1 Amɔte lɛɛna de nombia do,

amɔte te Degbeŋgyoo lese ɔ doŋ wola?

2 Ɔ beewɔ Degbeŋgyoo siaman ŋgba mena keŋ ŋaale wɔlɛɛ ne tuu nɛ,

ŋgba mena keŋ lili ne bɛɛ lee tɛɛle dowolo man nɛ.

Ɔ be dana kyeo yaa obuo na ke gyɔ daa loo ya,

te mena keŋ ɔ wɔɛ nɛ bɛɛ gyɔɔ daa loo na dɛɛ gyae e ya.

3 Balaŋ doo e desɛŋ te be bɛɛ e,

Ɔ yɛɛ baale ŋon ɔ be naa diyem te ɔ be nyii weeleŋ.

Ŋgba walaŋ ŋon balaŋ ba mo be sia weese e nɛ,

de bɛɛ e te de te bu e do kolo man ya.

4 Ampaŋ ɔ moo da weeleŋ,

te ɔ seele de kaale,

mɔna de kɛɛ e nyi Wurubuarɛ wɔŋana ɔ deŋele,

be tuku e te be naase e diyem.

5 Mɔna de dukum dɔɔ te ba doo e gyamɛɛ,

de nombiakumɛɛ dɔɔ be naŋa e nideli,

Ba moo deŋele kewɔŋ keŋ ba mo wosefɛɛreŋ kɔna daa nɛ gyakaa ɔ dɔɔ,

te ɔ gyamɛɛ man te de nyiŋa kawee kekyɔ.

6 De popou ta yoo gbɛɛ ŋgba namense nɛ,

de man walaŋ kamasɛ ta mo ɔ gbɛɛ,

te Degbeŋgyoo moo de

nombiakumɛɛ pou gyakaa ɔ dɔɔ.

7 Ba ŋere e do te be naase e diyem,

mɔna ɔ te gyuusu ɔ nɔɔ ya,

ba moo e ŋgba nambu ŋon bee gyu ba kaa ko nɛ,

ŋgba nam ŋon bɛɛ kɛrɛɛ ɔ wona na sem yididi nɛ,

mena te ɔ te gyuusu ɔ nɔɔ ya.

8 Ba ŋere do di ɔ nombia te ba moo e laŋ,

mɔna ɔ duuluŋman walaŋ ŋolo te famenɛna e ya.

Nawolo nyi be ta lese e gyu ka ko,

lee me balaŋ dukum dɔɔ be wɔŋa ɔ deŋele.

9 Be wula ɔ yebɔɔ kpuna akpanyanyaŋtena,

te be wuu e kpuna kɔbatena,

mɔna ɔ te yɛɛ dukum daale,

yaa dii dekara daale ya.

10 Mɔna ke yɛɛ Degbeŋgyoo kegyae ke nyi baa naŋ e na waa naa diyem,

Doo nyi Degbeŋgyoo moo e yɛɛ kedeesa fa dukum,

mɔna waa naa ɔ duuluŋman balaŋ na ɔ weeya ka bo,

te waa yɛɛ Degbeŋgyoo kegyaebii.

11 Ɔ kaale wɔle nɛ,

waa naa nyeedoŋ keŋmaŋee keŋ, te ɔ wɔe gyae ke fɛɛ e.

Ɔ nombia kagyeŋ man te ma somere ŋon ɔ tenɛɛ nɛ waa yela balaŋ burum kedi deŋele,

na waa lɛɛ be nombiakumɛɛ kasolɔ seele.

12 Mena dɔɔ maa fa e dekyae obuo balaŋ man,

te ŋon na balaŋ doŋtena baa kpala yoo abɔɔ.

nawolo nyi ɔ moo ɔ wose see fa yeŋ,

te be kala e kpuna dukum yɛɛra.

Nawolo nyi ɔ moo balaŋ nombiakumɛɛ seele,

te ɔ solawɔ fa balaŋkumɛɛ.