1 Degbeŋgyoo, nyaŋ yɛna me Wurubuarɛ,

Maa gyina neŋ adido na maa lese n yele,

nawolo nyi n te yɛɛ gyakoloŋ nombia.

abɔɔ ŋan n be bake lee beneŋ beneŋ nɛ,

n te yɛɛ ŋa nideli anokoare gbɛɛ man.

2 N te yele donɔɔ dinaa keŋ ta bese boya ŋan bɔɔ yilaa,

donɔɔ keŋ bɔɔ baŋ dekyaŋ kilisi ke nɛ te yɛlɛɛ,

ŋɔɔla donɔɔ dinaa keŋ bɔɔ baŋ dekyaŋ kilisi ke te yɛlɛɛ,

bɔɔ gyae baa baŋ ke korakora ya.

3 Mena dɔɔ balaŋ baŋ be dana doŋ baa mo obuo fa neŋ,

tɔɔman ŋantena tɛɛlese baa yee neŋ.

4 Nyaŋ yɛna ayematena keyeu kagyoo,

baŋ bɔɔ dana kolo ya nɛ, keyeu kagyoo ba wose kekyaŋ man,

dayoe lee feliŋkum man,

weese kpalala man wuluŋ.

Tɔɔman ŋantena weesɛɛ,

yɛɛ ŋgba ɔga feliŋ ne gyɔɔna dekyaŋ nɛ.

5 ŋgba depampaa man duwulawula nɛ.

N te yɔkɔse ŋɔɔla yeesa,

mena keŋ ŋɔma ne yɔkɔse weese kegyɔ nɛ,

mena te n yɔkɔse tɔɔman ŋantena baŋ keyoodi nɔɔneŋ.

6 Degbeŋgyoo Dekpataakpere ŋon,

waa fa balaŋ pou siŋkiti weenɛɛ bula kei dɔɔ,

waa mo nɔɔkedi waen keŋ be pae see botɔɔ,

naane kpaakpaate na soloŋ kpaakpaate.

7 Bula kei dɔɔ te waa wɔlɛɛ,

yeŋ kanyaŋ keŋ wuɛ balaŋ baŋ pou dɔɔ,

na keŋ wuɛ tɛɛlese pou dɔɔ nɛ,

8 waa lila yeŋ kekpaakekpaa,

Degbeŋgyoo Doŋ Pou Nyee waa feefo siasaraŋ

lee sia pou man,

waa lese ɔ balaŋ desɛŋ

lee tɛɛle pou dɔɔ.

Degbeŋgyoo te kolosi.

9 Wee kenaŋ baa yako nyiaa,

<<De Wurubuarɛ yaa ampaŋ,

da moo da wose lɔ ɔ dɔɔ, te ɔ lɛɛ da nyee.

Degbeŋgyoo yaa da moo da wose lɔ ɔ dɔɔ,

ɛ yela dɛɛ nyaŋee na ke yɛ daa gyoŋ lee ɔ nyeekelɛɛ dɔɔ.>>

10 Degbeŋgyoo nyiŋmaa gyae ke gyakaa bula kei dɔɔ,

mɔna baa sakatee Moabe be tɛɛle man,

ŋgba mena keŋ bɛɛ sakatee woŋsila dufuŋ man nɛ.

11 Baa fɛlɛɛ be nyiŋmaase ke man,

ŋgba mena keŋ boo yɛlɛɛra ne fɛlɛɛ be nyiŋmaase yɛlɛɛ boo nɛ.

Wurubuarɛ waa yɔkɔse ba wose kegate,

na be nyiŋmaase man tomse ŋan bɛɛ mo adao yɛɛ nɛ.

12 Waa tekerii nya akyaŋse doŋ nyiŋan ŋan korɛɛ nɛ,

lɔ tɛɛle man,

na waa yɛlɛɛ ŋa kerekere

bese akuŋkuŋ.