1 <<Ɛ kɔŋ, ɛmɛɛ baŋ pou loŋboaneŋ na ko ŋon,

ɛ kɔŋ loŋse ŋan gyaŋ,

ɛmɛɛ baŋ ɛ be dana kɔba ya,

ɛ kɔŋ kaa lɛɛ na ɛ ke di!

Ɛ kɔŋ kaa lɛɛ waen na miliki

bɔɔ na mo kɔba lɛɛ ya, te kɔɔ dana koya ya.

2 Weera dɔɔ te ɛ ne wɔlɛɛ kɔba abɔɔ ŋan te yɛɛ weenɛɛ ya nɛ dɔɔ,

te ɛ ne kaa lɛɛ abɔɔ ŋan be gyae ke baa ŋon ya?

Ɛ tei, ɛ tei maŋ na ɛ ke di weenɛɛ kpaakpaa,

te ɛ sia gyae ka gye nideli.

3 Ɛ see deŋele na ɛ ke kɔŋ me gyaŋ,

ɛ tei na ɛ ke nyiŋ nyeedoŋ.

Maa bakenɔɔ kekpaakekpaa na ŋon,

ma anokoare kegyae keŋ mɔɔ yakosee fa Dawide nɛ.

4 Kɛɛ, ma te yɛɛ e adansɛɛte fa balaŋ baŋ,

balaŋ baŋ siamante na yoonɔɔ siamante.

5 Kɛɛ, n ke yilaa tɛɛlese baŋ n ba gyeŋ wɔ ya nɛ,

te tɛɛlese ŋan n ba gyeŋ ya nɛ baa yeu kɔŋ n gyaŋ,

lee Degbeŋgyoo n Wurubuarɛ,

Iseraetena fereŋkyeŋte ŋon dɔɔ,

nawolo nyi ŋon faana neŋ wosekenyiŋ.>>

6 Ɛ kɛo Degbeŋgyoo debaŋ keŋ ɛ ke naa e,

ɛ baake e debaŋ keŋ ɔ benaa.

7 Akpanyanyaŋtena baa yela be gbɛɛneŋ,

na baŋ bɔɔ tenɛɛ ya nɛ ke kyɛɛkee ba nyeempɔ.

Baa bese kɔŋ Degbeŋgyoo gyaŋ na waa wii be waraŋase,

na de Wurubuarɛ gyaŋ, nawolo nyi waa mo kyɛɛ wɔ faa.

8 Nawolo nyi ma nyeempɔ te yɛɛ yaa nyeempɔ ya.

ɛ gbɛɛneŋ te yɛɛ me gbɛɛneŋ ya,>>

Degbeŋgyoo torola yako.

9 <<Mena keŋ adido korɛɛ kela tɛɛle nɛ,

mena ke te me gbɛɛneŋ kela ɛ gbɛɛneŋ

te ma nyeempɔ kela yaa nyeempɔ.

10 Mena keŋ ɔga na senoo

na lee adido kaa yala,

te ke bɛɛ bese gyu bela ya

mɔna kɛɛ fɔ tɛɛle,

na abɔɔ te tuu na ŋa te dee,

na ka see bia fa wɔɔ farale na weenɛɛ anediŋ fa diiri nɛ,

11 mena te nombia ŋan na lee me nɔɔman nɛ doo.

Ka be gyae ka bese kɔŋ me gyaŋ yakaa ya,

mɔna ke gyae ke yɛɛ keŋ mɛɛ gyae,

na ke yɛɛ keŋ dɔɔ mɔɔ kpila ke nɛ.

12 Ɛ ka mo kenyaŋee lee,

baa ta ɛ siaman wosefɛɛreŋ man,

bulase na bulasebia,

baa lɔ nɔɔneŋ ɛ siaman,

na ŋale man daase pou

ke gyɔ ŋe nyiŋmaase.

13 Yunipa daase gyae ke tuu kpaŋkpaŋkorolo naawɔ man,

te kpeli daase gyae ka seŋ kpalamse naawɔ man.

Kei gyae ke yɛɛ yele fa Degbeŋgyoo,

na ka ke yɛɛ kagyene kekpaakekpaa,

keŋ ka be wɔlɛɛ korakora ya.>>