1 Kei yɛna keŋ Amose bu Yesaya be naa lee Yuda na Yerusalɛm wose man,

2 Weeya ɔto nyiŋan man nɛ, Degbeŋgyoo ɔsom deni dinaa bula keŋ gyae ka seŋ,

ŋgba bula keŋ ka korɛɛ kela bulase pou nɛ,

baa gate ke adido kela bulasebia,

te tɛɛlese pou baa kaa wuu ke tɛɛ.

3 Balaŋ burum baa kɔŋ kaa yako nyiaa,

<<Ɛ kɔŋ dɛɛ gyeŋ gyu Degbeŋgyoo bula keŋ dɔɔ,

dee gyu Yakɔbe Wurubuarɛ ɔsom deni dinaa keŋ man.

waa wola daa ɔ gbɛɛneŋ,

na dee nyiŋ ta ɔ detɛe man.>>

Mmaraa keŋ gyae ka lee Siyɔn,

Degbeŋgyoo nombia gyae ka lee Yerusalɛm.

4 Waa di tɛɛlese nsana nombia,

na waa desina balaŋ burum nsana,

baa mo be yoosilase luu fara,

na ba apiase ka bese asosɔse,

Tɛɛle daale be gyae ke wɔŋ yoosila tia tɛɛle daale,

yaa baa desina ba wose fa yoo bela ya.

5 Yakɔbe duuluŋmantena, ɛ kɔŋ,

ɛ yela dɛɛ ta Degbeŋgyoo keŋmaŋee keŋ man.

6 Nyaŋ Degbeŋgyoo, n te bɛɛ n balaŋ,

Yakɔbe duuluŋmantena,

nawolo nyi bɛɛ yɛɛ weese dɛɛlee amanberɛse,

bɛɛ gbale ŋgba Filisitena nɛ,

te be lɛɛ bɛɛneŋ amanberɛse do.

7 Kɔba wolom na kɔba yayam te wulu tɛɛle keŋ man,

ba abɔɔ analeeŋ koya boe nideli,

dɛɛkyɔŋse te wulu be tɛɛle,

be yookɔtase mɔ boe nideli.

8 Bɛɛneŋ te wulu be tɛɛle,

bɛɛ som abɔɔ ŋan baŋ gbagba be yɛɛ,

2 ŋan bɔɔ mo be nyiŋbiise yɛɛ.

9 Mena dɔɔ baa kɔna balaŋ pou tɛɛle man,

na baa yɔkɔse ɔkamasɛ.

Naa mo kyɛɛ wɔ ya.

10 Ɛ gyoo kpanaŋse man, ɛ yo tɛɛle man,

ɛ yeu lee Degbeŋgyoo wose man gyakoloŋ,

na ɔ doŋ na ɔ gyoorobiiri keŋ dɔɔ.

11 Baa yɔkɔse agaŋtaŋtena,

deniwalaŋ wose kegate gyae ke kɔŋ tɛɛle man,

Degbeŋgyoo waageŋ te baa gate e adido wee kenaŋ.

12 Degbeŋgyoo Dekpataakpere ŋon ta lese wee daale see,

fa baŋ bɛɛ gate ba wose na agaŋtaŋtena,

na ŋan pou ŋɛɛ gate ŋa wose adido nɛ,

na baa yɔkɔse wɔ,

13 na Lebanɔn sida daase ŋan dana dɔɔloŋ na ŋan ŋa korɛɛ pou,

na Basan kpeli daase pou,

14 Na bulase ŋan pou korɛɛ,

na bulasebia ŋan pou ŋe dana dɔɔloŋ nɛ,

15 na dekagya kamasɛ keŋ ka korɛɛ,

na dekyaŋ kamasɛ keŋ bɔɔ maa kilisi ke.

16 na pantuu dinaana,

na ŋan ŋe dana kyeo nɛ.

17 Waa kɔna walaŋ agaŋtaŋ tɛɛle man,

na waa yɔkɔse walaŋ wose kegate,

Degbeŋgyoo waageŋ te baa gyina adido wee kenaŋ,

18 Te bɛɛneŋ mɔ baa ŋaalaa korakora.

19 Akpaa Degbeŋgyoo da koro nyi waa wosi tɛɛle na,

balaŋ baa yekii kagyoo kpanaŋ bɔɔneŋ,

na tɛɛle bɔɔneŋ man,

lee ɔ wose gyakoloŋ na ɔ doŋ dekpataakpere keŋ ɔ ba lese wola dɔɔ.

20 Wee kenaŋ delii na balaŋ baa fuŋii,

be kɔba wolom bɛɛneŋ na kɔba yayam bɛɛneŋ,

ŋan bɔɔ yɛɛ nyi baa som ŋa nɛ,

fa gbegyagbegyase na kokyoŋoloŋse.

21 Akpaa Degbeŋgyoo da koro waa wosi tɛɛle nɛ,

balaŋ baa yekii kagyoo kpanaŋ bɔɔneŋ,

na akyoloŋkyoloŋse man,

lee ɔ wose gyakoloŋ na ɔ gyoorobiiri doŋ,

keŋ ɔ ba lese wola nɛ dɔɔ.

22 Tina n wose kamo lɔ denibalaŋ,

baŋ bɔɔ dana kolo kpuna weesɛɛ ya nɛ dɔɔ yela.

Woŋ tɔnɔɔ yaa be dana?