1 Ɛ mo namensebia ŋgba kefa nɛ,

lee Sela tana depampaa keŋ man,

ka mo Siyɔn alebu bula keŋ dɔɔ,

kefa ŋon ɔ ne di tɛɛle keŋ dɔɔ nɛ.

2 Mena keŋ be gegi gyebuse,

lee ba asaase man te bee furufu yeyɛɛ nɛ,

mena te Moabe ala,

baa yeyɛɛ be dɛɛ toŋae Anon boo keŋ.

3 Moabe kpa, <<Ɛ mo ya nyeempɔ,

ɛ wola daa keŋ dɛɛ yɛɛ.

Yela n wɔŋtaa ke yɛɛ ŋgba nelim nɛ,

weese gelegele.

Weese baŋ bɔɔ yekii nɛ,

Naa lese baŋ yoo be gegi wɔ nɛ fa ya.

4 Yela Moabetena baŋ bɔɔ gegi wɔ do ŋale ke kyaa n gyaŋ,

yela baa yo n gyaŋ lee wɔlɛɛre ŋon gyaŋ.>>

Kaŋeredote gyae ke kɔŋ ɔ to,

na kewɔlɛɛ ke tina yela,

baŋ bee yoo daa baa ŋaalaa tɛɛle keŋ dɔɔ.

5 Baa see gyoorogbeli kegyae man,

ŋolo waa kyaa ke dɔɔ anokoare kedi man,

waa lee Dawide dekpaŋalaŋ man,

waa di nombia kegbɛɛ dɔɔ,

waa kɛɛ nyi katenee nombia ke gyu bileŋbileŋ.

6 De nyii Moabe wose kegate,

mena keŋ ɔ ne yɛɛ agaŋtaŋ,

ɔ wose kawola na ɔ wose kegate na ɔ siadoŋ,

mɔna ɔ konɔɔ kegyɔ yɛɛ yakaa.

7 Mena dɔɔ Moabetena lɔɔ nɔɔ,

be yɛɛ dokoloŋ lɔɔ nɔɔ fa Moabe.

Ba toroŋwɔ te be mutiiwɔ,

lee Kire Haresete kyakpɛlɛbia dɔɔ.

8 Hɛsebon wɔɔse ta boto,

Sibema gerepo wɔɔse mɔ mena.

Baŋ bee di tɛɛlese dɔɔ,

te sakatee gerepo woŋse kpaakpaa nyiŋan,

ŋan nafɔ ŋee lii naŋ Yasere,

te be fɛlɛɛ kelii depampaa keŋ man nɛ.

ke tombia ne fɛlɛɛ,

kelii naŋ ɛpo nɔɔman.

9 Mena dɔɔ maa wii ŋgba mena keŋ Yasere,

ne wii fa Sibema gerepo woŋse nɛ.

Hɛsebon na Eleale,

maa mo siasaraŋ fɔ ŋon,

Kenyaŋee yeesa ŋan bɛɛ fae lee ɛ weenɛɛ bia ayɛɛ,

na ɛ weenɛɛ kekɛrɛɛ man te kaa dɔɔ.

10 Be ta lese kenyaŋee na gyoŋ kedi lee ɛ wɔɔse kpaakpaa man,

ŋolo bee kpee nɔɔneŋ, yaa waa fae yeesa gerepo wɔɔse ŋan man ya,

ŋolo bɛɛ ŋmaase gerepo lese waen be dɛɛ ŋmaasee keŋ man ya,

nawolo nyi ma te tɔ yeesa kefae gbɛɛ.

11 Me konɔɔ na toroŋ fa Moabe ŋgba adolɛɛ nɛ,

me tɔɔman ne kyoŋii maŋ fa Kire Haresete.

12 Nyi Moabe de gyu botɔɔ keŋ ɔ na som na,

ɔ ne naase ɔ wose diyem bo,

nyi ɔ gyu ɔ bane dɛɛ ɔ kaa fane na,

ke yɛɛ yakaa.

13 Kei yɛna nombii keŋ Degbeŋgyoo be wulaa kolosi kaalaŋ lee Moabe wose man. 14 Mɔna nɛnɛɛ Degbeŋgyoo kpa, <<Kɛbo kulutooneŋ atooro wɔle ŋgba mena keŋ paate kulutooneŋ doo nɛ, baa do Moabe gyoorobiiri na ɔ balaŋ burum baŋ desɛŋ. Balaŋ kyomii ne gyaela baa ka, te bɔɔ gyae baa yɛɛ doŋ ya.>>