1 Nnɛ yaa Degbeŋgyoo ne yako,

<<Adido yɛɛ me gyoorogbeli ke,

te tɛɛle yɛɛ me nae dabetee.

Nde dekpaŋalaŋ keŋ n ke baŋ fa maŋ?

Aleŋ yaa me dɛɛfɛɛfoe gyae ke doo?

2 Na me nyiŋmaase yɛɛna abɔɔ kɛŋa pou,

te ŋe kɔŋawɔ yee?>>

Degbeŋgyoo torola yako.

Kɛwɔ yɛna baŋ maa boele wɔ,

baŋ be dukum ba wee wɔ te bɔɔ yɔkɔse ba wose,

te ba wose ne seree wɔ lee me nombia ŋan dɔɔ nɛ.

3 Mɔ ɔkamasɛ ŋon ɔ mo nunkyue baale deesi nɛ,

wɔɛ ŋgba ŋon ɔ ba ko walaŋ nɛ,

te ɔkamasɛ ŋon ɔ mo nambu deesi nɛ,

wɔɛ ŋgba ŋon ɔ be tekeri babaa wɔŋe nɛ,

ɔkamasɛ ŋon ɔ yɛɛ weenɛɛ kedeesa,

wɔɛ ŋgba ŋon ɔ ba mo kekuirii fatabo kaa deesi nɛ,

te ŋon ɔ too ketɔɔse oliifi nɛ

wɔɛ ŋgba ŋon ɔ na som bane nɛ.

Be ta mo baŋ gbagba be gbɛɛneŋ,

te be sia na gye be duwaare ayɛɛsa man,

4 mena dɔɔ maŋ mɔ maa yɛɛ wɔ nyeeman doŋ,

na maa yela keŋ bee yee nɛ kekɔŋ be dɔɔ.

Nawolo nyi me baake wɔ, mɔna ŋolo te kpaa ya.

ma ke kolosi nɛ, ŋolo te tei ya.

Be yɛɛ dukum me siaman,

te be yɛɛ keŋ mɔɔ ne gyae ya nɛ.>>

5 Ɛmɛɛ baŋ ɛ ne yee Degbeŋgyoo nombia nɛ,

ɛ nyii Degbeŋgyoo nombia.

<< Ɛmɛɛ gbagba ɛ balaŋ baa kɔla ŋon,

na baa bɛɛ ŋon lee ma yele dɔɔ na baa yako nyiaa,

<Ɛ mo gyoorobiiri fa Degbeŋgyoo,

na dɛɛ naa ɛ kenyaŋee!>

Mɔna desɛŋ gyae ke kyaŋ wɔ.

6 Ɛ nyii woya keŋkeŋ ŋan ba lee donɔɔ dinaa keŋ man,

ɛ nyii yeesa ŋan ba lee ɔsom deni dinaa keŋ man.

Ke yɛɛ Degbeŋgyoo woya ŋa,

ɔ ne tɔ ɔ kɔlara kom ŋgba mena keŋ kaboena wɔ nɛ.

7 <<Pɛ waa doŋee na,

ɔ ta lolo.

Pɛ waa nyii weeleŋ keŋ na,

ɔ ta lola bu baale.

8 Amɔte nyiina mena nombia kɛŋa see?

Amɔte naana nombia ŋgba kei nɛ see?

Baa tale lola donɔɔ wee dokoloŋ,

yaa baa tale lola tɛɛle karatetee dokoloŋ?

Mɔna Siyɔn dɔɔ ɔ na doŋee pɛ,

na ɔ ta lola ɔ bia.

9 Maŋ maa yela baa toro dokyoa,

te mɔɔ yele baa lola yee?>> Degbeŋgyoo yakola.

<<Maŋ ŋon mee yele bɛɛ lolo nɛ,

maa tɔ lolo gbɛɛ?>>

N Wurubuarɛ yakola.

10 << Ɛmɛɛ baŋ pou ɛ ne gyae Yerusalɛm nɛ,

ɛ nyaŋeena Yerusalɛm na ɛ sia kagye fa e,

ɛmɛɛ baŋ pou ɛ be wii waraŋsa fa e nɛ,

ɛ nyaŋee nideli kpuna e.

11 Nawolo nyi ɛ ke ŋmase ɔ wɔe kefɛɛ dide,

na ɛ ke baa,

ɛ ke ŋmase ke burum

te ɛ sia gyae kagye lee mena keŋ kɛɛ lee burum nɛ dɔɔ.>>

12 Nawolo nyi nnɛ yaa Degbeŋgyoo ne yako,

<< Maa yela wosefɛɛreŋ ke waale e ŋgba boo nɛ,

te donɔɔse dedii gyae kekɔŋ ɔ gyaŋ ŋgba boŋobii kewuu nɛ,

waa ŋmase na baa tela e nyiŋmaase man

na waa yoi ɔ yoolaase dɔɔ.

13 Mena keŋ naa ne fɛɛ ɔ bu wɔe nɛ,

mena te maa fɛɛ ɛ wɔe,

na maa fɛɛ ɛ wɔe Yerusalɛm.

14 Nyi akpaa ɛ naa mena na ɛ ke nyaŋee ɛ konɔɔse man,

na ɛ ke nyiŋ ɛ wose ŋgba ŋale nɛ,

baa naa Degbeŋgyoo nyiŋmaa ɔ somera dɔɔ,

mɔna waa lese ɔ baŋkum keŋ wola ɔ kɔlara.

15 Kɛɛ Degbeŋgyoo ne kɔŋna boalaŋ

ɔ yookɔtase yɛɛ ŋgba koloŋoloŋ nɛ,

waa lese ɔ baŋ wola nideli,

te ɔ ke kalana kpuuna boalaŋ kekpa.

16 nawolo nyi Degbeŋgyoo waa mo boalaŋ,

na yoosila di balaŋ pou nombia,

te balaŋ burum yɛna baŋ Degbeŋgyoo waa koe.

17 <<Baŋ bɔɔ gberaa ba wose te bɔɔ desina ba wose na baa gyoo wɔɔbii keŋ man, te be silana ŋon ɔ dɔŋ baŋ bɛɛ tao kekuirii naane na kyakaa na abɔɔ ŋan dana ayimɛɛ siaman nɛ, baa wɔlɛɛ wɔ kpuna ŋon be silana nɛ.>> Degbeŋgyoo torola yako.

18 <<Te maŋ dɔɔ, lee keŋ bɔɔ gyueŋ te bɔɔ yɛɛ dɔɔ nɛ, mɛɛ gyae maa kɔŋ na me kaa yilaa tɛɛlese na deise, na baa kɔŋ na be kaa naa me gyoorobiiri.

19 <<Maa yɛɛ kagyene be man, na maa kpila baŋ be kyaa nɛ man baale gyu tɛɛlese gyaŋ. Maa kpila wɔ gyu Taresisitena na Libiatena na Lidiatena na Tubaletena na Gerisetena na baŋ be kyaa boo nɔɔnɔɔ, te be te nyiita me gyakoloŋ nombia yaa naa me gyoorobiiri ya nɛ gyaŋ. Baa gyɔ me gyoorobiiri keŋ dekpeŋkpeŋ tɛɛlese man. 20 Te baa mo ɛ balaŋ pou lee tɛɛlese ŋan pou man kɔŋ, baa kyaa dɛɛkyɔŋse na yookɔtase, na gbeli anebakeŋ na kurumɔɔse na afurumse dɔɔ kɔŋ me bula fereŋkyeŋ keŋ ke kyaa Yerusalɛm nɛ, na ke yɛɛ kedeesa fa Degbeŋgyoo. Degbeŋgyoo yakola. Baa mo wɔ kɔŋ ŋgba mena keŋ Iseraetena na mo weenɛɛ kedeesa kɔŋ kaa do Degbeŋgyoo Ɔsom deni kuruwaase fereŋkyeŋ ŋan man nɛ. 21 Maa lese be man baale yɛɛ saese na Lewitena,>> Degbeŋgyoo yakola.

22 <<Mena keŋ adido wɔle na tɛɛle wɔle keŋ mɔɔ yɛɛ gyae ke kyaa kekpaakekpaa nɛ, mena te n yele na n duuluŋ man balaŋ baa kyaa kekpaakekpaa. Degbeŋgyoo yakola. 23 Lee gyaalaŋ wɔle kelii gyaalaŋ wɔle, lee kefɛɛfowee kelii kefɛɛfowee nɛ, denibalaŋ pou baa kɔŋ na be kaa buŋ maŋ.>> Degbeŋgyoo yakola. 24 <<Baa gyu ke kɛo woya baŋ bɔɔ yɛɛ deŋele doŋ tia maŋ nɛ. Feelɛɛ baŋ bɔɔ gyoo wɔ nɛ be gyae baa yeŋ ya, te boalaŋ keŋ kɔɔ kpa wɔ be gyae ka yeŋ ya, te baa yɛɛ duwaare fa denibalaŋ pou.>>