1 Nnɛ yaa Degbeŋgyoo ne yako,

<< Ɛ di nombia kegbɛɛ dɔɔ,

na ɛ ke yɛɛ keŋ doona kegbɛɛ,

nawolo nyi ma nyeekelɛɛ ta benaa

be gyae ke kyare ya maa lese me katenee wola.

2 Ŋon ɔ ne yɛɛ abɔɔ kɛŋa nɛ,

walaŋ ŋon ɔ dana ŋe man keŋkeŋ,

ŋon ɔ ne di ma kefɛɛfowee dɔɔ keŋ ɔ bɛɛ waalaa ke ya,

te ɔ nyiŋmaa bɛɛ yɛɛ dukum ya nɛ, ŋonna nyeebam.

3 Ŋɔɔle ŋon ɔ ba mo ɔ wose fa Degbeŋgyoo nɛ naa yako nyiaa,

<<Kalese te Degbeŋgyoo waa lese maŋ lee ɔ balaŋ man ya.>>

Saayɛte naa toroŋ nyiaa,

<<Me yɛɛ daŋ dowolo ke ya.>>

4 Nawolo nyi nnɛ yaa Degbeŋgyoo ne yako,

<<Saayɛtena baŋ be di ma kefɛɛfowee dɔɔ,

te ɔ ba lese keŋ na gyoo me sia,

te be di me nɔɔkebakesee dɔɔ nɛ,

5 maa fa wɔ ketɔɔse kolo na yele,

mɔ ɔsom deni dinaa keŋ man na ka akyaŋse dɔɔ,

keŋ dei kela bia alebia na bia tewulɛɛ.

Maa fa wɔ yele keŋ gyae ke doo kekpaakekpaa,

te ka be gyae ka yo ya.

6 Te ŋɔɔla baŋ bɔɔ mo ba wose lɔɔ Degbeŋgyoo dɔɔ,

nyi baa som e,

na baa gyae Degbeŋgyoo yele,

na baa yɛɛ ɔ somera nɛ,

baŋ pou bɛɛ di kefɛɛfowee keŋ dɔɔ keŋ bɔɔ ne waalaa ke ya,

te bɔɔ kyaŋ me nɔɔkebakesee keŋ man keŋkeŋ nɛ,

7 baŋ te maa mo kɔŋ me bula fereŋkyeŋ keŋ dɔɔ,

na maa fa wɔ kenyaŋee me kefane deni man,

Be katoo kedeesase na ba kedeesase

gyae ka gyoo me sia ma kedeesaboe keŋ dɔɔ.

nawolo nyi baa baake mɔ ɔsom deni dinaa keŋ nyi,

kefane deni fa tɛɛlese pou.>>

8 Degbeŋgyoo Doŋ Pou Nyee,

ŋon ɔ be yilaa Iserae yoogbeŋa nɛ ta toro yako nyiaa,

<<Maa bese yilaa baale fa wɔ,

mo kpuna baŋ mɔɔ wulaa yilaa nɛ.>>

9 Ɛmɛɛ ŋale man wonembia pou, ɛ kɔŋ,

ɛmɛɛ laaman wonembia pou, ɛ kaa tao!

10 Iseraetena gyeera sia te yɛlɛɛ,

be popou ba gyeŋ nombia ya,

be popou yɛɛ babaase baŋ be nɔɔse be wuu,

bɔɔ ne tale gbesi ya,

bee doo doosi

dosoroŋ dana wɔ gyoŋ.

11 Be yɛɛ babaase baŋ be dana kedikum,

bɔɔ ne baa ya.

Be yɛɛ namensekɛɛlera baŋ bɔɔ ne nyii nombia man ya,

be popou te kpase mo be gbɛɛ,

ɔ kamasɛ ne gyae waageŋ wui bo.

12 Bɛɛ baake dɔŋa nyiaa, <<Ɛ kɔŋ na de kaa gyae waen!

Ɛ yela dɛɛ nyɔɔ soloŋ doŋte baa!

Kyoo gyae ke yɛɛ ŋgba gyɛŋ nɛ,

yaa gyae ke de kela koraŋ>>