1 Nɛnɛɛ ɛ tei, ma somere Yakɔbe,

na Iserae ŋon mɔɔ lese.

2 Nnɛ yaa Degbeŋgyoo,

ŋon ɔ be yɛɛ neŋ, te ɔ be ma neŋ do dokyɔa man,

te waa kyɔ neŋ nɛ ne yako,

Yakɔbe, ma somere,

Yesurun* Ŋon mɔɔ lese, naa yee ya.

3 Nawolo nyi maa kyɛɛkee loŋ woli tɛɛle keŋ loŋboaneŋ na koo nɛ dɔɔ,

na boŋobiise ka lee tɛɛle dowolo dɔɔ,

maa mo me feliŋ do n bia man,

na maa hiraa n duuluŋ man balaŋ.

4 Baa potee ŋgba depaa man ŋalese,

ŋgba boo nɔɔman daase nɛ.

5 Ŋolo waa yako nyi, <Me yɛɛ Degbeŋgyoo wui,>

ŋolo waa mo Yakɔbe yele baake ɔ wose,

ŋolo mɔ waa ŋmarase gyakaa ɔ nyiŋmaa dɔɔ nyi, <Degbeŋgyoo wui.>

na waa mo Iserae yele do ɔ wose.

6 Nnɛ yaa Degbeŋgyoo,

Iserae gyoo na lɛɛre, Degbeŋgyoo Dekpataakpere ŋon ne yako,

Maŋ yɛna gyaŋgbate, te maŋ yɛna ɔtomante,

lee maŋ wɔle na Wurubuarɛ ŋolo be kyaa ya.

7 Amɔta wɔela ŋgba maŋ nɛ? Waa gyɔ ka dekpeŋkpeŋ.

Waa toro ke yako na waa lese ke si maŋ me siaman

keŋ be kɔŋ leenaŋ debaŋ keŋ mɔɔ see me balaŋ gyaŋgba nyibaŋ,

na kpene keŋ gyae kekɔŋ,

Ayi, baa yako kpene keŋ gyae ke kɔŋ wee daale.

8 Ɛ naa seree ya, ɛ naa yee ya.

Me te wulaa gyɔ kei dekpeŋkpeŋ te me yako ke nombia lee beneŋ beneŋ yee?

Ɛmɛɛ yɛna ma adansɛɛtena. Wurubuarɛ ŋolo kyaa kpuna maŋ?

Koa, kpanaŋ ŋolo be kyaa ya. Mɔɔ gyeŋ ŋolo ya.>>

9 Baŋ pou bɛɛ yɛɛ bɛɛneŋ nɛ yɛɛ yakaa,

te abɔɔ ŋan bɛɛ mo obuo fa nɛ be dana tɔnɔɔ ya.

Baŋ baa kolosi fa wɔ nɛ sia te yɛlɛɛ,

bɔɔ gyeŋ kolo ya te desɛŋ gyae ke kyaŋ wɔ.

10 Amɔte ne yɛɛna wurubuarɛ ŋolo te ɔ ne yae bane,

keŋ taŋ tɔnɔɔ ya?

11 Kɛɛ, desɛŋ gyae ke kyaŋ baŋ pou bɛɛ yɛɛ mena nɛ,

baŋ bɛɛ mo adaose yɛɛ ŋa nɛ yɛɛ denibalaŋwɔ.

Be popou baa yilaa na baa lee kaa seŋ na dee di nombia,

gyakoloŋ na desɛŋ gyae ke kyaŋ wɔ.

12 Nyeele luure na mo nyeele,

do boalaŋ na nyewalaŋ man,

ɔ na mo hama gyɔ ke yɛɛ bane,

ɔ na mo ɔ baam doŋte keŋ yɛɛ ka wose man tom.

Tanam na ko e na ɔ te gbalase,

loŋboaneŋ na ko e na ɔ wose te yɔkɔse.

13 Daase yaere na mo ŋmeleŋ maa kolo,

na ɔ ta mo pɛnsele fee ke man,

ɔ na mo kyisele kyalase ke,

na ɔ ta mo kɔmepase do ke bɛɛlase.

Ɔ ne yɛɛ ke deniwalaŋ dinɔɔ man,

deniwalaŋ dinɔɔ na ɔ gyoorobiiri man,

na ka ke doo bane deni man.

14 Ɔ ne kara sida daase,

yaa daase kpaakpaa na kpeli daase.

Ɔ ne yele ŋɛɛ bee laaman daase man,

yaa ɔ ne duu pompo daŋ na ɔga te yele ke ta bee.

15 Bɛɛ mo daase ŋenaŋ do boalaŋ,

ɔ namo ŋaale do boalaŋ woli,

ɔ na mo ŋaale do boalaŋ wɔke bodobodo,

ɔ na mo ŋaale yɛɛ wurubuarɛ som e,

ɔ na mo ŋaale yɛɛ bane buŋ e.

16 Ɔ na mo daŋ keŋ yaale do boalaŋ,

ke dɔɔ te ɔ ne saa ɔ weenɛɛ,

ɔ ne wɔke ɔ naane ke dɔɔ tao baa.

Ɔ ne woli boalaŋ keŋ yako nyiaa,

<<Ao, ma wose te laŋe maŋ. Ma te naa boalaŋ keŋ.>>

17 Ɔ na mo akaŋ keŋ yɛɛ wurubuarɛ, ɔ bane,

ɔ ne buŋ na ɔ ta som ke.

Ɔ ne fane fa ke yako nyiaa,

<<Lɛɛ maŋ, nyaŋ yɛna me wurubuarɛ.>>

18 Bɔɔ gyeŋ kolo ya, bɔɔ ne nyii kolo man ya,

be te wuu be sia dɔɔ na bɔɔ nyiŋ naa ya,

ba te tɔ ba nyeempɔse na bɔɔ nyiŋ nyii nombia man ya.

19 Ŋolo bɛɛ gyueŋ ka wose man ya,

ŋolo be dana nombia man kagyeŋ yaa nombia man kenyii na waa yako nyi,

<<Ma moo ke yaale do boalaŋ,

me wɔke bodobodo ka nyewalaŋ dɔɔ,

me wɔke naane ke dɔɔ tao.

Maa mo akaŋ ŋan yɛɛ anekɔlaŋ?

Maa buŋ daŋ duguŋ?>>

20 Mena walaŋ ŋonaŋ silana tɔŋ, wa nyeempɔ ta beo e mo e yoo gbɛɛ,

ɔ be tale lɛɛ ɔ wose yaa waa yako nyi,

<<Keŋ doo me dunoluŋ nyiŋmaa man nɛ yɛɛ dekara ke yee?>>

21 <<Yakɔbe, tɔɔse nombia kɛŋa,

nawolo nyi nyaŋ, Iserae, n yɛɛ ma somere e.

Maŋ yɛɛna neŋ, n yɛɛ ma somere e,

Iserae, mɔɔ gyae maa wolee neŋ ya.

22 Me ta feefo n nombiakumɛɛ ŋgba debuŋta nɛ.

n dukum ŋgba obosuo nɛ,

Bese kɔŋ me gyaŋ,

nawolo nyi ma te lɛɛ neŋ.>>

23 Adido, ɛ kpee kenyaŋee nɔɔneŋ, nawolo nyi Degbeŋgyoo yɛɛna ke,

ɛmɛɛ tɛɛle ateta, ɛ fae yeesa keŋkeŋ.

Ɛmɛɛ bulase na laaneŋ na daase, ɛ kpee nɔɔneŋ,

nawolo nyi Degbeŋgyoo te lɛɛ Yakɔbe,

ɔ ta lese ɔ gyoorobiiri wola Iserae.

24 Nnɛ yaa Degbeŋgyoo n lɛɛre,

ŋon ɔ be yɛɛ neŋ n naa tɔɔman nɛ ne yako,

<<Maŋ yɛna Degbeŋgyoo,

ŋon ɔ be yɛɛ abɔɔ pou,

maageŋ wɔŋana adido man,

te me fɛlɛɛ tɛɛle man,

25 Ŋon ne yelela baŋ bɛɛ gbale nɛ gyakoloŋ nombia ne yɛɛ yakaa,

te gbalara ne yɛɛ ayiŋtena,

mɛɛ leena siakaralatena nombia wɔle,

na ma te yele ke ta bese diyiŋ nombia.

26 Mee yele ma somera nombia na sem,

na ma te yele me kpilara nombia keyako te kɔŋ mena,

Me yako Yerusalɛm nyi, <Balaŋ baa kyaa n man,>

Yuda donɔɔse nyi, <Baa bese baŋ ŋa,>

na maa bese baŋ akyaŋse ŋan be tekerii nɛ,

27 me yako loŋse ateta nyi, <Dɛɛ yo,

te maa yela n boŋobiise pou ka yo.>

28 Me yako Korese nyi, <Ŋon yɛna me namensekɛɛlere,

te waa yela ŋan mɛɛ gyae nɛ pou kekɔŋ mena,

me yako Yerusalɛm nyi, <<Baa bese baŋ ke,>>

te me yakowɔ lee ɔsom deni dinaa keŋ wose man nyi, <<Baa see ka mokɔɔ.>>>