1 Kei yɛna keŋ Degbeŋgyoo be yako ɔ walaŋ ŋon ɔ be tiu e nuŋ nɛ,

fa Korese ŋon mɔɔ lɔ kyaŋ e ɔ dunoluŋ nyiŋmaa,

nyi maa yɔkɔse tɛɛlese ɔ siaman.

na maa booli gyooneŋ gbegyase,

na maa toro asima ɔ siaman,

na bɔɔ tɔe anaanɔɔse ya.

2 Maa ta n siaman,

na maa tala bulase,

maa tekerii kɔbere anaanɔɔse,

na maa kɛrɛɛ nyeela ŋan doo ŋe man.

3 Maa fa neŋ agyapadɛɛse ŋan weesɛɛ,

wosekenyiŋ ŋan bɔɔ mo see daweesee man,

na n ka gyeŋ nyi maŋ yɛna Degbeŋgyoo,

Iserae Wurubuarɛ ŋon ɔ be lɔ yele baake neŋ.

4 Lee ma somere Yakɔbe,

na Iserae ŋon mɔɔ lese nɛ dɔɔ,

me lɔɔ yele baake neŋ,

doo nyi n ba gyeŋ maŋ ya,

mɔna me ta mo obuo fa neŋ

5 Maŋ yɛna Degbeŋgyoo, te ŋolo be kyaa ya,

maŋ wɔle na Wurubuarɛ ŋolo be kyaa ya.

doo nyi n ba gyeŋ maŋ ya,

mɔna maa do neŋ doŋ,

6 na balaŋ kenyiŋ gyeŋ nyi ŋolo be kyaa me wɔle,

lee weese dɛɛlee,

kelii weese dɛɛgyoe ya.

Maŋ yɛna Degbeŋgyoo, te ŋolo be kyaa bela ya.

7 Maŋ yɛɛna keŋmaŋee te me yɛɛ detiŋtɛɛ,

ma moo kede kɔŋ, te ma moo nombiikum kɔŋ,

Maŋ Degbeŋgyoo yɛɛna kɛŋa pou.

8 <<Ɛmɛɛ adido, ɛ kyɛɛkee me katenee lɔ tɛɛle dɔɔ,

debuŋta dɛɛ tisina ke woli tɛɛle.

Tɛɛle dee wola ke nɔɔ,

na nyeekelɛɛ ke bɛɛ lee kɔŋ,

katenee dɛɛ bee kpuna ke,

Maŋ Degbeŋgyoo yɛɛna ke.>>

9 Baŋ bɛɛ kalena be yɛɛre nɛ baa laako,

be yɛɛ yakaa ŋgba osuŋse nɛ,

ŋgba osuŋse ŋan bɛɛle doo ŋe man tɛɛle dɔɔ nɛ.

Tɛɛle ne bɔɔse osuŋ maare nyi,

<woŋ yaa n ne maa?>

N tom ne yako nyi,

<Maare ŋon be dana nyiŋmaase yee>?

10 Ŋon ɔ yako ɔ kya nyi,

<Woŋ yaa n lolawɔ?>

yaa ɔ naa nyi,

woŋ te n doŋeewɔ? nɛ waa laako.

11 Nnɛ yaa Degbeŋgyoo, Iserae fereŋkyeŋte ŋon,

na ɔ yɛɛre ne yako,

lee abɔɔ ŋan gyae kekɔŋ nɛ wose man.

Gbɛɛ doo nyi yaa bɔɔse maŋ kolo lee me bia wose man,

yaa ɛ ka wola maŋ keŋ maa yɛɛ lee me nyiŋmaa man tomse man?

12 Maŋ yɛɛna tɛɛle kei,

te me yɛɛ walaŋ see ke man.

Maŋ gbagba nyiŋmaase wɔŋana adido man,

te ma moo ka abɔɔ see ŋe daseŋae man.

13 Maŋ ne gyaela maa gyina Korese me katenee gbɛɛ man,

maŋ ne gyaela maa yela ɔ gbɛɛneŋ ka tenee.

Waa bese baŋ me donɔɔ dinaa keŋ,

na waa yela me yoogbeŋa ke nyiŋ ba wose,

keŋ ɔ be lɛɛ komketɔ yaa baa fa e kolo ya,

Degbeŋgyoo Dekpataakpere ŋon yakola.>>

14 Nnɛ yaa Degbeŋgyoo ne yako,

<<Igyipite dedii na Kuse kebu abɔɔ kenyiŋ*,

Sebatena dɔɔloŋ nyibaŋ,

baa kɔŋ n gyaŋ,

na baa bese n wui,

baa lɔ baameŋse sila neŋ,

baa ta dikpii man kɔŋ n gyaŋ.

Baa kaa buŋ n siaman,

na baa waase neŋ nyiaa,

Ampaŋ Wurubuarɛ kpuɛna neŋ, te ŋolo be kyaa ya,

Wurubuarɛ ŋolo be kyaa ya.>>>

15 Ampaŋ nyaŋ yɛna Wurubuarɛ ŋon n na weese n wose,

Iserae Wurubuarɛ na ɔ nyeelɛɛre.

16 Baŋ pou bɛɛ yɛɛ bɛɛneŋ nɛ sia gyae ka yeŋ na desɛŋ ke kyaŋ wɔ,

desɛŋ gyae ke kyaŋ be popou.

17 Mɔna Degbeŋgyoo waa lɛɛ Iserae,

nyeekelɛɛ kekpaakekpaa,

n sia be gyae ka yeŋ yaa desɛŋ ke kyaŋ neŋ korakora ya,

kekpaakekpaa.

18 Nnɛ yaa Degbeŋgyoo ne yako,

ŋon ɔ be yɛɛ adido,

ŋon yɛna Wurubuarɛ,

ŋon yɛɛna tɛɛle te ke kɔŋawɔ,

ŋon seena ka mokɔɔ,

ɔ te yɛɛ ke nyi ke dɛɛ doo yakaa ya,

mɔna ɔ yɛɛ ke na baa kyaa ke man,

ɔ kpa nyiaa,

<<Maŋ yɛna Degbeŋgyoo,

ŋolo be kyaa bela ya.

19 Ma te kolosi weese,

tɛɛle kei yenaŋ daale keŋ detiŋtɛɛ doo nɛ ya,

ma te yako Yakɔbe duuluŋ man balaŋ nyi,

<Ɛ kɛo maŋ yakaa ya.>

Maŋ Degbeŋgyoo ne kolosi anokoare,

mɛɛ toro yako keŋ doona ke gbɛɛ.

20 Ɛ yilaa na ɛ ke kɔŋ,

ɛmɛɛ baŋ ɛ be yekii gyu tɛɛlese man ɛ gyaŋee.

Baŋ be dɔŋ ba seelena daase bɛɛneŋ,

te bɛɛ fane fa wurubuarɛse baŋ bɔɔ tale lɛɛ wɔ ya nɛ, bɔɔ gyeŋ daale ya.

21 Ɛ toro ɛ nombia yako, na ɛ ka mo ŋa kɔŋ,

yela baa gyaŋee mo nyeempɔ.

Amɔte yakona kei lee gyaŋgba keŋ,

amɔte torona ke yako lee gyaŋgba gyaŋgba?

Na maŋ Degbeŋgyoo yee?

Wurubuarɛ ŋolo be kyaa kpuna maŋ ya,

Wurubuarɛ ŋon ɔ tenɛɛ te ɔ ne lɛɛ balaŋ nyee,

ŋolo be kyaa kpuna maŋ ya.

22 <<Ɛmɛɛ baŋ ɛ kyaa tɛɛle kei dɔɔ pou,

ɛ bese kɔŋ me gyaŋ na maa lɛɛ ɛ nyee,

nawolo nyi maŋ yɛna Wurubuarɛ te ŋolo be kyaa ya.

23 Ma te kaŋ ma wose ntam,

me nɔɔ te kolosi anokoare nombia,

nombia ŋan mɔɔ gyae maa kyɛɛkee ŋa ya.

Doona pou gyae ke buŋ maŋ,

laakem kamase gyae ke kaŋ ntam fa maŋ.

24 Baa yako nyi, <Degbeŋgyoo waageŋ man,

te katenee na doŋ doo.>>>

Baŋ pou bɔɔ gyeŋ baŋ do e nɛ,

baa kɔŋ ɔ gyaŋ na be sia ka yeŋ.

25 Mɔna Iserae duuluŋmantena pou,

baa nyiŋ katenee Degbeŋgyoo man,

na baa gate ba wose lee ŋon dɔɔ.