Yesaya 47

Babilɔn keyala

1 Tisi gyu, ke kyaa akuŋkuŋ man,

Babilɔn alebu keteŋ,

kyaa tɛɛle man, keŋ gyoorogbeli be doo ya,

Babilɔn alagyoo donɔɔ dinaa*47:1 Kaledeyan,

Bɔɔ tekaa baake neŋ nyi,

kyeo yaa alebu ya.

2 Mo naŋboe na n ke naŋ biliŋ,

lese n siagbɛɛ kanyaŋbii keŋ,

gyina n kegba adido, lese n yiineŋ,

na n ka toŋ booneŋ.

3 N deteŋteli gyae ka lee debɔɔ,

na baa naa n desɛŋ.

Maa wɔŋ deŋele tɔ kom,

mɔɔ gyae maa tina ŋolo yela ya.>>

4 De lɛɛre yɛna Iserae Fereŋkyeŋte ŋon,

ɔ yele yɛna Degbeŋgyoo Dekpataakpere.

5 <<Nyaŋ Babilɔn alagyoo donɔɔ dinaa,

kyaa yididi na n ke gyu detiŋtɛɛ man,

bɔɔ tekaa baake neŋ nyi,

gyooridediise alagyoo bela ya.

6 Ma gyeŋa baŋ do me balaŋ,

me walaa me dedii,

ma moo wɔ do ɛ nyiŋmaa man,

te ɛ te wii be waraŋase ya.

Ba akpegyiina koraŋ,

ɛ moo kasolɔse ŋan dana yuŋ nideli gyakaa be dɔɔ.

7 N yakowɔ nyiaa,

<Maa yɛɛ alagyoo kekpaakekpaa.>

Mɔna n ta gyoo nombia kɛŋa man kɛɛ,

yaa n ka gyueŋ keŋ gyae ke kɔŋ man ya.

8 Nɛnɛɛ tei, nyaŋ ŋon n ne gyae gyoŋ kedi,

n kyaa wosefɛɛreŋ man,

te n ne yako n wose nyi,

<Maŋ kyaala, ŋolo be kyaa me wɔle bela ya,

mɔɔ gyae maa kyaa lialo man,

yaa me bia ka yekee ya.>

9 Abɔɔ ala kɛŋa gyae ke kɔŋ n dɔɔ,

deboman, wee dokoloŋ,

n bia baa yekee na n ke kyaa lialo.

Keŋ na n gbalara burum,

na n ŋmeeseŋ pou wɔle nɛ,

ŋe gyae ke kɔŋ n dɔɔ nideli.

10 N ta mo n wose lɔ nya akpanyanyaŋ keyɛɛ dɔɔ,

te n yakowɔ nyiaa, <Ŋolo bɛɛ naa maŋ ya.>

N nyansa na n nombia kagyeŋ beo neŋ,

te n yako n wose nyiaa,

<Maŋ ŋonaŋ, ŋolo be kyaa kpuna maŋ ya.>

11 Nombiikum gyae ke yala neŋ,

te n be gyae n ka gyeŋ mena keŋ n ke tɔ ke gbɛɛ ya.

Kayeyɛɛ gyae ke yala neŋ,

keŋ n be gyae n ke tale pataa ke ya,

kayeyɛɛ keŋ n loo be gyakaa ke dɔɔ ya,

gyae ke yala neŋ dɔɔ karatetee dokoloŋ.

12 Kyaŋ n magyigi,

na n ŋmeeseŋ burum ŋan,

n be kaa gyae lee n biatɛɛ nɛ man nideli.

Mberem gyae ke de fa neŋ,

mberem n ka mo ŋmaase baale.

13 Nyeempɔse ŋan pou n be lɛɛ nɛ te takaa neŋ.

Yela baŋ ba gyeŋ adido abɔɔ wose man nɛ ka lee kɔŋ,

baŋ bɛɛ gyene kyolobiise yako keŋ gyae kekɔŋ gyaalaŋ na gyaalaŋ nɛ,

yela baa lɛɛ n nyee lee keŋ gyae ke kɔŋ n dɔɔ nɛ man.

14 Kɛɛ, be yɛɛ ŋgba kaase nɛ,

boalaŋ gyae ke kpa wɔ.

Bɔɔ gyae baa tale lɛɛ ba wose,

lee boalaŋ laakemse ŋan man ya.

Ŋa te yɛɛ boalaŋ na nyewalaŋ keŋ baa woli ya,

ka te yɛɛ boalaŋ keŋ baa kyaa ke tɛɛ ya.

15 Mena te baŋ pou ɛmɛɛna wɔ be tɛɛ,

te ɛmɛɛna wɔ be kaa leenaŋ n biatɛɛ nɛ,

baa yɛɛ neŋ.

Walaŋ kamasɛ ta mo ɔ gbɛɛ,

ŋolo be kyaa keŋ waa tale lɛɛ neŋ ya.