1 Mena keŋ sonoo doo dugbututɛɛ, yaa ɔga doo weenɛɛ kekɛrɛɛtɛɛ nɛ,

mena te obuo tekaboena diyiŋte ya.

2 Mena keŋ akpelee na koro kyaa yaa kamelegyagyaa ne furufu ɔ bɛɛ kyaa ya nɛ,

mena te kefaala yakaate mɔ ba sem ya.

3 Dembila doo fa dɛɛkyɔŋ te dokɔŋ doo fa afurum,

mena te dembila mɔ doo fa diyiŋte maama man.

4 Na tiranɔɔ fa diyiŋte ɔ diyiŋ kedoobii man ya,

na mena ya na nyaŋ ke yɛɛ ŋgba ŋon nɛ.

5 Tiranɔɔ fa diyiŋte ɔ diyiŋ kedoobii man,

na ɔ be kɛɛ ɔ wose nyi ɔ sia te kare ya.

6 Walaŋ ŋon ɔ do diyiŋte tiila nɛ,

na yɛɛ yaa ŋgba ɔ keretii ɔ nawɔɔbia yaa ɔ nyɔɔ teekum baa nɛ.

7 Mena keŋ ɔtakase nawɔɔ wuluŋɛɛ nɛ,

mena te diyiŋte mɔ nɔɔman dudu doo.

8 Nyi n mo obuo fa diyiŋte nɛ,

na yɛɛ yaa ŋgba boe kebake do taya man nɛ.

9 Mena keŋ sɔɔse daŋ doo soloŋ nyɔɔre nyiŋmaa man nɛ,

mena te diyiŋte nɔɔman dudu doo.

10 Mena keŋ baŋdaŋ tɔɔre ne tɔɔ do gooli walaŋ nɛ,

mena te ŋon ɔ ne bɔ diyiŋte yaa ŋon ɔ dɔŋ bo do paa nɛ doo.

11 Mena keŋ babaa na bese di ɔ tɔɔla nɛ,

mena te diyiŋte na bese yɛɛ ɔ diyiŋ nombia.

12 N te naa walaŋ ŋon ɔ ne kɛɛ ɔ wose nyi ɔ sia te kare?

Diyiŋte dana lookegyakaa kela walaŋ ŋonaŋ.

13 Kebɔŋalete ne yako nyiaa, <<Dinaate kyaa gbɛɛnaa man. Dinaate baŋte kyaa debɔɔ man.>>

14 Mena keŋ disim na besena ka wose ka nyeela man nɛ,

mena te kebɔŋalete na besena ɔ wose ɔ dofoŋoŋ dɔɔ.

15 Kebɔŋalete na mo ɔ nyiŋmaa do weenɛɛ nyefale man,

mena keŋ waa lese ke do ɔ nɔɔman dana e kebɔŋale beiŋ.

16 Kebɔŋalete ne kɛɛ ɔ wose nyi ɔ sia te kare beiŋ,

kela balaŋ nyetooro baŋ bɛɛ tiranɔɔ nyansa man.

17 Ŋon ɔ na mo ɔ nɔɔ do kale keŋ te yɛɛ ɔ wui ya man nɛ,

yɛɛ ŋgba ŋon ɔ be kyaŋ babaa ŋon ɔ be kpem deŋele nɛ.

18 Mena keŋ nyee dewɔlɛɛsate ne tɔ baŋdaŋ,

nyeela ŋan na bee koe balaŋ nɛ doo,

19 mena te walaŋ ŋon ɔ na beo ɔ dɔɔ,

na ɔ kpa, <<Mɛɛ do neŋ nsendee bo>> nɛ doo.

20 Nyi boalaŋ daase de taŋ na boalaŋ na yem,

nyi kelaberetaore be kyaa ya na kale be kyaa ya.

21 Mena keŋ nyewalaŋ ne yele boalaŋ ne kyaŋee, te boalaŋ daase ne yele boalaŋ ne kpaa nɛ,

mena ke te kale gyaere na mo yoo kɔŋ.

22 Kelaberetaore nɔɔwoya yɛɛ ŋgba weenɛɛ gyaagyi nɛ,

ŋɛɛ gyoo walaŋ debaa man nideli.

23 Nɔɔwoya gyoŋ nyiŋan ŋan Nyeempɔkum silana ke nɛ,

yɛɛ ŋgba kɔba wolom ayimɛɛ keŋ bɔɔ mo gyilaa osuŋ nɛ,

24 Kɔlare na beo mo ɔ nɔɔwoya desina ɔ wose,

mɔ wa nyeempɔ man na ɔ na gyueŋ kekɔla nombia.

25 Doo nyi ɔ nɔɔwoya dana gyoŋ koraŋ nɛ na lɛɛ e di ya,

nawolo nyi nombiakumɛɛ te wulu ɔ konɔɔ man.

26 Waa tale mo dekara wuu kekɔla dɔɔ,

mɔna wa akpanyanyaŋ nombia gyae ka lee debɔɔ balaŋ man.

27 Ɔkamasɛ ŋon ɔ wula dowokom na waa yala gyoo ke man,

nyi ŋolo de biliŋi boe na, ke gyae ka bese biliŋi mo ɔ dɔɔ.

28 Dekara laakem ne kɔla baŋ kɔ gooli wɔ nɛ,

te kabeo nɔɔwoya na mo kewɔlɛɛ kɔŋ.