Lucas 8

Amwali jwa Ayailo bhatenda kwaayoa na haikege bhamo bhatendita kulamiwa

40 Wakati Ayesu pabhakabhuja kubhoka kuntundu ja bha Gelachi, na kwaapokela kwa kuhangalala na lilubhalo lya bhandu kwa kubhehe bhatenda kwalendela. 41 Penapo bhakaika amundu bhamo bhakemitwa Ayailo, bhabhakibha akolo bha nyuumba ja konganilanga Bhayahudi, bhakahika bhakachigwia mumakongono ga Ayesu, bhakaajopa bhajaule kwaachabhe, 42 kwa kubhehe mwali jwabhe jwa jika, jwabhile na yaaka komi na hibhele, jwakibha bhatenda kulwala kubhandikila Kujomoka.

Ayesu pabhakibha bhatenda kujaula, lilubhalo lya bhandu likaaminya muno. 43 Bahi, kukibha na mwikege jumo pakati ja lyenilela libhoga lya bhandu, yakubhe bhakibha atamwa jwa kubhoka mihai kwa yaka komi na hibhele, kabhele bhakibha bhajomwile hilebhe yabhe kwa akaaganga ili bhapate kulama, nambo jwakwa jwakakombola kunlamiha. 44 Bhenabho haikege bhakaakagula Ayesu kuyeto, bhakaakwaha palupindo lwa ngobho jabhe. Palapala bhakalama chitamwa chabhe cha kubhokwa na mihai. 45 Ayesu bhakakonya, "Bholi, nga aganiki bhabhatekwaha?"

Bhoha bhakalobhola jwaakwa amundu bhabhankwaite. Na bhenabho Apetulo bhakalobhola, "Hangwana, lilubhalo lya bhandu bhajingi litekuntindila na kuminyana!" 46 Nambo Ayesu bhakalobhola, "Habhile mundu atekungwaha, niimanyi kwa kubhehe machili gatekumoka." 47 Jonijo mwikege pakalola yakubhe bhakombola hopo kuchihia, bhakachipia bhabhi kulendemela, bhakachigwia manguku nnoongi ja Ayesu, penapo bhakakongolela nnongi ja bhandu bhoha kwa niki bhakakwaha na namuna chibhakalamiwa gunakamo. 48 Ayesu bhakaalobholela, "Mwali, kuhobhalela kwinu kutekunnamia. Nnyabhule kwa amani." 49 Ayesu pabhakibha tangu bhaendelea bhalongela, bhakahika amundu kubhoka ku nyuumba ja Ayailo, bhenibhala akolo jwa Nyuumba ja konganila Bhayahudi, kwaalobholela, "Amwali bhinu bhatekujomoka nkotokwaabhua bhabhajigana?" 50 Nambo Ayesu pabhakajoha genago bhakaalobholela Ayailo, "Nkotokujogopa, nhobhalele tu, na bhenabho bhapakulama." 51 Ayesu pabhakaika mu nyuumba ja Ayailo bhakaahibhilila bhandu kujingila bhakoto nkati, ila Apetulo, na Ayakobo, na Ayohana, atati na anyongo mundu mwikege jola. 52 Nambo bhandu bhoha bhatendita kugutanga na kuombolechanga ligongo lya bhenibhala mwali. Nambo Ayesu bhakaalobholelanga, "Nkoto kugutanga, kwa kubhehe mwana jwangawee, atekugoloka tu!" 53 Bhenaangota bhakaaheka kwa kwaabhelua, ligongo bhakaimanya yakubhehe bhenibhala mwali bhatekujomoka. 54 Nambo Ayesu bhakankamula lubhoko bheni bhala amwali na kwaakema, "Mwali, nnyimuke!" 55 Bhenibhala mwali bhakibha bhammomi, na bhakajema. Ngapena Ayesu bhakaakulumikia akaabhelehi bhabhe bhaapekee chakulya. 56 Akaabhelei bhabhe bhakakangachanga muno, nambo Ayesu bhakaakanikiha bhakoto kwalobholela mundu joha jola genago gagatendikwe.