1 Bɛle te gɔŋase ɔ nyee, te Nebo buŋawɔ,

be bɛɛneŋ ta bese kasolɔse yuŋnyiŋan wonembia seelena,

be bɛɛneŋ dinɔɔse ŋan wonembia baŋ seelena nɛ dana yuŋ,

kasolɔse ŋan te takaa wɔ.

2 Baŋ na bɛɛneŋ baŋ ne debodokoloŋ tisi buŋ,

bɔɔ ne tale lɛɛ kasolɔse ŋan ya,

baŋ gbagba ne gyu yoogbeŋiri man.

3 <<Ɛmɛɛ Yakɔbe duuluŋman balaŋ,

ɛmɛɛ Iserae balaŋ akaŋ baŋ pou,

ɛmɛɛ baŋ mɔɔ tela ŋon leenaŋ ɛ fulu kekyaŋ man,

te mɔɔ do ŋon maama lee debaŋ keŋ bɔɔ lola ŋon, ɛ tei maŋ.

4 Kelii debaŋ keŋ ɛ ke ŋmɛ na ɛ nyee ka wolose nɛ,

Maŋ yɛna maŋ, maŋ yɛna ŋon maa kɛɛ ɛ dɔɔ.

Maŋ yɛɛna ŋon te maŋ ne gyaela maa tela ŋon,

maa kɛɛ ɛ dɔɔ na maa lɛɛ ŋon.

5 Amɔte yaa ɛ ka mo maŋ maana, yaa de yɛɛ kyɛɛkyɛɛ?

Ŋolo kyaa keŋ ɔ yɛɛ ŋgba man keŋ ɛ ka mo e maana maŋ?

6 Baale ne kyɛɛkee kɔba yayam lee be kotokuse man,

na ba te maa kɔba wolom sikelise dɔɔ,

bɛɛ bɔ nyeele luure paa nyi waa mo ke yɛɛ bane,

na be te bum som ke.

7 Bɛɛ gate ke gyakaa ba degbaŋgbaŋ dɔɔ,

mo ke kasee ka dedoi man na ke ta seŋ botɔɔ.

Kɔ ne tale kulu lee ke daseŋae kenaŋ man ya.

Nyi ŋolo ne fae yeesa baake e na, ɔ bɛɛ tale kpaa ya,

ɔ bɛɛ tale lɛɛ wɔ lee be kaalese man ya.

8 <<Ɛmɛɛ deŋele doŋtena, ɛ tɔɔse kei na ɛ ka gyueŋ ke man,

ke dee doo ɛ konɔɔse man.

9 Ɛ tɔɔse gyaŋgba abɔɔ ŋan, beneŋ beneŋ nombia ŋan.

Maŋ yɛna Wurubuarɛ te ŋolo be kyaa ya,

Maŋ yɛna Wurubuarɛ te ŋolo be wɔɛ ŋgba maŋ ya.

10 Lee kewalaŋ te mɛɛ yako ɔtoman nombia,

lee beneŋ beneŋ keŋ te mɛɛ yako keŋ gyae ke kɔŋ,

mɛɛ yako nyi, <Ma kegyaebii gyae ka seŋ,

te maa yɛɛ ŋan pou na gyoo me sia.>

11 Me baake kekperekpere lee weese dɛɛlee man,

baale ŋon waa yɛɛ ma kegyaebii lee tɛɛle lemlem.

Keŋ mɔɔ yako nɛ, keŋ te maa yela ka ke kɔŋ,

keŋ mɔɔ bake nɛ, keŋ te maa yɛɛ.

12 Ɛmɛɛ konɔɔyuŋtena, ɛ tei maŋ,

ɛmɛɛ baŋ ɛ dana lem lee me katenee gyaŋ.

13 Me ta mo me katenee benaa,

kɔɔ dana lem ya,

te ma nyeekelɛɛ be gyae ke dɔɔ wɔle ya.

Maa lɛɛ Siyɔn nyee,

maa lese me gyoorobiiri wola Iserae.