1 <<O ɔlamanbo, kpee nɔɔneŋ,

Nyaŋ ŋon n ta lolo see ya,

gyoo nɔɔneŋ kekpee na n ke fae kenyaŋee yeesa,

nyaŋ ŋon n ta doŋee see ya,

nawolo nyi alo ŋon bɔɔ bɛɛ e nɛ bia boe,

kela alo ŋon ɔ dana baale,>>

Degbeŋgyoo yakola.

2 Fɛlɛɛ n kanyaŋ deni

wɔŋ n deniman patisanse fɛlɛɛ,

naa bɔ ke do ya

yela n ŋmeleŋ ke yɛɛ dɔɔloŋ

yela nya akparadaase ke yɛɛ doŋ.

3 Nawolo nyi n ke fɛlɛɛ gyu dunoluŋ na demena,

n duuluŋman balaŋ baa gegi tɛɛlese,

na baa kyaa be donɔɔse dinaana ŋan bɔɔ yɛlɛɛ nɛ man.

4 <<Na yee ya, desɛŋ be gyae kekyaŋ neŋ ya.

Na yee desɛŋ ya, bɔɔ gyae baa wuritii neŋ bela ya.

N ke wolee nyaŋ alebiiritɛɛ desɛŋ

te n be gyae n ke tɔɔse n wose kekyaŋ debaŋ keŋ n yɛɛ lialo e nɛ bela ya.

5 Nawolo nyi n yɛɛre yɛna n baale,

Degbeŋgyoo Dekpaatakpere yɛna ɔ yele,

n lɛɛre yɛna Iseraetena Fereŋkyeŋte ŋon,

ɔ yele yɛna tɛɛle pou Wurubuarɛ.

6 Degbeŋgyoo waa bese baake neŋ kɔŋ,

ŋgba alo yalale ŋon bɔɔ bɛɛ e, te wa awoya man be tekerii e nɛ,

ŋgba alebu ŋon bɔɔ yala e,

te ɔ baale be tina e yela nɛ>> N Wurubuarɛ yakola.

7 <<Me yela neŋ debaŋ kyomii,

mɔna maa mo me waraŋase kewii besena neŋ kɔŋ.

8 Me baŋkum keŋ man,

te ma moo me sia weese neŋ kyomii,

mɔna kegyae kekpaakekpaa keŋ dɔɔ

maa wii neŋ,>>

Degbeŋgyoo n lɛɛre ŋon yakola.

9 Kei ne yɛɛ maŋ ŋgba Nowa debaŋ keŋ nɛ,

keŋ mɔɔ kaŋ ntam nyi loŋ be gyae ka tekaa wuu tɛɛle bela ya nɛ.

Mena te me kaŋa ntam nyi mɔɔ gyae ma tekaa gyeŋ baŋ do neŋ ya,

mɔɔ gyae maa kalana neŋ bela ya.

10 Nyi akpaa bulase de wosi,

te bulasebia de kulii koraŋ nɛ,

ma kegyae keŋ taŋ ɔto ya nɛ be gyae ke wosi,

yaa ma lese ma wosefɛɛreŋ nɔɔkebakesee keŋ ya.>>

Degbeŋgyoo ŋon ɔ ne wii neŋ nɛ yakola.

11 O donɔɔ dinaa keŋ n be naa diyem te feliŋ be gyɔ neŋ te ŋolo te fɛɛ n wɔe ya,

maa bese desina mo boya koyadoŋ nyiŋan * baŋ neŋ

na maa mo Lapise lasuli boe see n mokɔɔ

12 Maa mo boya yayama koyadoŋ nyiŋan ma n dekagya nyeeman,

maa mo boya ŋan ne ŋalakee nɛ yɛɛ nya anaanɔɔse,

na maa mo boya koyadoŋ nyiŋan baŋ nya akyaŋse.

13 N bia pou baa yɛɛ Degbeŋgyoo kaseera,

Te ba wosefɛɛreŋ gyae ka bo nideli.

14 N ka seŋ keŋkeŋ katenee man,

baŋ bɛɛ ŋere balaŋ do nɛ ba kyaa naŋ lem lee n gyaŋ.

n be gyae n ke yee kolo ya.

gyakoloŋ gyae ke kyaa naŋ lem,

ka be gyae kaa benaa neŋ ya.

15 Akpaa ŋolo de gyae neŋ kale na, na maŋ kpilana e ya.

ŋon ɔ gyae neŋ kale na, n ke di ɔ dɔɔ.

16 Kɛɛ, maŋ yɛɛna nyeelaluure,

ŋon ɔ ne feefu nyewalaŋ te kɛɛ kpaa,

te ɔ ne luu yoo abɔɔ ŋan ne hia fa ɔ tom,

Te maŋ yɛɛna wɔlɛɛre ŋon nyi waa wɔlɛɛ abɔɔ.

17 Yoo abɔɔ kamasɛ keŋ baa luu tia neŋ be gyae ke de ya,

te nyaŋ ke bu laakem kamasɛ keŋ gyae ka koro seŋ tia neŋ nombia dedii man nɛ fɔɔ.

Kei yɛna Degbeŋgyoo somera dedii,

te kei yɛna be deŋele kedi lee me gyaŋ.>> Degbeŋgyoo torola yako.