1 <<Ma lese ma wose wola baŋ ba te bɔɔse me dɔɔ ya nɛ,

baŋ ba te kɛo maŋ ya nɛ naa maŋ.

Tɛɛle keŋ kɔɔ gyeŋ ma yele ya nɛ,

Me yakowɔ nyiaa,<<Maŋ yaa, maŋ yaa.>>

2 Ma te fɛlɛɛ me nyiŋmaase wee pou

fa deŋele doŋtena,

baŋ be dɔŋ gbɛɛneŋ ŋan be dei ya nɛ dɔɔ,

baŋ be silana keŋ ba gyueŋ na wola wɔ nɛ,

3 balaŋ baŋ be gyakaa bɛɛ do maŋ baŋ

me siaman pɛɛ nɛ,

bɛɛ yɛɛ kedeesase wɔɔsebia man.

te bɛɛ too oliifi birikisi kedeesboya dɔɔ.

4 Balaŋ baŋ bɛɛ kyaa yebɔɔse man,

te bɛɛ yoo yɛɛ abɔɔ nelim pou,

baŋ bɛɛ tao kekuirii naaneŋ,

te naaneŋ anekɔlaŋ keyoŋ be wulu be saabuse nɛ,

5 baŋ bɛɛ yako nyi, <Lee kɛbo, naa benaa maŋ ya,

nawolo nyi, me yɛɛ fereŋkyeŋ beiŋ fa neŋ!>

Mena balaŋ benaŋ yɛɛ nyɔɔse ke ma memɔɔse man,

boalaŋ keŋ kɛɛ kpaa wee pou.

6 <<Kɛɛ, ba te ŋmarase see me siaman kɛbo nyiaa,

mɔɔ gyae maa wuu me nɔɔ ya mɔna maa tɔ wɔ ka kom nideli,

maa tɔ wɔ ka kom be siaman,

7 Ɛ dukum na ɛ naanaɔ dukum,

Degbeŋgyoo yakola.

<<Nawolo nyi ba too kedeesase bulase dɔɔ

te be walaa maŋ bulasebia ŋan dɔɔ,

maa maa baa ayɛŋ fa wɔ

na maa tɔ wɔ ba kom pou.>>

8 Nnɛ yaa Degbeŋgyoo ne yako,

<<Mena keŋ waen doo gerepo saase man,

te balaŋ ne yako nyi, <Naa wɔlɛɛ ke ya,

nhira sɛɛ doo ke man nɛ,

mena te maa yɛɛ lee ma somera dɔɔ,

mɔɔ gyae maa wɔlɛɛ wɔ pou ya.

9 Maa mo Yakɔbe na Yuda duuluŋman balaŋ,

baŋ baa mo me bulase ŋan yɛɛ baa dedii,

me balaŋ baŋ mɔɔ lese see nɛ ne gyaela baa di ŋa,

botɔɔ te me somera baa kyaa.

10 Saron gyae ka bese namense dedii,

te Akore detaŋgya keŋ gyae ka bese nunkyuese dɛɛfɛɛfoe,

fa me balaŋ baŋ bɛɛ kɛo maŋ nɛ.

11 <<Mɔ ɛmɛɛ baŋ ɛ be bɛɛ Degbeŋgyoo,

te ɛ be wolee me bula fereŋkyeŋ keŋ,

ɛmɛɛ baŋ ɛ ne fa bane Nyeebam kedi,

te ɛ na do waen keŋ bɔɔ kyakale wulu tasase fa bane Leesa nɛ,

12 maa mo ɛ leesa fa yoosila,

na baa koe ŋon pou,

nawolo nyi me baake ŋon mɔna ɛ te kpaa ya,

me kolosiwɔ mɔna ɛ te tei ya.

Ɛ yɛɛ dukum me siaman,

te ɛ yɛɛ keŋ mɔ ne gyae ya.>>

13 Mena dɔɔ nnɛ yaa Degbeŋgyoo Doŋ Pou Nyee ne yako,

<<Ma somera baa di,

mɔna ɛmɛɛ ɛ keta tanam,

ma somera baa nyɔɔ

mɔna ɛmɛɛ dɔɔ loŋboaneŋ gyae ka ko ŋon,

ma somera baa nyaŋee,

mɔna ɛmɛɛ dɔɔ desɛŋ gyae ke kyaŋ ŋon.

14 Ma somera baa kpee nɔɔneŋ,

lee kenyaŋee keŋ doo be konɔɔse man nɛ,

mɔna ɛmɛɛ dɔɔ ɛ ka mo waraŋsa

wii lee ɛ konɔɔse man.

na ɛ ke lɔ nɔɔ lee ɛ kaale man.

15 Ɛ ke tina ɛ yele yela,

fa me balaŋ baŋ mɔɔ lese nɛ ka mo falaa.

Degbeŋgyoo Doŋ Pou Nyee waa koe ŋon,

mɔna ɔ somera dɔɔ waa fa wɔ yele wɔle.

16 Ɔkamasɛ ŋon waa hiraa ɔ wose tɛɛle keŋ dɔɔ nɛ,

waa yɛɛ ke bo lee Wurubuarɛ anokoarete ŋon yele man,

ɔkamasɛ ŋon waa kaŋ ntam na,

waa kaŋ ntam lee Wurubuarɛ anokoarete ŋon yele man.

Nawolo nyi baa wolee gyaŋgba kaalese ŋan,

na baa weese ŋa lee me siaman,

17 << Kɛɛ, maa yɛɛ

adido wɔle na tɛɛle wɔle.

Bɔɔ gyae baa tɔɔse gyaŋgba nombia ŋan,

yaa baa gyueŋ ŋa bela ya.

18 Mɔna dɛɛ yɛɛ ŋon gyoŋ na ɛ ke nyaŋee kekpaakekpaa,

lee keŋ maa yɛɛ nɛ dɔɔ,

nawolo nyi maa yɛɛ Yerusalɛm na ka ke yɛɛ sia kagye,

te ɔ balaŋ baa nyaŋee.

19 Maa nyaŋee lee Yerusalɛm dɔɔ

na me sia kagye lee ɔ balaŋ dɔɔ,

bɔɔ gyae baa tekaa nyii,

kewii na kayeyɛɛ yeesa be man bela ya.

20 <<Bɔɔ gyae baa tekaa naa

biikyaa ŋon ɔ te kyaa kelii ɔ weeya ɔto,

yaa kegyia ŋon ɔ be gyae waa kyaa kelii ɔ kulutooneŋ ɔto ya.

Ŋon waa di kulutooneŋ sɔŋonoŋ pɛte waa yeŋ na,

baa kɛɛ e ŋgba biikyaa nɛ.

te ŋon ɔ te nyiŋ kulutooneŋ sɔŋonoŋ ya te ɔ yem na,

baa kɛɛ ɔ yeŋ kenaŋ ŋgba kefaala nɛ.

21 Baa baŋee denɛɛ na baa kyaa ŋe man,

baa fara gerepo wɔɔse na baa di ŋe bia.

22 Bɔɔ gyae baa tekaa baŋee denɛɛ na baale ke kyaa ŋe man,

yaa baa duu na baale ke di ya.

Nawolo nyi mena keŋ daŋ na seŋ kyare nɛ,

mena te me balaŋ baa kyaa kyare,

me balaŋ baŋ mɔɔ lese nɛ baa di

lee ba tomse man.

23 Be kaale be gyae ke yɛɛ yakaa,

yaa baa lola bia baŋ be dana nyeekum ya,

Nawolo nyi baa yɛɛ balaŋ baŋ Degbeŋgyoo be hiraa,

baŋna be duuluŋman balaŋ.

24 Maa kpa wɔ pɛ baa baake maŋ,

bɛɛ kolosi na me te wulaa nyii.

25 Gbougbou na nam baa di debodokoloŋ,

dinaate waa tao ŋale ŋgba nunkyue baale nɛ,

te tɛɛle gyae ke yɛɛ dom weenɛɛ.

Bɔɔ gyae baa yɛɛ kolo kum yaa baa wɔlɛɛ

me bula fereŋkyeŋ keŋ dɔɔ ya,>>

Degbeŋgyoo yakola.