1 Ɛmɛɛ tɛɛlese, ɛ tuu kɔŋ, na ɛ ke tei,

ɛmɛɛ balaŋ pou, ɛ see deŋele nideli.

Tɛɛle na baŋ pou be kyaa ke dɔɔ, ɛ nyii,

tɛɛle kei na ŋan pou na lee ke man.

2 Degbeŋgyoo ta gyeŋ baŋ do tɛɛlese pou,

ɔ ta gyeŋ baŋ do be yoonɔɔtena pou.

waa wɔlɛɛ wɔ pou,

ɔ te bu wɔ fɔɔ nyi baa ko wɔ.

3 Baa fuŋii be balaŋ baŋ bɔɔ yale yoo man nɛ leki,

be balaŋ ayeŋɛɛ baa lee wɔŋ kutukutu,

be fatabose gyae ke kyɔsee lee bulase dɔɔ.

4 Adido kyolobiise pou gyae ke ŋaalaa,

na adido ke bɔ ŋgba wonembu tɔne nɛ,

abɔɔ ŋan pou kyaa adido gyae ka lee yala,

ŋgba faareŋ awolɛɛ ne kpiisi lee waen woŋse man nɛ,

ŋgba fiigi bia ayɛɛ ne kpiisi lee fiigi daŋ man nɛ,

5 Me yoosila te nyɔɔ fatabo baa adido,

kɛɛ, ke gyae ke tisi kɔŋ Edom,

kaa di me balaŋ baŋ mɔɔ wɔlɛɛ wɔ kerekere nɛ nombia.

6 Fatabo te fɔ Degbeŋgyoo yoosila,

nuŋ te milii ke,

namensebia na asoose fatabo,

namense baala bembia nuŋse.

Nawolo nyi Degbeŋgyoo dana kedeesa Bosera,

ke yɛɛ wonembia kako dinaa ke Edom tɛɛle man.

7 Baŋ na ŋale man namense baa debodokoloŋ lee yala,

kpuna nunkyuebia na nunkyue baala dinaana,

Be tɛɛle gyae ke nyɔɔ fatabo baa,

na nuŋ ke wuu ba aŋasa pou dɔɔ.

8 Nawolo nyi Degbeŋgyoo dana wee keŋ waa wɔŋ deŋele tɔ kom,

na kulutoo keŋ waa di lɛɛ Siyɔn.

9 Edom boŋobiise gyae ka bese aŋɔɔ,

wa aŋasa gyae ka bese kpatakpela,

ɔ tɛɛle gyae ka bese tɛɛle keŋ ne kpaa.

10 Ka be gyae ka yeŋ nelim yaa ka weese ya,

ke nyɔɔse gyae ka koro kekpaakekpaa,

ke gyae ke doo yakaa lee kalola kegyakaare dɔɔ kelii kalola kegyakaare dɔɔ,

ŋolo na ŋolo be lam botɔɔ bela ya.

11 Ke gyae ka bese kekperekperese na samse dekyae,

kpilimse na awuluŋna baa loo ba asaase botɔɔ,

Wurubuarɛ waa wɔŋ ɔ kemaa ŋmeleŋ,

keŋ gyae ka mo kekolosi do be man nɛ,

do Edom dɔɔ na ka ke doo yakaa.

12 Ɔ gyoorobia be dana kpene keŋ baa baake nyi gyooridedii botɔɔ ya,

ɔ gyoobia pou baa ŋaalaa botɔɔ.

13 Sɔɔse gyae ke lɛɛ ɔ gyooro deeyeu e kayo,

koŋkolisɔɔse na kpeeligelase gyae ke lɛɛ ɔ dekagyase

Ke gyae ka bese gbougbouse,

na kpilimse dekyae.

14 Kefula man wonembia na mokɔɔte baa gyaŋee botɔɔ,

na laaman asoose ke wii baake dɔŋa,

nelim wonembia baa doo botɔɔ,

na baa nyiŋ defɛɛfoe.

15 Kpilim waa loo desaa botɔɔ na waa do wɔɔ,

waa kpala na waa kɛɛle wɔ,

ɔ beŋkelɛɛ wuluŋ tɛɛ,

bapɛtɛɛna mɔ baa yilaa botɔɔ,

ɔkamasɛ na ɔ balate.

16 Ɛ kɛo Degbeŋgyoo tɔne keŋ man na ɛ ke kala,

ŋe man dokoloŋ be gyae ka yo ya,

be man ŋolo ɔ balate be gyae waa yo ya.

Nawolo nyi Degbeŋgyoo gyuusuna ɔ nɔɔ yako,

te ɔ feliŋ gyae ke yilaa wɔ debodokoloŋ.

17 Ŋon kpalana be dedii fa wɔ,

ɔ nyiŋmaa te ɔ moowɔ maa fa wɔ.

Baa mo ke bese be wui kekpaakekpaa,

na baa kyaa botɔɔ lee kalola kegyakaare dɔɔ kelii kalola kegyakaare dɔɔ.