Yesaya 15

Keyakosee tia Moabe

1 Keyakosee tia Moabe,

ba te yɛlɛɛ Are keŋ kyaa Moabe,

nelim dokoloŋ te be wɔlɛɛ ke.

ba te yɛlɛɛ Kiri keŋ kyaa Moabe,

nelim dokoloŋ te be wɔlɛɛ ke.

2 Dibon ta gyem gyu wɔ ɔsom deni dinaa man,

ɔ te gyu ɔ bulasebia nyee dɔɔ ɔ kaa wii.

Moabe ne wii keŋkeŋ lee Nebo na Medeba dɔɔ.

be popou te gbee ba nyeeya,

te be gbee nɔɔfata kamasɛ.

3 Be wuu titirese abɔnterese man,

be popou lɔɔ nɔɔ,

be denɛɛ nyeeya dɔɔ na be dɛɛgyaŋeese man,

ba teneewɔ doo na bee wii.

4 Hɛsebon na Eleale ne lɔɔ nɔɔ,

ba woya ne lii naŋ Yahase.

Mena dɔɔ Moabe yoonɔɔtena ne lɔɔ nɔɔ keŋkeŋ,

te be wɔe lɔɔ wɔ.

5 Mee wii fa Moabe,

ɔ balaŋ te yekii kelii naŋ Soare,

menɛɛ kelii naŋ Egelate Selisiya.

Ba gyeŋawɔ gyu Luhite bula dɔɔ,

bee gyu na bee wii,

ba keta gbɛɛ bee gyu Horonayim nɛ,

ba toroŋwɔ lee mena keŋ bɔɔ wɔlɛɛ dɔɔ.

6 Nimerim loŋse ta yoo pou,

ŋe ŋalese pou ta boto,

ŋalese laŋ nyiŋan te taŋ,

te kolo laŋte te kaa ya.

7 Mena dɔɔ deediise ŋan bɔɔ nyim weese nɛ,

ba seele ŋa ka toŋ kateenaa daase boŋobii keŋ laŋ.

8 Be kewii yeesa lɛɛ Moabe tɛɛle wulu man,

be yeesa liiwɔ naŋ Egelayim,

be katoroŋ liiwɔ naŋ Bea Elim.

9 Fatabose te wulu,

Dimon booneŋ man,

maa bese mo abɔɔ ŋan kela kɛŋa kɔŋ Dimon

dinaate waa kɔŋ Moabetena baŋ bɔɔ yekii nɛ,

na baŋ bɔɔ kaa tɛɛle keŋ dɔɔ nɛ dɔɔ.