1 Wee kenaŋ baa kpee nɔɔneŋ kei Yuda tɛɛle man nyiaa,

<<De dana donɔɔ dinaa doŋte,

Wurubuarɛ ta mo nyeekelɛɛ

yɛɛ ka akyaŋ mo kyaŋ ke.

2 Ɛ toro anaanɔɔse ŋan,

na tɛɛle keŋ ka tenɛɛ ke nyiŋ gyoo,

tɛɛle keŋ kɛɛ kyaŋ ka kelɛɛdi man nɛ.

3 Baŋ bɛɛ mo ba nyeempɔ gyakaa n dɔɔ nɛ,

n ke yela baa kyaa wosefɛɛreŋ gbagba man,

nawolo nyi be ta mo ba wose lɔ n dɔɔ.

4 Mo n wose lɔ Degbeŋgyoo dɔɔ kekpaakekpaa,

nawolo nyi Degbeŋgyoo, Degbeŋgyoo gbagba, yɛna kpanaŋ kekpaakekpaa.

5 Ɔ ne yɔkɔse baŋ be kyaa botɔɔ keŋ korɛɛ nɛ,

ɔ ne yɔkɔse donɔɔ dinaa keŋ korɛɛ nɛ,

ɔ ne yɔkɔse ke kyɛɛkyɛɛ tɛɛle man,

ɔ ne yɛlɛɛ ke yɛɛ akuŋkuŋ.

6 Nawɔɔ ne sakatee ke,

baŋ bɔɔ ŋere wɔ do nawɔɔ,

na ayematena nawɔɔ dabetee ne sakateena ke.

7 Ŋon ɔ tenɛɛ nɛ gbɛɛ doo tee,

nyaŋ ŋon n gbɛɛneŋ tenɛɛ nɛ yelela, ŋon ɔ tenɛɛ nɛ gbɛɛneŋ doo kyɛɛkyɛɛ.

8 Ayi, Degbeŋgyoo, de silana nyaŋ mmaraase ŋan,

dɛɛ daa neŋ,

n yele na n ketɔɔse,

yɛna keŋ de konɔɔse ne gyae.

9 Mɛɛ mo me konɔɔ pou kɛo neŋ nelim,

nebo na n ne gyɔ ma woo loo,

Akpaa n nombia kedi de kɔŋ tɛɛle dɔɔ na,

tɛɛle keŋ dɔɔ balaŋ ne kasee keŋ ka tenɛɛ.

10 Akpaa n boele akpanyanyaŋte na,

be bɛɛ kasee nombia ŋan tenɛɛ ya,

baŋ ba tenɛɛ tɛɛle dɔɔ koraŋ nɛ, be gyakaa bɛɛ yɛɛ nombia kumɛɛ,

te bɔɔ ne naa Degbeŋgyoo ɔkeereŋ ya.

11 Degbeŋgyoo, n te gyina n nyiŋmaa adido,

mɔna bɔɔ ne naa ke ya.

Yela baa gyeŋ mena keŋ n ne gyae n balaŋ nideli nɛ, na desɛŋ ke kyaŋ wɔ,

yela boalaŋ keŋ n be kaase see n kɔlara nɛ ke kpa wɔ.

12 Degbeŋgyoo, nyaŋ seena wosefɛɛreŋ mokɔɔ fa daa,

ŋan pou dɔɔ tale yɛɛ nɛ, nyaŋ yɛɛla fa daa.

13 Degbeŋgyoo de Wurubuarɛ, gbeŋgyoona baale te di de dɔɔ kaalaŋ,

mɔna n yele kaageŋ te dɛɛ mo obuo fa.

14 Nɛnɛɛ be ta yekee, bɔɔ tekaa kyaa bela ya,

ba woya bɛɛ fom ya,

n wɔŋa ba deŋele te n wɔlɛɛ wɔ,

ŋolo bɛɛ tɔɔse wɔ bela ya.

15 Degbeŋgyoo, n te yele n balaŋ baŋ te wuku,

n te yele n balaŋ te wuku,

n te nyiŋ gyoorobiiri fa n wose,

n te fɛlɛɛ tɛɛle keŋ pou wuluse.

16 Degbeŋgyoo, be kɔŋawɔ n gyaŋ ba wose kekyaŋ man,

n ka tenee wɔ na,

ba te tale gyuusu nɔɔ fane fa ya.

17 Mena keŋ alo fulute na doŋee,

te ɔ ne nyii weeleŋ fae yeesa nɛ,

mena te de woɛ nyaŋ Degbeŋgyoo siaman.

18 De kyaŋa fulu, te da doŋeewɔ,

mɔna da lola feliŋ bo,

de ta mo nyeekelɛɛ kɔŋ tɛɛle keŋ dɔɔ ya,

te tɛɛle keŋ dɔɔ balaŋ te nyiŋ nyeedoŋ ya.

19 Mɔna n balaŋ ayeŋɛɛ baa nyiŋ nyeedoŋ, Degbeŋgyoo,

baa bese foŋii,

yela baŋ be doo akuŋkuŋ man nɛ,

ke foŋ na baa fae kenyaŋee yeesa,

nyɔ obosuo yɛɛ ŋgba nebo obosuo nɛ,

tɛɛle gyae ka lola ka woya.

20 Me balaŋ, ɛ ta, ɛ gyoo ɛ denɛɛ man,

na ɛ ke tɔ asima do ɛ wose,

ɛ weese ɛ wose kyomii,

kelii debaŋ keŋ ɔ baŋ gyae ke fɛɛ.

21 Kɛɛ, Degbeŋgyoo ta lee ɔ dekyae man ɔ ne kɔŋ,

ɔ kaa wɔŋ tɛɛle kei balaŋ deŋele lee ba dukum dɔɔ.

Tɛɛle gyae ka lese fatabo keŋ bɔɔ kyɛɛkee woli ke nɛ debɔɔ,

ka be gyae ke ka weese baŋ bɔɔ koo lɔ nɛ bela ya.