1 Ɛmɛɛ tɛɛlese ŋan loŋ be kilisi ŋon, ɛ tei maŋ,

ɛmɛɛ tɛɛlese ŋan ɛ kyaa lemlem, ɛ nyii maŋ.

Degbeŋgyoo baake man pɛte ba lola maŋ,

ɔ doo maŋ yele leenaŋ me naa tɔɔman.

2 Ɔ yɛɛ me nɔɔ ŋgba yoosila keŋ kɛɛ bee nɛ,

ɔ weese maŋ ɔ nyiŋmaa wuluŋ man,

ɔ moo maŋ yɛɛ baŋdaŋ nyeele keŋ kɛɛ bee,

te ɔ moo maŋ weese ɔ gbegya man.

3 Ɔ yako maŋ nyiaa, <<Iserae, n yɛɛ ma somere e,

N man te maa lɛɛ yele.>>

4 Mɔna me yakowɔ nyi, <<Ma te kaa leki,

ma te wɔlɛɛ me doŋ yakaa.

Mɔna keŋ yɛɛ me wui doo Degbeŋgyoo nyiŋmaa man,

te ma komketɔ kyaa Wurubuarɛ gyaŋ.>>

5 Te nɛnɛɛ Degbeŋgyoo kpa,

ŋon ɔ be yɛɛ maŋ me naa tɔɔman nyi maa yɛɛ ɔ somere,

na maa besena Yakɔbe kɔŋ ɔ gyaŋ,

na maa yilaa Iserae kɔna e.

Maa nyiŋ obuo Degbeŋgyoo siaman,

te me Wurubuarɛ yɛna me doŋ.

6 Ɔ kpa nyiaa,

<<Ta yee maŋ keyɛɛ nyi maa mo neŋ yɛɛ ma somere,

na n ke yela Yakɔbe ke kyaa gbeli,

na n ka besena Iseraetena baŋ mɔɔ kaase nɛ kɔŋ ya.

Maa mo neŋ yɛɛ keŋmaŋee fa baŋ ba te yɛɛ Yudatenawɔ ya nɛ,

na ma nyeekelɛɛ ke nyiŋ lii tɛɛle ɔto.>>

7 Nnɛ yaa Degbeŋgyoo,

Lɛɛre na Iserae Fereŋkyeŋte ŋon ne yako,

fa ŋon tɛɛlese bɛɛ mo e yɛɛ kolo ya te bɔɔ bɛɛ e,

fa kegyiise somra baŋ nyiaa.

<<Gyooneŋ baa naa neŋ na baa koro seŋ,

gyoorobia baa naa na baa buŋ neŋ,

lee Degbeŋgyoo ŋon ɔ ne di anokoare nɛ dɔɔ,

Iserae fereŋkyeŋte ŋon ɔ ba lese neŋ dɔɔ.>>

8 Nnɛ yaa Degbeŋgyoo ne yako,

<<Me kaboele debaŋ de lii na, maa kpa neŋ,

te nyeekelɛɛ wee na, maa kyɔ neŋ,

maa kɛɛ n dɔɔ na maa yela,

n ka bese nɔɔkebakesee fa balaŋ baŋ,

na n ke desina tɛɛle keŋ seŋ,

na n ke kpala be deediise benɛɛ ŋan fa wɔ.

9 Na n ke yako yoogbeŋa nyiaa, <Ɛ lee kɔŋ,>

na baŋ be kyaa detiŋtɛɛ man nyi, <Ɛ kɔŋ keŋmaŋee man.>

<<Baa dii gbɛɛ nɔɔman,

na baa nyiŋ weenɛɛ bulasebia ŋan doo yakaa nɛ dɔɔ.

10 Tanam yaa loŋboaneŋ be gyae ka ko wɔ,

yaa depampaa duwulawula yaa weese ke nyakee wɔ ya.

Ŋon ɔ ne wii wɔ nɛ waa wola wɔ gbɛɛ,

na waa ta be siaman gyu loŋse deepue lee gyaŋ.

11 Maa yela me bulase pou ka bese gbɛɛneŋ,

na maa desina me gbɛɛneŋ dinaana.

12 Kɛɛ, baa lee lemlem kɔŋ,

baale baa lee adoyenaŋ, baale baa lee weese dɛɛyalae yenaŋ,

baale baa lee Sinim* tɛɛle man.

13 Ɛmɛɛ adido, ɛ fae yeesa nyaŋee,

nyaŋ tɛɛle, nyaŋee,

ɛmɛɛ bulase, ɛ kpee nɔɔneŋ!

Nawolo nyi Degbeŋgyoo waa kyɔlɛɛ ɔ balaŋ,

na waa wii ɔ balaŋ baŋ bɛɛ naa diyem nɛ.

14 Mɔna Siyɔn kpa nyiaa, <<Degbeŋgyoo te bɛɛ maŋ,

Degbeŋgyoo te wolee maŋ.>>

15 Alo waa tale wolee ɔ bu ŋon ɔ ne ŋmase,

te ɔ be wii bu ŋon ɔ ba lolo yee?

Nyi waa wolee e koraŋ nɛ,

maŋ be gyae maa wolee neŋ ya!

16 Kɛɛ, ma te kara n yele do me nyiŋmaatale man,

nya akyaŋse doo me siaman kekpaakekpaa,

17 N bia te yɛɛ ɔsaa bese kɔŋ,

te baŋ bɛɛ wɔlɛɛ neŋ baa gyu lemlem.

18 Gyina n sia na n ke kɛɛ gyaŋee,

n bia pou te yilaa ba wose bɛɛ kɔŋ n gyaŋ.

Degbeŋgyoo ta toro yako nyiaa, <<Maŋ nyiŋaa me kyaa nɛ,

nyaŋ ka do be popou ŋgba kegyaŋase kpaakpaa nyiŋan nɛ,

nyaŋ ke miaa ŋa ŋgba alowɔle nɛ.

19 <<Doo nyi be wɔlɛɛ neŋ te n doowɔ yakaa,

te n tɛɛle doowɔ yakaa koraŋ nɛ,

nɛnɛɛ n ke yɛɛ peperee beiŋ fa n balaŋ,

te baŋ bɔɔ wɔlɛɛ neŋ baa gyu lemlem.

20 Bia baŋ bɔɔ lolo n diyem kena debaŋ nɛ,

baa yako n ke nyii nyiaa,

<Kɛbo ta boo fa daa ya,

gyae botɔɔ keŋ fɛlɛɛ fa daa dɛɛ kyaa.>

21 Keŋte nyaŋ ke bɔɔse n wose nyiaa,

<Amɔte lolana bia kɛwɔ fa maŋ?

me yɛɛ ɔlamanbo e te mee di waraŋsa,

be kyaŋa maŋ yoogbeŋi te be bɛɛ maŋ,

Amɔte kɛɛlena wɔ?

Be tinaa maŋ yela maageŋ,

mɔna aleŋ yaa ba leewɔ kɔŋ?

22 Nnɛ yaa Degbeŋgyoo Doŋ Pou Nyee ne yako,

<<Kɛɛ, maa gyina me nyiŋmaa adido wola tɛɛlese,

maa gyina ma felage wola balaŋ baŋ,

baa tela n bia baala be nyiŋmaase man kɔŋ,

na baa do n bia ala maama kɔŋ.

23 Gyooneŋ baa yɛɛ ɛ bia be kyaɔ,

na ba ala gyooneŋ ke fa wɔ dide.

Baa tisi buŋii ɛ naawɔɔtɛɛ mo be sia buŋ tɛɛle man,

baa deŋee ɛ naawɔɔtɛɛ akuŋkuŋ.

Na ɛ ka gyeŋ nyi maŋ yɛna Degbeŋgyoo,

baŋ ba mo be loo gyakaa me dɔɔ na, desɛŋ be gyae ke kyaŋ wɔ ya.>>

24 Baa tale lɛo yooman abɔɔ lɛɛ yoonɔɔtena gyaŋ,

yaa baa lɛo yoogbeŋa lee doŋte gyaŋ?

25 Mɔna nnɛ yaa Degbeŋgyoo ne yako,

<<Ayi, baa lɛo yoogbeŋa lee yoonɔɔtena gyaŋ,

na baa lɛo yooman abɔɔ lee doŋtena gyaŋ,

Maa yoona baŋ bee yoona ŋon nɛ,

na maa lɛɛ ɛ bia nyee.

26 Maa yela baŋ bɛɛ ŋere ŋon do nɛ ke tao baŋ gbagba be naane,

baa nyɔɔ baŋ gbagba fatabo dɛɛse ŋgba waen nɛ.

Botɔɔ te balaŋ pou baa gyeŋ,

nyi maŋ, Degbeŋgyoo yɛna ɛ nyeelɛɛre,

ɛ lɛɛre, Yakɔbe doŋte ŋon.>>