1 Gyoo Hesekiya kenyii nombia kɛŋa nɛ, ɔ tirii ɔ kegbase te ɔ moo titere wuu te ɔ gyuuwɔ Degbeŋgyoo ɔsom deni dinaa keŋ man. 2 Keŋte ɔ kpila Eliyakim ŋon ɔ ne kɛɛ gyoo dekpaŋalaŋ dɔɔ na be tɔne ŋmarasere Sɛbena na saese kegyiise, gyu Amose bu Wurubuarɛ gbalare Yesaya gyaŋ na be popou doona titere kegbase. 3 Te be yako e nyiaa, <<Hesekiya kpa, Gyɛŋ wee kei yɛɛ wosekekyaŋ na kekalana na desɛŋ kado wee ke, ŋgba mena keŋ woo da do nyee te doŋ be doo baa lola e ya nɛ. 4 Mberem na Degbeŋgyoo n Wurubuarɛ waa nyii nɔɔwoya ŋan yoonɔɔtena kegyia ŋon ɔ gbeŋgyoo Asiriya gyoo be kpili nyi waa mo tee Wurubuarɛ ŋon ɔ kyaa nɛ, na waa kalana e lee nɔɔwoya ŋan Degbeŋgyoo n Wurubuarɛ be nyii nɛ dɔɔ. Mena dɔɔ fane fa balaŋ baŋ bɔɔ kaa nɛ.>>

5 Gyoo Hesekiya kyalabia kekɔŋ Yesaya gyaŋ nɛ, 6 Yesaya yako wɔ nyiaa, <<Ɛ yako ɛ gbeŋgyoo nyi, <Nnɛ yaa Degbeŋgyoo ne yako: Ɛ naa yee nɔɔwoya ŋan ɛ be nyii keŋ Asiriya gyoo tewulɛɛ ba mo fulu maŋ nɛ ya. 7 Ɛ tei maŋ! Maa mo feliŋ daale do ɔ maŋ na waa nyii nombia ŋaale keŋ gyae ke yela waa bese gyu ɔ donɔɔ man. Maa yela baa mo yoosila ko e botɔɔ.>>>

8 Yoonɔɔtena kegyia ŋon kenyii nyi Asiriya gyoo ta lee Lakisi nɛ, ɔ besewɔ te ɔ ke naa gyoo ŋon ne yoona Libena.

9 Saneheribe nyiiwɔ nyi Kuse gyoo Tirehaka * ne kɔŋ ɔ kaa yoo e. Ɔ kenyii mena nɛ ɔ kpila balaŋ nyi baa gyu ke yako Hesekiya nyiaa, 10 <<Yako Yuda gyoo Hesekiya nyiaa, Na yele wurubuarɛ ŋon n na mo n wose lɔ ɔ dɔɔ nɛ ka beo neŋ nyi <bɔɔ gyae baa mo Yerusalɛm do Asiriya gyoo nyiŋmaa man ya.> 11 Kɛɛ, n nyii mena keŋ Asiriya gyooneŋ be yɛɛ tɛɛlese ŋan, be wɔlɛɛ ŋe popou kerekere. Te nyaŋ n ke nyiŋ kelɛɛ? 12 Gosan na Haran na Rɛsɛfe tɛɛlese na Ɛdentena baŋ be kyaa Telasɛre keŋ me naanaɔ be wɔlɛɛwɔ nɛ, be wurubuarɛse talewɔ lɛɛ wɔ? 13 Hamate gyoo yaa Arepade gyoo kyaa aleŋ? Layire na Sefarewayim na Hena na Iwa gyooneŋ kyaa aleŋ?

14 Hesekiya lɛɛ tɔne keŋ lee kpilara baŋ nyiŋmaa man te ɔ kala ke. Keŋte ɔ gyuuwɔ Degbeŋgyoo ɔsom deni dinaa keŋ man te ɔ fɛlɛɛ ke lɔ Degbeŋgyoo siaman. 15 Te Hesekiya fanewɔ fa Degbeŋgyoo nyiaa, 16 <<Oo Degbeŋgyoo Dekpataakpere, Iserae Wurubuarɛ ŋon n kyaa Kerubise dɔɔ, nyaageŋ yɛna Wurubuarɛ tɛɛle kei gyooridediise pou dɔɔ. Nyaŋ yɛɛna adido na tɛɛle. 17 Ao Degbeŋgyoo, see deŋele na n ke nyii, Degbeŋgyoo, gyuusu n sia na ke kɛɛ. Tei nombia ŋan pou Saneheribe ba mo yelee nyi waa mo kulu Wurubuarɛ ŋon ɔ kyaa kekpaakekpaa nɛ.

18 <<Ao Degbeŋgyoo, ke yɛɛ ampaŋ nyi Asiriya gyooneŋ wɔlɛɛ balaŋ kɛwɔ na be tɛɛle pou. 19 Be fuŋa be wurubuarɛse do boalaŋ man te be wɔlɛɛ wɔ, nawolo nyi ba te yɛɛ wurubuarɛse ya mɔna be yɛɛ daase na boya ŋan denibalaŋ ba mo be nyiŋmaase yɛɛ. 20 Nɛnɛɛ Degbeŋgyoo de Wurubuarɛ, lɛɛ daa lee ɔ nyiŋmaa man, na tɛɛle kei gyooridediise pou ka gyeŋ nyi nyaŋ Degbeŋgyoo nyaageŋ yɛna Wurubuarɛ.

21 Keŋte Amose bu Yesaya kpilawɔ gyu Hesekiya gyaŋ nyiaa, <<Nnɛ ya Degbeŋgyoo, Iserae Wurubuarɛ ne yako, <<Keŋ n be fane fa maŋ lee Asiriya gyoo Saneheribe wose man dɔɔ, 22 kei yɛna nombii keŋ Degbeŋgyoo be kolosi tia e,

<<Siyɔn alebu keteŋ,

na mo n sia tiu tɛɛle na ɔ na boŋo neŋ,

Yerusalɛm bu alebu

ne kpiisi ɔ nyee n wɔle kulu neŋ.

23 Amɔte yaa n teewɔ te n fuluwɔ?

Amɔte dɔɔ yaa n gyinaa n woya tia,

te n gyinaa n siabia adido wose kegate man?

Tia maŋ Iserae fereŋkyeŋte ŋon!

24 N tɛɛwɔ n tewulɛɛ dɔɔ,

kulu Degbeŋgyoo,

te n yakowɔ nyiaa,

<Maa mo ma anebiliŋiŋse burum,

Me ta gyem gyu bulase nyeeman,

Lebanɔn bula dɔɔloŋte nyeeman

ma te kɛrɛɛ sida daase dɔɔloŋ nyiŋan,

na kateenaa daase kpaakpaa nyiŋan,

me te lii ka nyeeman adido adido,

ke laa kpaakpaa keŋ man.

25 Me wula atiribuŋse tɛɛlese wɔlɛɛ man,

te me nyɔɔ ŋe man loŋ,

ma moo me nawɔɔtale,

yela Igyipite boŋobiise pou yoowɔ.

26 N te nyiita see yee?

Me wulaa yɛɛ ke lee beneŋ beneŋ,

Lee gyaŋgba gyaŋgba te me bake ke,

nɛnɛɛ te me yelaa ke kɔŋawɔ mena,

nyi n te yele donɔɔse ŋan bɔɔ baŋ akyaŋse kilisi ŋa nɛ

ta bese boya ŋan bɔɔ yilaa see.

27 Ke man balaŋ doŋ te taŋ,

ba wose te gbirisi wɔ te desɛŋ kyaŋa wɔ.

Be yɛɛ ŋgba ŋale man apoŋfase nɛ,

ŋgba ŋalese wɔlɛɛ ŋan ŋɔɔ potee nɛ,

ŋgba ŋalese na potee deni nyeedɔɔ,

na weese te nyakee ŋa nɛ.

28 <<Mɔna ma gyeŋ n kekyaabii man,

na n kee gyu na n kɛɛ kɔŋ,

na mena keŋ n ba koro seŋ tia maŋ.

29 Keŋ n ba koro seŋ tia maŋ,

na keŋ n wose kegate be lii ma deŋela man dɔɔ,

maa mo me darawaa do n memɔɔ man,

na maa mo me kɔla do n nɔɔ dokɔŋ,

na maa yela n ka bese

mo gbɛɛ keŋ n ba mo kɔŋ nɛ ta.>

30 <<Hesekiya, kei gyae ke yɛɛ kagyene fa neŋ,

<<Kulutoo kei ɛ ke di weenɛɛ ŋan be tuu ŋa wose dɔɔ,

kulutooneŋ alate man na ɛ ke di duwulu man weenɛɛ.

Mɔna kulutoo atoorote man na ɛ duu na ɛ ke kɔ,

ɛ fara gerepo wɔɔse na ɛ ke di ŋe bia.

31 Baŋ bɔɔ kaa Yuda tɛɛle man nɛ,

baa baŋ lila na baa se bia.

32 Balaŋ akaŋ baŋ baa lee Yerusalɛm,

na baŋ bɔɔ nyiŋ nyeedoŋ nɛ ka lee Siyɔn bula dɔɔ.

Degbeŋgyoo Dekpataakpere ŋon kegyae nideli,

gyae ke yɛɛ kei.

33 Mena dɔɔ nnɛ yaa Degbeŋgyoo ne yako lee Asiriya gyoo wose man,

<<Ɔ be gyae waa gyoo donɔɔ dinaa kei man,

yaa waa tɔ baŋdaŋ kɛbo ya.

Ɔ be gyae waa mo nyeele pampasaŋ kɔŋ ke gyaŋ,

yaa waa tɔ wɔ do ya.

34 Gbɛɛ keŋ dɔɔ ɔ ba mo kɔŋ nɛ te waa bese mo ta,

ɔ be gyae waa gyoo donɔɔ dinaa kei man ya,>>

Degbeŋgyoo torola yako.

35 <<Maa seŋ donɔɔ dinaa kei wɔle na maa lɛɛ ke,

lee daa na me tobaale Dawide dɔɔ!>>

36 Keŋte Degbeŋgyoo kpilare ŋon leewɔ gyu ka koe balaŋ kakpoŋse sɔŋogyanaara na anoŋ (185,000) lee Asiriyatena baŋ deyilae kyaa man. Tɛɛ kena nebo ba kefoŋii nɛ, na woya baŋ dokiilaa. 37 Mena dɔɔ Asiriya gyoo Saneheribe leewɔ be deyilae kyaa keŋ man. Ɔ besewɔ gyu Niniwe te ɔ ke kyaawɔ botɔɔ.

38 Wee dokoloŋ ɔ kekyaa ɔ wurubuarɛ Niseroke deni man ɔ na som nɛ, ɔ bia tewulɛɛ bala Aderamɛlɛke na Sarɛsɛle moo yoosila kaa ko e, te be yeuwɔ gyu Ararate tɛɛle man. Te ɔ bu Esaradon kaa dii gyoori ɔ nawɔɔ man.