Ang Parusa sa Jerusalem at Juda
1 Makinig kayo!
Kukunin ng Panginoon,
ang Panginoon ng mga Hukbo,
ang lahat ng inaasahan
ng mga taga-Jerusalem at taga-Juda:
ang pagkain at tubig nila,
2 ang mga bayani at mga mandirigma,
mga hukom at mga propeta,
mga manghuhula at mga pinuno,
3 mga kapitan ng mga hukbo
at mga mararangal na tao,
mga tagapayo
at ang mga bihasang salamangkero3:3 salamangkero: O karpintero. nila
at mga dalubhasa sa paggayuma.
4 Gagawin kong kanilang pinuno
ang mga binatilyo,
at ang mga musmos na bata
ang mamamahala sa kanila.
5 Aapihin ng mga tao ang bawat isa,
bawat isa laban sa kanyang kapwa.
Lalabanan ng mga bata ang matatanda,
at lalabanan ng mga hamak
ang mararangal.
6 Susunggaban ng isang tao
ang kanyang kapatid
sa bahay ng kanyang ama at sasabihin,
"May damit ka pa, kaya ikaw na
ang mamuno sa amin;
Pamahalaan mo itong wasak na lugar."
7 Ngunit sa araw ding iyon
ay sasagot ang kapatid niya,
"Hindi ako ang lunas nito.
Wala rin akong pagkain
o damit sa bahay,
kaya huwag ninyo
akong gawing pinuno ninyo."
8 Sapagkat bumagsak na ang Jerusalem at Juda,
dahil ang kanilang mga salita at gawa
ay laban sa Panginoon.
Nilalapastangan nila
ang kaluwalhatian
ng kanyang presensya.
9 Halatang-halata sa kanilang mga mukha
ang kanilang pagkakasala.
Hayagan silang gumagawa
ng kasalanan tulad ng Sodoma at Gomora.
Hindi na nila ito itinatago.
Nakakaawa sila!
Sila na mismo ang nagpapahamak
sa sarili nila.
10 Sabihin ninyo sa mga matuwid
na mapalad sila,
dahil aanihin nila ang bunga
ng kanilang mabubuting ginawa.
11 Ngunit nakakaawa ang masasamâ,
dahil darating sa kanila ang kapahamakan!
Gagantihan sila ayon sa mga ginawa nila.
12 Inaapi ng mga kabataan
ang aking mga mamamayan.
Pinamumunuan sila ng mga babae.
Mga mamamayan ko,
nililinlang kayo ng mga pinuno ninyo.
Inaakay nila kayo sa maling daan.
13 Nakahanda na ang Panginoon
para hatulan
ang kanyang mga mamamayan3:13 kanyang mga mamamayan: Ito ang nasa Septuagint at Syriac; ngunit sa Hebreo, mga tao..
14 Hahatulan na ng Panginoon
ang mga tagapamahala at mga pinuno
ng kanyang mga mamamayan.
Sabi niya,
"Kayo ang sumira ng aking ubasan.
Ang mga bahay ninyo ay puno ng mga bagay
na sinamsam ninyo sa mga mahihirap.
15 Bakit ninyo inaapi ang aking mga mamamayan
at ginigipit ang mga mahihirap?"
Iyan ang sinabi ng
Panginoon ng mga Hukbo.
16 Sinabi pa ng Panginoon,
"Mapagmataas ang mga babae ng Jerusalem.
Nakataas ang noo habang naglalakad,
malandi kung tumingin,
umiindayog ang balakang sa paghakbang,
pinapakalansing pa ang mga alahas
sa kanilang mga paa.
17 Kaya ang mga kababaihang ito ng Zion
ay magkakapigsa sa kanilang mga ulo;
gagawing kalbo ng Panginoon ang
kanilang mga anit."
18 Sa araw na iyon, kukunin ng Panginoon ang mga alahas sa kanilang paa, ulo, at leeg; 19 mga hikaw, pulseras, belo, 20 mga alahas sa buhok, braso, at sinturon, mga sisidlan ng pabango at mga anting-anting, 21 mga singsing sa daliri at ilong, 22 ang kanilang mga mamahaling damit, mga kapa at mga balabal, mga pitaka, 23 at mga salamin, mga damit na gawa sa pinong lino, mga putong, at mga belo.
24 Ang kapalit ng halimuyak
ay umaalingasaw na amoy.
At ang sinturon nilaʼy
mapapalitan ng lubid;
ang magaganda nilang buhok
ay makakalbo;
ang magagarang kasuotaʼy
mapapalitan ng sako;
ang kanilang kagandahaʼy
magiging kahihiyan.
25 Ang inyong kalalakihaʼy
mamamatay sa digmaan,
ang inyong mga kawal
ay babagsak sa labanan.
26 Pagtangis at pagluluksa
ang pupuno sa pintuan ng bayan,
parang babaeng maglulupasay
sa kanyang kawalan.