1 Kɛɛ, Degbeŋgyoo bam be yɛɛ duguŋ keŋ ɔ be tale lɛɛ ŋon,

yaa ɔ deŋela te tɔɔ keŋ ɔ bee nyii ŋon ya.

2 Mɔna ɛ dukum tirana

ɛmɛɛ na ɛ Wurubuarɛ nsana.

Ɛ dukum te wuu ɔ sia lee ɛ dɔɔ,

nyi ɔ be nyii ŋon ya.

3 Nawolo nyi fatabo te kpatee ɛ nyiŋmaase,

ayimɛɛ doo ɛ nyimbiise man.

Ɛ nɔɔsebia te dii akɛrɛɛ

te ɛ laakem ne kolosi akpanyanyaŋ nombia.

4 Ŋolo bɛɛ baake nombia kedi kegbɛɛ dɔɔ ya,

ŋolo bee di nombia anokoare gbɛɛ ya.

Bɛɛ gyae aŋmaareŋ te bee dii akɛrɛɛ,

bɛɛ kyaŋ kayeyɛɛ fulu, na be ta lola nombiakumɛɛ

5 Bɛɛ kpala dom kum wɔɔ

na be ta loo akya gbelaa.

Ŋon ɔ tao be wɔɔ na waa yeŋ,

te dokoloŋ de yɛlɛɛ na, ne kpala dom bu.

6 Ba akya gbelaa ŋan bɔɔ loo nɛ be dei fa kanyaŋ ya,

bɔɔ gyae baa tale mo keŋ bɔɔ loo nɛ wuu ba wose ya.

Ba ayɛɛsa yɛɛ dukum,

te nombia nkaraŋkaraŋ keyɛɛ doo be nyiŋmaase man.

7 Be nawɔɔ ne barase ke yɛɛ dukum,

te bɛɛ yɛɛ ɔsaa ke kyɛɛkee fatabo keŋ dukum be doo ke man ya nɛ leki.

Bɛɛ gyueŋ nombia kumɛɛ,

nombia nkaraŋkaraŋ keyɛɛ doo be gbɛɛneŋ man.

8 Bɔɔ gyeŋ wosefɛɛreŋ gbɛɛ ya,

nombia kedi kegbɛɛ dɔɔ be doo be dɛɛtɛe man ya.

Ba te gokii be gbɛɛneŋ

ŋon waa ta ŋe dɔɔ laŋ be gyae waa gyeŋ wosefɛɛreŋ ya.

9 Mena dɔɔ nombia kedi kegbɛɛ dɔɔ dana lem lee de gyaŋ,

te katenee bee lii de gyaŋ ya.

Dɛɛ kɛo keŋmaŋee mɔna detiŋtɛɛ te kilisi daa,

dɛɛ kɛo tɛɛ keŋmaŋee, mɔna de dɔŋ detiŋtɛɛ tuum man.

10 De dana de nyiŋmaase dɛɛ lalaa dekyaŋ ŋgba siayɛlɛɛsate nɛ,

dɛɛ kɛo gbɛɛ ŋgba balaŋ baŋ bɔɔ dana sia ya nɛ.

Dɛɛ gyɔ de naawɔ weese teŋteŋ ŋgba de dɔŋ nelim bo nɛ,

de yɛɛ ŋgba balaŋ ayeŋɛɛ nɛ wosedoŋtena man.

11 De popou ne gbesi ŋgba mokɔɔte nɛ,

dɛɛ muusu ŋgba awuluŋna nɛ.

Dɛɛ kɛo nombia kedi kegbɛɛ dɔɔ, mɔna dɔɔ ne nyim ya,

dɛɛ kɛo kelɛɛ mɔna ke kyaana lem.

12 Nawolo nyi de nombiakumɛɛ boe n siaman,

te de dukum ne di adansɛɛ tia daa.

De nombiakumɛɛ doo de siaman,

te da gyeŋ de nombia nkaraŋkaraŋ.

13 De ta besena de nimboo tee de Degbeŋgyoo te de bɛɛ e,

da besena de wɔle tee de Wurubuarɛ,

dɛɛ seŋ tia balaŋ te dɛɛ ŋere wɔ do,

dee dii akɛrɛɛ ŋan dɔɔ gyueŋ de konɔɔse man nɛ.

14 Mena dɔɔ ɔ te gegi nombia kedi kegbɛɛ dɔɔ,

te katenee seŋɛɛ lemlem,

anokoare te gyɔ ɔ nae abɔntere man,

te anokoare kedi be tale gyoo ya.

15 Bɔɔ ne naa anokoare kedi yenaŋ daale ya,

te ɔkamasɛ ŋon ɔ ne kɔla dukum na, bɛɛ naase e diyem.

Degbeŋgyoo naawɔ, te ka te yɛɛ e gyoŋ ya,

nyi nombia kedi kegbɛɛ dɔɔ be kyaa ya.

16 Ɔ naawɔ nyi ŋolo be kyaa ya,

doo ɔ nɔɔ nyi ŋolo be kyaa waa kyɔ ya.

mena dɔɔ ɔ moo ŋon gbagba ɔ doŋ lɛɛ ɔ wose,

te ŋon gbagba ɔ katenee danaana e.

17 Ɔ moo katenee do ŋgba nyeele pampasaŋ nɛ,

te ɔ moo nyeekelɛɛ wuu ŋgba nyeele kotɔtɔɔ nɛ.

Ɔ doo deŋele kewɔŋ kom ketɔ ŋgba kegba nɛ,

te ɔ moo baŋ milii ɔ wose ŋgba kanyaŋ nɛ.

18 Waa wɔŋ deŋele tɔ kom,

ŋgba mena keŋ ba ayɛɛsa doo nɛ,

waa mo baŋ tɔ ɔ kɔlara kom,

na baŋ bɛɛ kɔla e nɛ,

waa tɔ baŋ be kyaa naŋ lem mɔ kom.

19 Balaŋ baa yee Degbeŋgyoo yele lee weese dɛɛyalae

na baa mo obuo fa ɔ gyoorobiiri lee weese dɛɛlee,

Nawolo nyi waa kɔŋ ŋgba boo kewuu waale,

keŋ Degbeŋgyoo weesɛɛ be gegi laŋ nɛ.

20 <<Nyeelɛɛre ŋon waa kɔŋ Siyɔn,

Yakɔbe dekpaŋalaŋmantena baŋ bɔɔ kyɛɛkee lee be dukum man nɛ gyaŋ,>>

Degbeŋgyoo torola yako.

21 Degbeŋgyoo kpa nyiaa,<<Maŋ dɔɔ kei yɛna me nɔɔkebakesee fa wɔ. Me feliŋ ŋon ɔ doo n man nɛ be gyae waa lee n man ya, debaŋ kamasɛ na me nombia ŋan mɔɔ mo do n nɔɔman nɛ gyae ke doo n nɔɔman na n bia nɔɔse man, na n duuluŋ man balaŋ nɔɔse man lee gyɛŋ kelii kekpaakekpaa, Degbeŋgyoo yakola.