1 Kulutoo keŋ man gyoo Usiya ba yem nɛ, me naa Degbeŋgyoo na ɔ kyaa gyoorogbeli dinaa keŋ ka korɛɛ nɛ dɔɔ, te ɔ kegba wurikyim nɔɔse wuu ɔsom deni dinaa keŋ pou man. 2 Serafimese seŋɛɛ ɔ gyaŋ, te be man ɔkamasɛ dana beŋkelɛɛ looro. Ba moo beŋkelɛɛ ala wuu be sia, te ba moo ala mɔ wuu be nawɔɔ, te ba moo ala bee furufu. 3 Na bɛɛ bake dɔŋa nyiaa,

<<Fereŋkyeŋ, Fereŋkyeŋ, Fereŋkyeŋ yɛna Degbeŋgyoo Dekpataakpere ŋon,

ɔ gyoorobiiri te wuu tɛɛle pou.>>

4 Be yeesa yela anaanɔɔ daase na deni keŋ mokɔɔ wosiwɔ, te nyɔɔse wulu ɔsom deni dinaa keŋ pou. 5 Te me yakowɔ nyiaa, <<Maa laako! Mɔ ɔto yaa! Nawolo nyi me nɔɔwoya pou yɛɛ dukum, te daa na baŋ be nɔɔwoya yɛɛ dukum nɛ kyaala debodokoloŋ, mɔna ma te naa gyoo ŋon, Degbeŋgyoo Dekpataakpere ŋon na me sia.>>

6 Te Serafimese baŋ man ŋolo furufuwɔ kɔŋ me gyaŋ na ɔ telana boalaŋ na nyewalaŋ keŋ ɔ ba mo gbɛŋgbɛŋ lese lee kedeesaboe keŋ man nɛ. 7 Ɔ moo ke tina me nɔɔ te ɔ yakowɔ nyi, <<Kɛɛ, kei te tina n nɔɔ, be ta lese n fɔɔkedi te be tɔɔ n dukum kom.>>

8 Botɔɔ te me nyii Degbeŋgyoo woya nyiaa, <<Amɔte yaa maa kpila? Te amɔte ne gyae laa waa gyu fa daa?>>

Te me yakowɔ nyiaa, <<Maŋ yaa. Kpila maŋ.>>

9 Ɔ yakowɔ nyi <<Gyu ke yako balaŋ kɛo nyiaa,

<<<Kenyii dɔɔ ɛ ke nyii, mɔna ɛ be gyae ɛ ke nyii ke man ya.

kekɛɛ na ɛ ke kɛɛ, mɔna ɛ be gyae ɛ ke naa ke man nideli ya.

10 Yela balaŋ kɛwɔ konɔɔse keyɛɛ doŋ

yela ba deŋela ke yɛɛ wɔ gbirim

na n ke yela be sia ke yɛɛ wɔ tuum.

Na mena ya na baa mo be sia naa,

na baa mo ba deŋela nyii,

na baa mo be konɔɔ nyii ke man,

na baa kyɛɛkee na maa kyɔ wɔ.>>

11 Te me bɔɔsewɔ nyiaa, <<Degbeŋgyoo kelii debaŋ woŋti?>>

Te ɔ tiranɔɔ nyiaa,

<<Kelii debaŋ keŋ donɔɔ dinaa keŋ be yɛlɛɛ

te ŋolo be kyaa ke man ya,

kelii debaŋ keŋ ŋolo be kyaa denɛɛ ŋan man ya

te be wɔɔse be wɔlɛɛ te ŋɔɔ bese awulaa.

12 Kelii debaŋ keŋ Degbeŋgyoo be gegi ɔkamasɛ gyu lemlem,

te bɔɔ wɔlɛɛ tɛɛle keŋ korakora.

13 Nyi kufu man dokoloŋ de kaa tɛɛle keŋ man koraŋ na,

ke gyae ke doo bo wɔlɛɛ,

ŋgba mena keŋ be tuŋ odum na kpeli daŋ

te ka mokɔɔ keŋ ne kaa tɛɛle man nɛ,

mena te daŋbii fereŋkyeŋ keŋ mɔ gyae ke yɛɛ mokɔɔ tɛɛle dɔɔ.>>