1 Siyɔn dɔɔ mɔɔ gyae maa wuu me nɔɔ ya,

Yerusalɛm dɔɔ mɔɔ gyae maa yɛɛ yididi ya,

kelii debaŋ keŋ ɔ katenee gyae ke ŋalakee ŋgba nebo weese nɛ,

ɔ nyeekelɛɛ ŋgba kefulu keŋ bɔɔ kyaŋee nɛ.

2 Tɛɛlese baa naa n katenee,

Gyooneŋ pou baa naa n gyoorobiiri.

Baa baake neŋ yele wɔle

keŋ Degbeŋgyoo ba mo ɔ nɔɔ do neŋ.

3 N ke yɛɛ obuo kotɔtɔɔ Degbeŋgyoo nyiŋmaa man,

na gyooro kotɔtɔɔ n Wurubuarɛ nyiŋmaa man.

4 Bɔɔ gyae ba tekaa baake neŋ nyi ŋon bɔɔ bɛɛ e,

yaa baa do n tɛɛle yele nyi kebɛɛ ya.

Mɔna baa baake neŋ nyi, Hefesiba*

na baa baake n tɛɛle nyi, Biyula*,

nawolo nyi n nombia gyae ka gyoo Degbeŋgyoo sia,

na baa yala n tɛɛle.

5 Mena keŋ tobaale ne yala alebu nɛ,

mena te n bia baa yala neŋ,

mena keŋ alowɔle baale ne nyaŋee alowɔle dɔɔ nɛ,

mena te n Wurubuarɛ waa nyaŋee n dɔɔ.

6 O Yerusalɛm, me ta see gyeera nya akyaŋse dɔɔ,

bɔɔ gyae baa wuu be nɔɔ nelim yaa weese teŋteŋ ya.

Ɛmɛɛ baŋ ɛ ne baake Degbeŋgyoo nɛ,

ɛ naa fɛɛfo ya,

7 te ɛ na yele waa fɛɛfo ya kelii debaŋ keŋ waa desina Yerusalɛm baŋ

na waa yɛɛ ke donɔɔ keŋ baa lese ka yele tɛɛle dɔɔ.

8 Degbeŋgyoo te kaŋ ɔ nyiŋmaa dunoluŋ ntam,

na ɔ baam dekpataakpere keŋ nyiaa,

<<Mɔɔ gyae maa tekaa mo ɛ wamela

fa ɛ kɔlara kedi bela ya,

te ŋɔɔla be gyae baa tekaa nyɔɔ waen wɔle,

keŋ ɛ be kaa ke dɔɔ nɛ ya.

9 mɔna baŋ bɔɔ kɛrɛɛ ke nɛ, ne gyaela baa di ke,

na baa lese Degbeŋgyoo yele,

te baŋ bɔɔ yilaa gerepose ŋan ne gyaela baa nyɔɔ ka soloŋ

ma dekpaŋalaŋ fereŋkyeŋ keŋ man.

10 Ɛ mo keman, ɛ mo anaanɔɔse ŋan man!

Ɛ desina gbɛɛ keŋ fa balaŋ baŋ.

Ɛ lese gbɛɛ, ɛ lese gbɛɛ dinaa keŋ,

Ɛ lese boya ŋan.

Ɛ gyina felage keŋ fa tɛɛlese ŋan.

11 Degbeŋgyoo te yele be te nyii

kelii tɛɛle ɔto nyiaa,

<<Ɛ yako Siyɔn alebu ŋon nyi,

<Kɛɛ, n nyeelɛɛre ne kɔŋ!

Kɛɛ, ɔ kom ketɔ kpuɛna e,

te ɔ mpataa mɔ dɔŋ ɔ siaman.>>>

12 Baa baake wɔ nyi balaŋ fereŋkyeŋ,

balaŋ baŋ Degbeŋgyoo be lɛɛ,

na baa baake neŋ nyi walaŋ ŋon bɛɛ kɛo e,

Bɔɔ tekaa bɛɛ donɔɔ dinaa keŋ ya.