1 <<Ɛmɛɛ tɛɛlese ŋan loŋ be kilisi ŋon, ɛ wuu ɛ nɔɔ me siaman.

Ɛ yela tɛɛlese ka do ba wose doŋ wɔle.

Ɛ yela baa tuu kɔŋ na baa kolosi,

ɛ yela dɛɛ gyaŋee nombia dedii man.

2 <<Amɔte doona ŋon ɔ ba lee weese dɛɛlee man kakyeŋ,

te ɔ baake e katenee man fa ɔ tom keyɛɛ?

Ɔ ta mo tɛɛlese do ɔ nyiŋmaa man,

te ɔ yɔkɔse gyooneŋ ɔ siaman.

Ɔ ta mo ɔ yoosila yela be ta bese akuŋkuŋ,

ɔ baŋdaŋ ne yɛɛ wɔ ŋgba wura ŋan feliŋ ne gyɔɔ nɛ.

3 Ɔ ne kuu gyakaa be dɔɔ keŋ kolo bɛɛ yɛɛ e ya,

gbɛɛ keŋ ɔ ta moota ke dɔɔ see ya.

4 Amɔte yɛɛna kei te ɔ yɛɛ ke kelii ɔto,

te ɔ ne baake kalola kegyakaare leenaŋ kewalaŋ keŋ?

Maŋ, Degbeŋgyoo ŋon mɔɔ kyaana gyaŋgbatena baŋ

te me kyaana ɔtomantena nɛ, maŋ ŋonaŋ.>>

5 Baŋ be kyaa tɛɛlese ŋan loŋ be kilisi ŋa naawɔ te gyakoloŋ gyoo wɔ,

tɛɛlese ɔto sereewɔ.

Be tuuwɔ benaa te be kɔŋawɔ siaman.

6 Bɛɛ kyɔ dɔŋa,

na ba te yako dɔŋa nyiaa, <<Seŋ keŋkeŋ.>>

7 Nyeele tomyɛɛre na do kɔba yayam luure kakyeŋ,

te ŋon ɔ na mo hama kyalase nɛ,

na do ŋon ɔ ne gyɔ nyema do nɛ doŋ,

Ŋolo ne yako ŋon ɔ ne kyaŋ nyeela debodokoloŋ nɛ nyi, <<Ke dei.>>

Bɛɛ mo nyeelabia gyɔ kyaŋ bane ŋon na ɔ be tum yala ya.

8 <<Mɔna nyaŋ, me tobaale Iserae,

Yakɔbe ŋon mɔɔ lese,

nyaŋ me gyoo Aberaham duuluŋman balaŋ,

9 Ma moo neŋ leenaŋ tɛɛle ɔto,

te me baake neŋ lee ka kebɔtalase man.

Me yakowɔ nyi, <Nyaŋ yɛna me tobaale,>

Maŋ lesena neŋ, te ma te bɛɛ neŋ ya.

10 Mena dɔɔ naa yee ya, nawolo nyi me kpuɛna neŋ,

na yele n wɔe kelɔ neŋ ya, nawolo nyi maŋ yɛna n Wurubuarɛ.

Maa do neŋ doŋ na maa kyɔ neŋ,

Maa mo me katenee dunoluŋ nyiŋmaa keŋ lɔ kyaŋ neŋ.

11 Baŋ pou bɛɛ gyeŋ baŋ do neŋ,

sia gyae ka yeŋ na desɛŋ ke kyaŋ wɔ,

baŋ pou bɛɛ seŋ tia neŋ,

baa yɛɛ yakaa na baa munu.

12 Doo nyi n ne kɛo n kɔlara nɛ,

n be gyae n ke naa wɔ ya.

Baŋ bee yoo neŋ nɛ,

baa yɛɛ yakaa.

13 Nawolo nyi maŋ yɛna Degbeŋgyoo n Wurubuarɛ,

ŋon mɔɔ lɔ kyaŋ neŋ n dunoluŋ nyiŋmaa man,

te mɔɔ yako neŋ nyi, Naa yee ya,

maa kyɔ neŋ nɛ.

14 Naa yee ya, nyaŋ feelii Yakɔbe,

nyaŋ Iserae ŋon n ta boo ya,

nawolo nyi maŋ gbagba maa kyɔ neŋ,>> Degbeŋgyoo torola yako,

Maŋ yɛna n lɛɛre, Iserae Fereŋkyeŋte Ŋon.

15 Kɛɛ, maa yɛɛ neŋ amɔla ketuku kɔta,

wɔle keŋ kɛɛ bee te ke dana kela burum.

Nyaŋ ke yɛlɛɛ bulase na n ke wɔlɛɛ ŋa,

na n ke yela bulasebia ka bese wura,

16 Nyaŋ ke feefu ŋa, na feliŋ ka mo ŋa laŋ,

na feliŋkum ke yaasee ŋa,

Mɔna nyaŋ dɔɔ nyaŋ ke nyaŋee lee Degbeŋgyoo man,

na n ka lese Iserae Fereŋkyeŋte ŋon yele.

17 <<Akpaa ayematena na baŋ bɔɔ dana kolo ya ne kɛo loŋ,

te be te nyim ya,

te be laakemse da wolo lee loŋboaneŋ dɔɔ nɛ,

maŋ Degbeŋgyoo maa kpa wɔ,

Maŋ, Iseraetena Wurubuarɛ ŋon be gyae maa bɛɛ wɔ ya.

18 Maa yela booneŋ ke bɛɛ lee bulase ŋan ŋale be doo ŋe dɔɔ ya nɛ nyeeman,

na boŋobiise ke bɛɛ lee detaŋgyase man.

Maa yela depampaase ka bese apaase,

na tɛɛle dowolo ka bese boŋobiise.

19 Maa yela sida na akasia na osibi na oliifi daase,

ka seŋ depampaa man,

maa yela kateenaa na daase doŋ nyiŋan ke tu,

tɛɛle dowolo dɔɔ,

20 na balaŋ kena na baa gyeŋ,

baa gyueŋ ke man na baa nyii ke man,

nyi Degbeŋgyoo nyiŋmaa yɛɛna kei,

nyi Iserae Fereŋkyeŋte Ŋon yɛɛna kei.

21 Degbeŋgyoo kpa,

<<Ɛ mo ɛ nombia kɔŋ,

Yakɔbe gyoo kpa,

<<Ɛ kaa lese ɛ nɔɔse,

22 <<Ɛmɛɛ bɛɛneŋ, ɛ yako daa,

woŋ ne gyaela ke kɔŋ.

Ɛ yako daa mena keŋ beneŋ abɔɔ wɔɛ,

na dee nyiŋ gyueŋ ŋa,

na dɛɛ gyeŋ ŋɔ ɔtoman.

Yaa ɛ yako daa abɔɔ ŋan gyae ke kɔŋ.

23 Ɛ yako daa keŋ gyae ke kɔŋ weedaale,

na dɛɛ gyeŋ nyi ɛ yɛɛ wurubuarɛsewɔ.

Ɛ yɛɛ kolo kpaakpaa yaa kolokum,

na da wose ke gbirisi daa na dee yee.

24 Kɛɛ, ɛ be doo daale man ya,

te ɛ tomse yɛɛ yakaa,

ɔkamasɛ ŋon ɔ lese ŋon na ɔ ta bese anekɔlaŋ!

25 <<Ma te baake ŋolo lee ado yenaŋ te ɔ ne kɔŋ,

ŋolo lee weese dɛɛlee keŋ ɔ ne baake ma yele.

Waa sakatee siamantena ŋgba tɛɛle nɛ,

ŋgba saabu maare ŋon ɔ ne buu tɛɛle nɛ.

26 Amɔte yakona kei lee kewalaŋ keŋ na dɛɛ gyeŋ,

yaa ɔ wulaa yako ke na dɛɛ yako nyi, <<Ɔ nombia doona kegbɛɛ>>?

Ŋolo te yako ke ya,

ŋolo te wulaa yako ke ya,

ŋolo te nyii nombia ŋaale lee n gyaŋ ya.

27 Maŋ taŋgbɛɛla yako Siyɔn nyi, <Kɛɛ, baŋ yaa.>

Maŋ faana Yerusalɛm kpilare ŋon ɔ ne kolosi nombia kpaakpaa.

28 Me kɛɛwɔ mɔna ŋolo be kyaa ya,

ŋolo be kyaa bɛɛneŋ baŋ man keŋ waa kolosido ya,

me bɔɔse wɔ nombia na, ŋolo be kyaa waa tiranɔɔ ya.

29 Kɛɛ, be popou be dana tɔnɔɔ ya.

Ba ayɛɛsa yɛɛ yakaa,

be bɛɛneŋ yɛɛ feliŋ na yakaa.