1 Maa kpee nɔɔneŋ fa ŋon mɛɛ gyae nɛ,

ɔ gerepo wɔɔ keŋ man nɔɔneŋ.

Ŋon mɛɛ gyae nɛ dana gerepo wɔɔ,

bulabii tɛɛle kpaakpaa dɔɔ.

2 Ɔ pupui ke lese ka boya,

te ɔ duu gerepo kpaakpaa,

ɔ baŋa degyee dekagya ke man,

te ɔ wula botɔɔ keŋ bɛɛ ŋmaase gerepo mɔ,

na ɔ ne daa nyi ŋe gyae ka se gerepo bia kpaakpaa,

mɔna ŋa see bia awɔlɛɛsa bo.

3 <<Nɛnɛɛ ɛmɛɛ baŋ ɛ kyaa Yerusalɛm na Yuda,

ɛ di daa na me gerepo wɔɔ nombia fa daa.

4 Woŋ te kaboena nyi maa yɛɛ fa me gerepo wɔɔ

te ma te yɛɛ ya?

Weera dɔɔ te mɛɛ kɛɛ nyi maa nyiŋ gerepo kpaakpaa

te ŋa see bia awɔlɛɛsa bo?

5 Nɛnɛɛ maa yako ŋon,

keŋ maa yɛɛ me gerepo wɔɔ keŋ.

Maa lese keŋ mɔɔ mo gyee ke nɛ,

na maa wɔlɛɛ ke.

Maa tekerii ka dekyaŋ,

na baa sakatee ke

6 Maa yela ke ka bese depampaa,

keŋ ba te kpaase yaa fara ke ya,

te kpalamse na kpaŋkpaŋkorolose gyae ke tu ke man.

Maa tɔ ŋɔma gbɛɛ,

keŋ be yele ɔga ke ŋɛɛ woli ke ya.>>

7 Degbeŋgyoo Dekpataakpere gerepo wɔɔ,

yɛna Iserae tɛɛle keŋ,

te Yudatena mɔ yɛna gerepo keŋ ɔ ne gyae beiŋ,

ɔ ne kɛɛ nyi baa di nombia na kegbɛɛ mɔna balaŋ te bɛɛ koe.

Ɔ ne kɛo katenee mɔna waraŋase kewii te ɔ ne nyii.

8 Ɛmɛɛ baŋ ɛ dana akpaŋalaŋse te ɛ na peree ŋaale kpu,

te ɛ na peree tɛɛlese kpu ɛ tɛɛlese man,

kelii debaŋ keŋ ŋa be taŋ,

te ɛmɛɛ yaageŋ kyaala tɛɛle kei dɔɔ nɛ, ɛ laako.

9 Me nyiiwɔ Degbeŋgyoo Dekpataakpere ŋon torowɔ yako nyiaa,

<<Ampaŋ, akpaŋalaŋse dinaana ŋan gyae kaa yɛlɛɛ,

denɛɛ dinaana kyeokyeo ŋan gyae ke doo keŋ balaŋ be kyaa ŋe man ya.

10 Baa nyiŋ waen ogelese looro bo lee gerepo wɔɔ ŋmeeseŋ sɔŋonaara na kufu (10) man,

te ɛ duu bia burum na, ɛ ke kɔ kyomii bo.

11 Baŋ bɛɛ karatɛɛ nebo nebo,

te be silana soloŋ gbɛɛ,

te bɛɛ nyɔɔ menɛɛ dɛɛse,

kelii nelim kyeeŋ nɛ baa laako.

12 Nɔɔkedi tɛɛ na be dana Adolɛɛse na akyakaase,

na kefereese na akyakaase na waen,

mɔna bɔɔ na mo Degbeŋgyoo aneyɛŋ yɛɛ kolo,

yaa baa mo obuo fa ɔ nyiŋmaa man tom ya.

13 Mena dɔɔ baa kyaŋ me balaŋ ŋgba yoogbeŋa nɛ,

lee keŋ bɔɔ ne nyii nombia man ya dɔɔ,

tanam gyae ka koe baŋ be dana obuo nɛ,

na loŋboaneŋ mɔ ka ko be balaŋ yakaa nyibaŋ.

14 Mena dɔɔ woyadɛɛ te fɛlɛɛ ɔ nɔɔ,

te ɔ wola ɔ nɔɔ foo,

Yerusalɛm gyoorobia na ke balaŋ burum,

kpuna be yeesa na ba akelelee baa tisi gyoo ke man.

15 Mena dɔɔ baa kɔna balaŋ tɛɛle man,

na baa yɔkɔse ɔkamasɛ,

na baa yɔkɔse agaŋtaŋtena.

16 Mɔna baa gyina Degbeŋgyoo Dekpataakpere adido lee ɔ nombia kedina kegbɛɛ dɔɔ.

Baa lese wola nyi Wurubuarɛ Fereŋkyeŋte ŋon yɛɛ fereŋkyeŋ lee waa ayɛɛsa ŋan tenɛɛ nɛ man.

17 Namense baa dii botɔɔ ŋgba be deedii gbagba nɛ,

namense bia baa dii kɔbatena donɔɔse ŋan be yɛlɛɛ nɛ man.

18 Baŋ bɔɔ mo dekara ŋmeleŋ kpaŋna dukum bɛɛ wɔm,

te bɔɔ mo anebiliŋiŋ ŋmeleŋ kpaŋna akpanyanyaŋ bɛɛ wɔm nɛ baa laako.

19 Baŋ bɛɛ yako nyi, <<Yela Wurubuarɛ ke yɛɛ ɔsaa,

yela e waa yɛɛ ɔ tom bileŋ,

na dɛɛ naa.

Yela Iserae fereŋkyeŋte ŋon nyeeman nombia,

ka benaa, yela ke ka lee debɔɔ,

na dee nyiŋ gyeŋ ke.>>

20 Baŋ bɛɛ baake dukum nyi kpaakpaa,

te kpaakpaa nyi dukum,

te bɛɛ mo detiŋtɛɛ see keŋmaŋee nae man,

na keŋmaŋee fa detiŋtɛɛ,

te bɛɛ mo ŋan see fa gyoŋ,

na gyoŋ fa ŋan nɛ, baa laako.

21 Baŋ bɛɛ kɛɛ nyi be sia te kare,

te bɛɛ kɛɛ nyi ba gyeŋ nombia nɛ, baa laako.

22 Baŋ bɛɛ yɛɛ baalabiiri waen kenyɔɔ beiŋ man,

na baŋ bɔɔ lɛɛ yele soloŋ ke kyakale man nɛ, baa laako.

23 Bɛɛ yoo lɛɛ kolo na be ta mo deŋele kedi fa ŋon ɔ nombia be dei ya,

na be ta ŋere ŋon ɔ nombia dei nɛ do.

24 Mena dɔɔ ŋgba mena keŋ boalaŋ laakem ne kpa kaase,

na boalaŋ degyapaa te kpa ŋalese awolɛɛ dugudugu nɛ,

mena te ŋe lila gyae ke dala,

te feliŋ gyae ke gyɔ ŋa kyeŋkyeŋkɔɔse laŋ ŋgba akuŋkuŋ nɛ,

nawolo nyi ba te bɛɛ Degbeŋgyoo Dekpataakpere ŋon mmaraa,

te be bɛɛ Iserae Fereŋkyeŋte ŋon nombia.

25 Mena dɔɔ Degbeŋgyoo ta gyeŋ baŋ ɔ balaŋ dɔɔ,

ɔ te gyina ɔ nyiŋmaa te ɔ gyɔɔ wɔ lɔ.

Bulase wosiwɔ,

na woya doo ŋgba woŋsila doola abɔntere man nɛ.

Kɛŋa pou wɔle nɛ, ɔ te tinaata ɔ baŋ yela ya,

ɔ nyiŋmaa sɛɛ doo adido.

26 Waa gyina felage adido fa tɛɛlese ŋan kyaa lemlem,

ɔ wola weele baake baŋ be kyaa tɛɛle ɔto nɛ.

Kɛɛ be ta mo ɔsaa na kebarase

bɛɛ kɔŋ.

27 Be man ŋolo te kaa yaa waa sarakee ya,

ŋolo te deŋeli yaa waa doo ya.

ŋolo bɛlɛte te booli ɔ teŋa man ya,

te ŋolo nkyokota ŋmeleŋ te tiri ya.

28 Be baŋdaŋ nyeela na bee,

te ba te desina be baŋdaŋse.

Be dɛɛkyɔŋse awɔkatese wɔɛ ŋgba boe keŋ kɛɛ bee nɛ.

be yookɔta naawɔɔ yɛɛ ŋgba koloŋoloŋ nɛ.

29 Be kemuusu yɛɛ ŋgba dinaate wui nɛ,

bee muusu ŋgba dinaate bia nɛ,

bee muusu ke kyaŋ wonembu,

na be ta mo e laŋ keŋ ŋolo be tale lɛɛ e ya.

30 Mena wee kenaŋ nɛ, baa muusu woli ke,

ŋgba mena keŋ ɛpo ne muusu nɛ.

Nyi ŋolo de kɛɛ tɛɛle dɔɔ nɛ,

detiŋtɛɛ na kayeyɛɛ kaageŋ te waa naa,

debuŋta gyae ke yela weese ka gyoo detiŋtɛɛ.