhinu, atati bhitu Adaudi, alongele kwa machili ga Mboomo ja Annoongo kubhee,

‘Kwaniki hilambo hitekubhee na lilaka?

Mboni bhandu bhatenditinge ndela ja hiyoyo?

26 Akaamwenye bha pachilambo bhatekuchibheka maha,

na bhatawala bhakongininge pamo,

kwakana Hangwana na Akilisto bhabhe.’

27 Kweli, nga Ahelode, Apontio Pilato, bhandu bha ku Isilaeli na bhandu bhanga Bhayuhudi bhakakondanikanga papapa pa nnyini, kwakana Ayesu Antumichi bhinu, mundu jwinu jwankaagula. 28 Kweli, bhakakongana ili bhatendange chikubho chela chibhakapalanga na kutendanga kubhokela kandai kwa machili gakwe na upaliho gwinu. 29 Nambo nangocheni, mwa Hangwana, nnole hijogoo yabhenji. Ntukombolehe twenga akaabhanda bhinu kutangacha lilobhe linu pangali bhoga. 30 Nlangie machili ginu ili mwalamie bhandu. nteende yakangachika kwa lihina lya Ayesu Antumichi jwinu Atakatifu."

31 Pabhakajomolanga kujopa, penipala pabhakibhanga bhakongininge pakapukunyika, nabhena bhoha bhakalongolelwa na Mboomo ja Annoongo. Bhoa bhakajemekanga kutangachanga Lilobhe lya Annoongo pangali bhoga.

32 Chibhoga cha bhandu bhoa bhabhaahobhalela Ayesu chakibhanga na ntima gumo na mboomo jimo. Jwaka hata jumo jwakibha na chilebhe choachela jwakachibheka kubhee chilebhe chakwe jika, ila bhakabhagananga yoha hibhakibhanayo. 33 Akandundame bhakalolanga kwa machili gajingi kuyooka kwa Hangwana Ayesu, nabhena Annoongo akaatendelanga gammbone gajingi. 34 Jwaakwa mundu johajola jwakapongokelwa na chilebhe, kwa kubhee bhabhakibhanga na migonda au majumba bhakibhanga bhatendakuuchanga. 35 Bhakaapekeanga akandundame mbiya yela, na bhenaangota bhakagabhananga kwa kila mundu handa chibhatendita kupala.

36 Kukibha na mundu jumo jwakabhoka chilagwa cha Lawi, akabhelekwa ku Kupulo, lihina lyakwe Ayusufu, akibha alondoi jwa Annoongo jwaakemitwa Abanaba maana gakwe, "Mundu jwaalekela mitima bhandu." 37 Jonojwe kabheele akibha na nng’oonda gwabhe, akaguucha, akatola yeniyela mbiya, na kuipeleka kwa akaandundame.