1 Keyakosee tia Damasekuse,

<<Kɛɛ, Damasekuse be gyae ke yɛɛ donɔɔ dinaa bela ya,

mɔna ke gyae ke yɛlɛɛ.

2 Baa bɛɛ Aroere donɔɔ dinaa keŋ,

na botɔɔ ka bese wonembia dedoi,

keŋ ŋolo be kyaa waa ŋmaase wɔ ya.

3 Dekyaŋ keŋ bɔɔ maa kilisi Ɛferayim donɔɔ dinaa keŋ,

na Damasekuse gyoori doŋ keŋ gyae ke ŋaalaa.

Aramtena akaŋ baŋ baa yɛɛ,

ŋgba Iseraetena gyoorobiiri nɛ,>>

Degbeŋgyoo Dekpataakpere ŋon torola yako.

4 Mena wee kenaŋ Yakɔbe gyoorobiiri gyae ke kɔɔkee,

na ɔ kekpare ke kɔɔkee.

5 Ke gyae ke yɛɛ ŋgba debaŋ keŋ bee tekerii wamela lee ŋe daase aseŋaŋ man,

te bɛɛ gɔɔtaa ŋa be nyiŋmaa man,

ŋgba debaŋ keŋ ŋolo ne gyalase wamela tɛɛle man,

Refayim detaŋgya man nɛ.

6 Mɔna ŋan bɛɛ gyalase tɛɛle man nɛ ŋaale gyae ke ka,

ŋgba mena keŋ be kɔ oliifi bia,

te bia ala yaa atooro ne kaa tombia ŋan doo adido adido man nɛ,

anaara yaa anoŋ ne dɔɔ nɔɔsebia apoteŋ wɔle ŋan man.>>

Degbeŋgyoo, Iserae Wurubuarɛ torola yako.

7 Wee kenaŋ balaŋ baa kɛɛ be yɛɛre gbɛɛ,

na baa besena be sia tee Iserae fereŋkyeŋte ŋon.

8 Bɔɔ gyae baa kɛɛ kedeesaboya,

ŋan bɔɔ mo be nyiŋmaase yɛɛ nɛ gbɛɛ ya,

te bɔɔ gyae baa mo bane alo Asera daase,

na oliifi kedeesaboya ŋan bɔɔ mo be nyiŋmaa yɛɛ nɛ yɛɛ kolo ya.

9 Wee kenaŋ be donɔɔse dinaana doŋ nyiŋaŋ ŋan bɔɔ tina yela lee Iseraetena dɔɔ nɛ, gyae ke yɛɛ ŋgba laaneŋ ŋan bɔɔ bɛɛ ŋa nɛ. Ŋe gyae ka bese donɔɔse ŋan be yɛlɛɛ.

10 N te wolee Wurubuarɛ n nyeelɛɛre,

n te tɔɔse n kpanaŋ na n gyeere ya.

Mena dɔɔ nyi n duu daase kpaakpaa nyiŋan,

te n kalaa gerepo woŋse lee tɛɛle wɔle man kaa duu,

11 nyi n yele ŋe de tuu wee keŋ n be buŋ ŋa,

te ŋe da lee kyeŋkyeŋkɔɔse nebo keŋ n be duu ŋa nɛ,

n be gyae n ke nyiŋ kɔ kekɛrɛɛtɛɛ ya,

ke ta bese kawee na weeleŋ keŋ taŋ kekyɔ ya wee.

12 Tɛɛlese burum ŋan ɛ ne muusu nɛ ɛ laako,

ŋɛɛ muusu ŋgba ɛpo kemuusu nɛ,

Balaŋ baŋ bee muusu nɛ baa laako,

bee muusu ŋgba booneŋ dinaana kemuusu nɛ.

13 Doo nyi balaŋ baŋ ne muusu ŋgba loŋse burum kemuusu koraŋ nɛ,

nyi ɔ kalena wɔ na baa yeu gyu lemlem,

ŋgba feliŋ ne gyɔɔna wurase bulasebia dɔɔ nɛ,

ŋgba koloŋoloŋ ne gyɔɔna ŋalese nɛ.

14 Balinɔɔ na gyakoloŋ na gyoo wɔ karatetee.

Tɛɛ kena na ba te lam.

Kei yɛna baŋ bɛɛ ŋmɛɛle daa nɛ wui dedii,

baŋ bee kuu da abɔɔ ne wui dedii.