1 Nnɛ yaa Degbeŋgyoo ne yako,

<<Ɛ naa yale kebɛɛ tɔne,

keŋ mɔɔ mo bɛɛ e nɛ de?

Yaa ma komte woŋti,

yaa me yɔɔ ŋon fa?

Kɛɛ, ɛ dukum dɔɔ te be yɔɔ ŋon,

ɛ nombiakumɛɛ dɔɔ te be bɛɛ ɛ naa.

2 Woŋ dɔɔ te me kɔŋawɔ na, ŋolo be kyaa ya?

Woŋ dɔɔ te me baakewɔ te ŋolo te kpaa ya?

Me baam yɛɛ duguŋ beiŋ keŋ be tale lese ŋon yee?

Yaa mɔɔ dana doŋ keŋ maa lɛɛ ŋon yee?

Me kalawɔna ɛpo bo te ka yoowɔ,

Me yelaa booneŋ bese depampaa,

ŋe kpebia yekeewɔ dala keŋ loŋ be doo ŋe man ya,

loŋboaneŋ yela ba yekeewɔ.

3 Maa mo detiŋtɛɛ kaa adido,

na maa mo titere wuu ɔ dɔɔ.

4 Degbeŋgyoo Doŋ Pou Nyee te fa maŋ kaseere laakem,

na maa gyeŋ nombii keŋ maa mo do ŋon nombia be takaa e nɛ doŋ.

Ɔ ne gyuusu maŋ nebo kamasɛ,

ɔ na toro ma deŋele na maa nyii ŋgba kaseere nɛ.

5 Degbeŋgyoo Doŋ Pou Nyee ta toro ma deŋela,

ma te yɛɛ deŋele doŋ ya.

me ta bese me wɔle ya

6 Ma besenaa me maama fa baŋ bee tuku maŋ nɛ,

me lakaase fa baŋ bɛɛ wɔŋee me nɔɔfata nɛ,

Me ta mo me sia weese,

lee balaŋ kekulu na nɔɔloŋ ketɔ woli ya.

7 Keŋ Degbeŋgyoo Doŋ Pou Nyee ne kyɔ maŋ dɔɔ,

desɛŋ be gyae ke kyaŋ maŋ ya.

Mena dɔɔ ma te sara me sia ŋgba boe keŋ kɛɛ bee nɛ,

te ma gyeŋ nyi me sia be gyae ka yeŋ ya.

8 Walaŋ ŋon waa fa maŋ deŋele kedi nɛ benaa.

Amɔte ne gyaela waa mo nombia gyakaa me dɔɔ?

Waa kɔŋ dɛɛ gyaŋee,

amɔte moona nombia gyakaa me dɔɔ?

Waa tuu benaa maŋ.

9 Degbeŋgyoo Doŋ Pou Nyee ne kyɔɔna maŋ,

Amɔte ne gyaela waa bu maŋ fɔɔ?

Baa lɔɔree ŋgba kanyaŋ nɛ,

paapaase baa tao wɔ.

10 Ɛ man woŋti ne yeena Degbeŋgyoo,

te ɔ ne di ɔ somere nombia dɔɔ?

Amɔte dɔŋɛɛla detiŋtɛɛ man,

keŋ ɔ be taŋ keŋmaŋee ya,

waa mo ɔ wose lɔ Degbeŋgyoo yele dɔɔ,

na waa lɛɛ ɔ Wurubuarɛ di.

11 Nɛnɛɛ ɛmɛɛ baŋ pou ɛ na do boalaŋse,

te ɛ ne kyaa boalaŋ laakemse gyaŋ woli,

ɛ ta ɛ boalaŋse keŋmaŋee man,

na boalaŋ keŋ ɛ ne feefudo nɛ man.

Keŋ ɛ ke nyiŋ lee me nyiŋmaa man yɛna nyi,

ɛ ke tisi doo diyem kena man.