1 Kɛɛ, Degbeŋgyoo waa wɔlɛɛ tɛɛle keŋ,

waa yela ka ke doo yakaa,

waa wɔlɛɛ ke sia,

na waa yaasee baŋ be kyaa ke dɔɔ nɛ,

2 gyae ke yɛɛ mena,

fa sae na balaŋ

tobaale ŋgba ɔ gbeŋgyoo baale nɛ,

alebu ŋgba ɔ gbeŋgyoo alo nɛ,

abɔɔ lɛɛre ŋgba abɔɔ yɔɔre nɛ,

ŋon ɔ ne paa ŋgba ŋon ɔ ne pakee balaŋ nɛ,

ŋon ɔ dana kom na ŋon be dana e kom nɛ.

3 Baa wɔlɛɛ tɛɛle keŋ kerekere,

na baa ŋmaa ka abɔɔ pou,

Degbeŋgyoo yakona nombii kei.

4 Tɛɛle ne di waraŋsa te ke ta boto,

tɛɛle pou te kaa te ke ta boto,

adido na tɛɛle pou te kaa.

5 Baŋ be kyaa tɛɛle dɔɔ nɛ te walaa ke,

nawolo nyi be te di mmaraase ŋan dɔɔ ya,

ba te wɔlɛɛ kawolase ŋan,

te be wɔlɛɛ nɔɔkebakesee kekpaakekpaa keŋ.

6 Mena dɔɔ kefaala gyakaa tɛɛle keŋ dɔɔ,

te ke man balaŋ ne naa diyem lee be fɔɔkedi dɔɔ,

Baŋ be kyaa tɛɛle keŋ dɔɔ baa nyakee,

balaŋ kyomii ne gyaela baa ka.

7 Gerepo keŋ na wolo, te waen woŋse na boto,

baŋ bɛɛ nyaŋee nɛ pou baa keŋee.

8 Akyakaase ŋan kenyaŋee kewii te tina yela,

baŋ bɛɛ nyaŋee nɛ yeesa te kɔŋ ɔto,

adolɛɛ kenyaŋee kewii te yɛɛ yididi.

9 Bɔɔ na tekaa mo nɔɔneŋ kekpee nyɔɔ waen ya,

soloŋ doŋte dana ŋan fa soloŋ nyɔɔra.

10 Donɔɔ keŋ bɔɔ yɛlɛɛ ke nɛ doo yakaa,

ba te tɔ dekpaŋalaŋ kamasɛ denaanɔɔ keŋ ŋolo ba gyoo ya.

11 Be sia te yɛɛ bɛɛ kɛo waen abɔnterese man,

kenyaŋee pou te kɔŋ ɔto,

kenyaŋee yeesase pou ta yoo tɛɛle keŋ dɔɔ.

12 Ba te wɔlɛɛ donɔɔ dinaa keŋ,

te be tekerii ka anaanɔɔse pou,

13 Mena ne gyaela ke kɔŋ tɛɛle dɔɔ,

na tɛɛlese pou man,

ŋgba mena keŋ be kɔ oliifi bia taŋ,

yaa ŋgba mena keŋ be kɔ gerepo bia taŋ, te bɛɛ tɛɛ gyalase nɛ.

14 Bee gyina ba woya, bɛɛ nyaŋee fae yeesa,

bɛɛ fae yeesa lee weese dɛɛgyoe yenaŋ lese Degbeŋgyoo gyoorobiiri wola.

15 Mena dɔɔ ɛmɛɛ baŋ ɛ kyaa weese dɛɛlee yenaŋ, ɛ mo gyoorobiiri fa Degbeŋgyoo,

ɛ gyina Degbeŋgyoo, Iseraetena Wurubuarɛ ŋon yele adido,

ɛpo tɛɛlese ŋan loŋ be kilisi ŋa nɛ man.

16 Dee nyii nɔɔneŋse lee tɛɛle ɔto nyiaa,

<<Gyoorobiiri yɛɛ ŋon ɔ tenɛɛ nɛ wui.>>

Mɔna me yakowɔ nyiaa, <<Ma te taŋ, Ma te taŋ!

Maa laako!

Baŋ bɛɛ lese balaŋ fa ta lese man fa!

Baŋ bɛɛ kɛrɛɛ balaŋ nawɔɔtɛɛ ta lese maŋ fa!>>

17 Gyakoloŋ na dowokom na kɔta ne daa,

baŋ be kyaa tɛɛle dɔɔ nɛ.

18 Ŋon ɔ yeu lee keŋ ne ŋmaase e nɛ gyaŋ na,

waa yala gyoo dowokom man,

ŋon ɔ gyem lee dowokom man,

waa gyoo kɔta man.

Be ta toro adido loŋse gbɛɛneŋ,

te tɛɛle mokɔɔ kasee wosiwɔ.

19 Tɛɛle te bɛɛ,

tɛɛle te kpase

tɛɛle ne wosi keŋkeŋ.

20 Tɛɛle ne bɛɛle ŋgba ŋon ɔ be dɛɛse nɛ,

kee wosi ŋgba feliŋ ne gyɔna kefɛɛbii nɛ,

te ɔ dukum keyɛɛ ta bese kasolɔ ɔ dɔɔ,

ɔ te yale keŋ ɔ ba koro bela ya.

21 Mena wee kenaŋ Degbeŋgyoo waa wɔŋ

adido doŋse deŋele adido,

na tɛɛle dɔɔ gyooneŋ tɛɛle dɔɔ.

22 Baa yilaa be popou dokoloŋ

ŋgba baŋ bɔɔ kyaŋ tɔ deni keŋ doo bɔɔ man nɛ.

Baa tɔ wɔ do deni man,

weeya burum ŋaale wɔle na baa wɔŋ ba deŋele.

23 Gyaalaŋ wose gyae ke gbirisi e,

na desɛŋ ke kyaŋ weese,

nawolo nyi Degbeŋgyoo Dekpataakpere waa di gyoori,

Siyɔn bula dɔɔ na Yerusalɛm,

na waa lese ɔ gyoorobiiri wola be kegyiise siaman.