1 Keyakosee keŋ ne tia Tiro nɛ yaa,

Ɛmɛɛ Taresisi agbelese dinaana, ɛ lɔ nɔɔ!

Nawolo nyi ba te wɔlɛɛ Tiro,

denɛɛ yaa agbelese dɛɛseŋae be doo ya,

Kipero tɛɛle man

te ba lese ke wola wɔ.

2 Ɛmɛɛ baŋ ɛ kyaa ɛpo nɔɔman,

na Sidɔn kebudiira

baŋ ɛpo dɔɔ kebudiira be yele ɛ be nyiŋ ɛ wose, ɛ yɛɛ yididi,

3 Ɛ kyaawɔ loŋse dɔɔ,

mo weenɛɛ lee Sihore,

Naele weenɛɛ akɛrɛɛŋ yɛna toto fa Tiro

te botɔɔ kaa bese tɛɛlese kebu dedii,

4 Sidɔn na ɛpo gyeere, desɛŋ dɛɛ kyaŋ ŋon,

nawolo nyi ɛpo te kolosi,

<<Me ta doŋeeta see, yaa maa lola see ya,

ma te kɛɛleta bia baala yaa bia ala see ya.>>

5 Akpaa Igyipitetena de nyii nombii kei nɛ,

gyae ke takaa wɔ nideli ŋgba bɔɔ nyii ke lee Tiro nɛ.

6 Ɛmɛɛ baŋ ɛ kyaa ɛpo nɔɔman,

ɛ gbaa gyu Taresisi na ɛ ke di waraŋsa,

7 Kei yɛna ɛ donɔɔ dinaa keŋ ɛ ne nyaŋee ke dɔɔ,

donɔɔ dinaa bene bene keŋ,

ke nawɔɔ ba mo ke gyu,

ke kyaa tɛɛle lem lem nɛ yaa?

8 Amɔte bakena mena nyeeman kei tia Tiro,

ŋon ɔ ne wuu balaŋ gyooro kotɔtɔɔse,

ɔ kebudiira yɛɛ gyoorobiawɔ,

baŋ bɛɛ lɛɛ wa abɔɔ dana yele tɛɛle dɔɔ.

9 Degbeŋgyoo Dekpataakpere te bake nyi,

waa yela agaŋtaŋtena wosekenyiŋ pou ke yɛɛ yakaa,

na waa yɔkɔse baŋ pou be dana yele tɛɛle dɔɔ.

10 Nyaŋ Taresisi bu alebu,

fara n tɛɛle fɛlɛɛ ŋgba Naele nɛ,

nawolo nyi kolo be kyaa ke tɔ neŋ gbɛɛ ya.

11 Degbeŋgyoo ta tenee ɔ nyiŋmaa tee ɛpo,

ɔ yela ke gyooridediise sereewɔ.

Ɔ te fa mmaraa lee Kaana wose man nyi,

baa wɔlɛɛ akyaŋse ŋan pou ne gyee e.

12 Ɔ yakowɔ nyiaa, <<N be gyae n ka tekaa nyaŋee ya,

Nyaŋ Sidɔn alebu keteŋ, ba te wɔlɛɛ neŋ!

Koro, gbaa gyu Kiperose,

botɔɔ koraŋ n wose be gyae ke fɛɛ neŋ ya.>>

13 Kɛɛ Babilɔntena tɛɛle keŋ,

nɛnɛɛ ka te yɛɛ tɛɛle ke ya!

Asiriyatena te yele ke ta bese

ŋale man wonembia dekyae,

be baŋee akagyase na baa mo yoona donɔɔ dinaa keŋ,

be tekerii botɔɔse ŋan ne gyee wɔ nɛ,

te be wɔlɛɛ dekyaŋ keŋ.

14 Ɛmɛɛ Taresisi pantuuse dinaana, ɛ lɔ nɔɔ,

ba te wɔlɛɛ ɛ dekyaŋ keŋ!

15 Debaŋ kenaŋ nɛ, baa wolee Tiro kulutooneŋ sɔŋotooro na kufu, keŋ yɛɛ gyoo ŋolo kulutooneŋ ŋan ɔ be dii nɛ. Mɔna kulutooneŋ sɔŋotooro na kufu kei wɔle nɛ, gyae ke yɛɛ Tiro ŋgba futooli alo ŋon nɔɔneŋ nyi,

16 <<Nyaŋ futooli alo ŋon bɔɔ wolee neŋ,

Mo nya adolɛɛ, kila donɔɔ dinaa keŋ man,,

gyɔ nya adolɛɛ keŋ nideli, kpee nɔɔneŋse burum,

na baa tɔɔse neŋ bela>>

17 Kulutooneŋ sɔŋotooro na kufu ŋan wɔle nɛ, Degbeŋgyoo waa kaa kɛɛ Tiro bela, waa bese yɛɛ ɔ futooli keŋ, na ŋon na tɛɛle kei dɔɔ gyooridediise ka bese di kebu tɛɛle keŋ dɔɔ. 18 Mɔna baa lese ɔ tɔnɔɔ na ŋan waa nyiŋ pou see yenaŋ fa Degbeŋgyoo,

bɔɔ gyae baa yilaa ŋa yaa baa mo ŋa weese fa e ya.

Baa nyiŋ weenɛɛ na kegbase burum lee ŋe man fa baŋ bɛɛ som Degbeŋgyoo nɛ.