Yesaya 21

Keyakosee tia Babilɔn

1 Keyakosee keŋ ne tia depampaa keŋ kyaa ɛpo nɔɔman nɛ.

Mena keŋ koloŋoloŋ ne gyɔɔ lee ata yenaŋ depampaa man kɔŋ nɛ,

mena te nombiikum na lee depampaa man kɔŋ,

kɛɛ lee tɛɛle keŋ ke dana gyakoloŋ nɛ man.

2 Ba lese gyakoloŋ nombii daale wola maŋ,

Ŋon ɔ ne ŋmaa abɔɔ ne ŋmaa, ŋon ɔ ne wɔlɛɛ ne wɔlɛɛ,

Elam, yoo! Media tɔ wɔ do!

Maa yela ɔ katoroŋ keŋ ɔ ba mo kɔŋ nɛ kekɔŋ ɔto.

3 Kei yela mee nyii weeleŋ,

mɛɛ keŋee ŋgba alo ŋon ɔ na doŋee nɛ.

Ma wose ta yeŋ maŋ lee keŋ mɔɔ nyii nɛ dɔɔ,

ma wose ne seree maŋ lee keŋ mɔɔ naa dɔɔ.

4 Ma nyeempɔ te yɛɛ maŋ ala ala,

gyakoloŋ te yele mee seree,

balinɔɔ keŋ mɛɛ kɛɛ ke gbɛɛ nɛ,

ta bese kolo ne ŋmaase maŋ.

5 Ba see tebuluse ŋan,

be lɔɔ afoŋoŋse tɛɛle man,

be diiwɔ, be nyɔɔwɔ!

Ɛmɛɛ kyaarabia, ɛ koro,

ɛ tiu ɛ yoo nyeela pampasaŋse ŋan nuŋ!

6 Kei yɛna keŋ Degbeŋgyoo be yako maŋ,

<<Gyu, ka lese gyeere see,

yela waa yako kpene keŋ ɔ be naa.

7 Akpaa ɔ naa dɛɛkyɔŋse

bala bala ne wɔŋee anebiliŋiŋse,

afurumse kyaara,

yaa kurumɔɔse kyaara nɛ,

waa see deŋele,

waa see deŋele nideli.>>

8 Keŋte gyeere ŋon fae yeesa nyiaa,

<<Me gbeŋgyoo, wee na wee na ma seŋɛɛ me dɛɛgyee keŋ,

nelim kamasɛ na ma seŋɛɛ ma tom man.

9 Kɛɛ, baale ŋolo kyaa anebiliŋiŋ dɔɔ,

kpuna dɛɛkyɔŋse kyaara bala bala ne kɔŋala nɛ.

Keŋte ɔ tiranɔɔ nyiaa,

<Babilɔn te yɛlɛɛ, ka te yɛlɛɛ!

Ba te tekerii ɔ bɛɛneŋ pou,

lɔ tɛɛle man!>>

10 Ao, me balaŋ baŋ bɔɔ nam abɔɔ defeefui e ŋgba aboŋ nɛ,

me yako ŋon keŋ mɔɔ nyii,

lee Degbeŋgyoo Dekpataakpere ŋon gyaŋ,

lee Iseraetena Wurubuarɛ ŋon gyaŋ.

Keyakosee tia Edom

11 Nombii keŋ Wurubuarɛ be yako tia Duma nɛ yaa,

Ŋolo baake maŋ lee Seire bɔɔse nyiaa,

<<Gyeere, tɛɛ te naata yee?, Gyeere, tɛɛ te naata yee?>>

12 Gyeere ŋon tiranɔɔ nyiaa,

<<Teka kyomii na tɛɛ ke naa, mɔna tɛɛ gyae ka bese yuu bela.>>

Nyi akpaa ɛ ke bɔɔse na, ɛ bɔɔse

na ɛ ka bese kɔŋ.>>

Keyakosee tia Arabia

13 Keyakosee tia Arabia yaa,

Ɛmɛɛ Dedanetena dikpii,

baŋ ɛ be yilaa Arabia laa man,

14 ɛmɛɛ baŋ ɛ kyaa Tema,

ɛ mo loŋ kɔna baŋ loŋboaneŋ na ko wɔ,

ɛ mo weenɛɛ kɔna baŋ bɔɔ yeu lee yoo man.

15 Nawolo nyi be yeu yaa lee yoosilase nɔɔman,

lee yoosila keŋ bɔɔ wɔm nɛ nɔɔman,

lee baŋdaŋ keŋ bɔɔ wɔm,

na yoo keŋ ke nɔɔ dana doŋ nɛ nɔɔman.

16 Keŋ Degbeŋgyoo be yako maŋ yɛna nyiaa,

<<Kɛbo kulutoo dokoloŋ man, ŋgba mena keŋ paate ne kala ɔ weeya nɛ,

Kedare gyoorobiiri pou gyae ke kɔŋ ɔto.>> 17 Degbeŋgyoo, Iseraetena Wurubuarɛ kpa, <<Baŋdaŋ tɔɔra na Kedare yoonɔɔtena doŋ nyibaŋ burum. baa ka kyomii bo.>>