1 Depampaa na tɛɛle dowolo baa di gyoŋ,

depampaa gyae ke nyaŋee na ka potee,

ŋgba dekpaotɛɛ kyeŋkyeŋkɔɔse nɛ, 2 ke gyae ka lese kyeŋkyeŋkɔɔse,

ke gyae ke nyaŋee nideli na ke fae yeesa nyaŋee,

baa mo Lebanɔn gyoorobiiri fa e,

Kamɛle na Saron kyeo fa e,

baa naa Degbeŋgyoo gyoorobiiri,

na de Wurubuarɛ doŋ.

3 Ɛ do nyiŋmaase ŋan be yɔkɔse nɛ doŋ,

ɛ do doona ŋan ne seree nɛ doŋ,

4 Ɛ yako baŋ be wɔe ne lɔ wɔ nɛ nyiaa,

<<Ɛ seŋ keŋkeŋ, ɛ na yee ya,

ɛ Wurubuarɛ waa kɔŋ,

waa mo deŋele kewɔŋ kɔŋ,

kpuna ka komketɔ,

waa kɔŋ kaa lɛɛ ɛ nyee.

5 Kenaŋ na siayɛlɛɛsatena sia gyae ke gyuusu,

na deŋela atɔɔsatena deŋela ke nyii.

6 Botɔɔ te ɔtakasese baa toŋee ŋgba ŋaase nɛ,

na omumuuse laakem ke fae yeesa nyaŋee.

Loŋ gyae ke puu lee depampaa man,

na boŋobiise ka toro depampaa man.

7 Aŋasa ŋan ne kpaa gyae ka bese depaa,

na boŋobiise ke puu lee tɛɛle dowolo man,

botɔɔ keŋ nafɔ yɛɛ gbougbouse dedoi nɛ,

ŋalese na moro na apoŋfase gyae ke tu botɔɔ.

8 Gbɛɛ dinaa gyae ke doo botɔɔ,

baa baake ke nyi gbɛɛ fereŋkyeŋ,

ke gyae ke doo fa baŋ bɛɛ ta mena gbɛɛ kenaŋ nɛ,

baŋ ba wose dana ayimɛɛ be gyae baa ta ke dɔɔ ya,

ayiŋtena koraŋ be gyae baa yo ke dɔɔ ya.

9 Dinaate be gyae waa kyaa botɔɔ,

yaa wonembukum ŋolo ke kyaa botɔɔ ya,

bɔɔ gyae baa naa wɔ botɔɔ ya.

Mɔna baŋ bɔɔ lɛɛ wɔ baageŋ ne gyaela baa ta botɔɔ.

10 Baŋ Degbeŋgyoo be lɛɛ wɔ baa bese kɔŋ.

Baa mo nɔɔneŋ kekpee gyoo Siyɔn,

baa mo kenyaŋee kekpaakekpaa kotɔtɔɔ wuu ba nyeeya,

baa di gyoŋ na baa nyaŋee nideli,

baa wolee waraŋase kedi na kemutii.