1 Kei yɛna keyakosee tia Babilɔn keŋ Amose bu Yesaya be naa.

2 Ɛ gyina felage bulabii keŋ ke doo peŋteŋpereiŋ nɛ dɔɔ,

ɛ fae yeesa baake yoonɔɔtena,

Ɛ mo ɛ nyiŋmaa wola wɔ,

nyi baa gyoo gyoorobia anaanɔɔse ŋan man.

3 Ma te fae do baŋ mɔ desina fa yoo nɛ,

ma te baake me yoonɔɔtena nyi baa lese me baŋ wola,

baŋ bɛɛ nyaŋee ma keyoodi man nɛ.

4 Ɛ Tei, yeesa bulase dɔɔ,

ŋgba balaŋ burum nɛ.

Tei, gyooridediise ŋan ne wosi,

ŋgba tɛɛlese ne yilaala nɛ,

Degbeŋgyoo Dekpataakpere ŋon ne desinaana

yoonɔɔtena fa yoo.

5 Ba lee tɛɛlese lemlem,

lee Adidose ŋan ɔto.

Be kɔŋaana Degbeŋgyoo baŋ yoo abɔɔ,

na baa wɔlɛɛ tɛɛle keŋ pou.

6 Ɛ wii keŋkeŋ, nawolo nyi Degbeŋgyoo wee keŋ ta benaa.

ke gyae ke kɔŋ ŋgba kewɔlɛɛ nɛ lee Dekpataakpere ŋon gyaŋ.

7 Lee kei dɔɔ nyiŋmaase pou gyae ke yɔkɔse,

na gyakoloŋ ke yela konɔɔ kamasɛ ke yala koyololo.

8 Keŋeŋii gyae ka gyoo wɔ,

weeleŋ na kayeyɛɛ gyae ke yala wɔ,

baa keŋee ŋgba kadoŋee kyaŋana alo nɛ.

Baa kɛɛ dɔŋa siaman fee,

be sia gyae ke kyaŋee boalaŋ.

9 Kɛɛ, Degbeŋgyoo wee keŋ ne kɔŋ,

ke gyae ke yɛɛ weekum na baŋ na ayorɛ,

na waa yela tɛɛle keŋ ke doo yakaa,

na waa wɔlɛɛ nombiakumɛɛ yɛɛra lee ke man.

10 Adido kyolobiise na ŋa dikpii,

be gyae ke ŋmaŋee ya.

Weese de bɛɛ lee na gyae ke yɛɛ detiŋtɛɛ,

te gyaalaŋ be gyae waa fa keŋmaŋee ya.

11 Maa wɔŋ tɛɛle keŋ deŋele lee be nombiakumɛɛ dɔɔ,

na akpanyanyaŋtena lee be dukum dɔɔ.

maa mo Agaŋtaŋtena wose kegate kɔŋ ɔto,

na maa yɔkɔse tɔɔman ŋantena wose kegate.

12 Maa yela deniwalaŋ kena ke yɛɛ baŋ kela kɔba yayam,

gyae ke yɛɛ doŋ kela Ofire kɔba yayam.

13 Mena dɔɔ maa yela adido ke seree,

na tɛɛle ke wosi lee ka dedoi man,

lee Degbeŋgyoo Dekpataakpere baŋ keŋ dɔɔ,

ɔ baŋ beiŋ wee keŋ man.

14 Ŋgba mena keŋ ɔkpaŋ na peŋlaa ŋaa nɛ,

ŋgba namense baŋ bɔɔ dana kɛɛlere ya nɛ,

be popou baa bese gyu baŋ gbagba balaŋ gyaŋ,

baa yekii gyu baŋ gbagba be tɛɛlese man.

15 Ɔkamasɛ ŋon be kyaŋ e na baa sɔɔ e ko,

baŋ be kyaŋ wɔ na, baa yala yoosila nɔɔman.

16 Baa fuŋii be bia ŋmeree tɛɛle be sia man,

baa ŋmɛɛle ba akpaŋalaŋse man abɔɔ, na baa ŋere be wɛɛla doona wɔ.

17 Kɛɛ, maa feefudo Mediatena na baa seŋ tia wɔ,

baŋ bɔɔ famenɛna kɔba wolom ya,

te kɔba yayam bɛɛ gyoo be sia ya nɛ.

18 Be baŋdaŋse gyae ka koe be bia tewulɛɛ,

bɔɔ gyae baa wii kyokyoose waraŋase,

yaa baa wii bia ya.

19 Babilɔn, gyooridediise man kegyaŋa kpaakpaate,

Wurubuarɛ waa tu,

Babilɔntena wose kegate na be gyoorobiiri

ŋgba Sodom na Gomora nɛ.

20 Walaŋ be gyae waa kyaa ke man korakora,

yaa ŋolo ke kɔŋ kaa kyaa ke man kalola kegyakaare man ya.

Arabetena be gyae baa baŋee be kanyaŋ denɛɛ botɔɔ,

yaa namensekɛɛlera ke yela be namense na ba asoose ke fɛɛfo botɔɔ ya.

21 mɔna depampaa man wonembia ne gyaela baa doo botɔɔ,

gbougbouse baa wulu ɔ denɛɛ man,

botɔɔ te kpilimse baa kyaa,

te bakyueŋna ba toŋee botɔɔ.

22 Mokɔɔtese baa gbesi ka nyee keŋ man,

te gbougbouse mɔ baa mo ɔ gyooro dekpaŋalaŋ keŋ,

Ɔ debaŋ te lii,

te bɔɔ gyae baa kpu e weeya ya.