1 Amɔte yɛna kei ŋon ɔ ba lee Edom ɔ ne kɔŋ,

lee Bosera, te ɔ doona kegba keŋ kolo yayam be woli ke nɛ?

Amɔte yɛna kei, ŋon ɔ doona abɔɔ kyeokyeo,

te ɔ dɔŋɛɛ ɔ baalabiiri man nɛ?

<<Maŋ ne gyɔna katenɛɛ dekpeŋkpeŋ

maŋ danaana doŋ keŋ maa tale lɛɛ walaŋ.>>

2 Woŋ dɔɔ te ɛ kegbase yasewɔ,

ŋgba baŋ bɛɛ ŋmaase waen nɛ?

3 <<Maageŋ ŋmaasena waen be dɛɛ ŋmaasee waen man,

ŋolo ta lee tɛɛlese ŋan man kaa kyɔ maŋ ya.

Me sakatee wɔ me baŋ man,

te ma betee wɔ me baŋkum keŋ man.

Be fatabo ŋmateela gyoo ma kegba,

te ke wɔlɛɛ ma abɔɔ pou nɛ.

4 Ke yɛɛ ma deŋele kewɔŋ kom ketɔ wee ke,

ma kelɛɛ kulutoo keŋ te kɔŋ.

5 Me kɛowɔ, mɔna ŋolo be kyaa waa kyɔ maŋ ya.

Doo me nɔɔ nyi ŋolo te kaa kyɔ maŋ ya.

mena dɔɔ maŋ gbagba me baam lɛɛ maŋ,

te me baŋkum yelaa me talewɔ seŋ keŋkeŋ.

6 Me sakatee tɛɛlese ŋan me baŋ man,

me baŋkum man te me yela be dɛɛsewɔ,

te me kyɛɛkee be fatabo woli tɛɛle.>>

7 Maa yako Degbeŋgyoo kegyae keŋ taŋ ɔto ya,

ŋan pou Degbeŋgyoo be yɛɛ fa daa nɛ dɔɔ,

kaboena nyi baa lese ɔ yele.

Ayi, abɔɔ kpaakpaa burum ŋan,

ɔ be yɛɛ fa Iseraetena,

lee ɔ kaboele na ɔ kegyae keŋ taŋ ɔto ya nɛ dɔɔ.

8 Degbeŋgyoo kpa nyiaa, <<Ampaŋ, be yɛɛ me balaŋwɔ,

bia baŋ bɔɔ gyae baa beo maŋ ya,>>

mena dɔɔ ɔ kaa bese ba nyeelɛɛre.

9 Ŋon mɔ kaawɔ kpuna wɔ be kaale kena pou man,

te Wurubuarɛ kpilare ŋon ɔ ne tɛɛ ɔ dɔɔ yɛɛ tom nɛ lɛɛ wɔ.

Ɔ kegyae na ɔ waraŋase kewii man te ɔ lɛɛ wɔ,

ɔ gyinaa wɔ adido te ɔ moo wɔ ta,

gyaŋgba ba keta pou man.

10 Mɔna be yɛɛ deŋele doŋ,

te be yelaa ɔ Feliŋ Fereŋkyeŋ ŋon yɛɛ waraŋase.

Mena dɔɔ ɔ kyɛɛkee wa nyeempɔ bese be kɔlare,

te ŋon gbagba yoo wɔ.

11 Botɔɔ te ɔ balaŋ tɔɔse gyaŋgba keŋ,

Mosesi na ɔ balaŋ debaŋ keŋ bɔɔse nyiaa,

Nde namensekɛɛlere ŋon ɔ ba lese ɔ namense

te ɔ ba mo wɔ ta ɛpo man nɛ?

Nde ŋon ɔ be kpila

ɔ Feliŋ Fereŋkyeŋ ŋon kpuna wɔ nɛ,

12 ŋon ɔ be kpila ɔ gyoorobiiri baam doŋte keŋ,

nyi ke dɛɛ doo Mosesi dunoluŋ dɔɔ,

ŋon ɔ be kpala loŋse man be siaman

na ɔ yele kedoo kekpaakekpaa,

13 ŋon ɔ ba mo wɔ ta leeneŋ man nɛ de?

Be yɛɛ ŋgba dɛɛkyɔŋ ŋon ɔ doŋ ɔ ne kili depampaa man nɛ,

ba te gyɔ be nae ya,

14 Degbeŋgyoo Feliŋ ŋon yelaa be fɛɛfowɔ,

ŋgba nunkyue ŋon ɔ be gyu kefula man nɛ.

Nnɛ yaa n wola n balaŋ gbɛɛ,

na n ka mo lɛɛ gyoorobiiri yele fa n wose.

15 Tisina n nyee lee adido na n ke kɛɛ,

lee n gyooro dekyae fereŋkyeŋ keŋ korɛɛ nɛ.

Nde n kegyae nideli na n doŋ keŋ?

N ta mo n wɔe na n waraŋase kewii weese daa.

16 Mɔna nyaŋ yɛna de kya,

Doo nyi Aberaham ba gyeŋ daa,

yaa Iserae bɛɛ gyene daa ya,

nyaŋ, Degbeŋgyoo yɛna de kya,

N yele yɛna de lɛɛre leenaŋ gyaŋgba.

17 Ao Degbeŋgyoo, woŋ dɔɔ te n yelaa da yoowɔ lee n gbɛɛneŋ man

te de yɛɛ de konɔɔyuŋ na dɔɔ mo obuo fa neŋ ya?

Bese kɔŋ lee n somera dɔɔ

na nya akpaŋalaŋse ŋan ŋe yɛɛ n dedii nɛ dɔɔ.

18 N dekyae fereŋkyeŋ keŋ doowɔ n balaŋ nyiŋmaa man debaŋ kyomii,

mɔna nɛnɛɛ de kɔlara te sakatee n dekyae fereŋkyeŋ keŋ.

19 De yɛɛ n wui leenaŋ gyaŋgba,

mɔna baŋ dɔɔ n te di gyoori be dɔɔ ya,

ba te baake n yele gyakaa be dɔɔ ya.