Isaías 58

3 Sinasabi pa nila sa akin,

‘Nag-ayuno kami,

ngunit hindi nʼyo man lamang pinansin.

Nagpapakahirap kami,

ngunit binalewala ninyo.’

"Ang totoo, habang nag-aayuno kayo,

ang sarili ninyong kapakanan

ang inyong iniisip.

Inaapi ninyo

ang inyong mga manggagawa.

4 Nag-aayuno nga kayo,

ngunit nag-aaway-away naman kayo,

nagtatalo, at nagsusuntukan pa.

Huwag ninyong iisipin na

ang ginagawa ninyong pag-aayuno ngayon

ay makakatulong para dinggin ko

ang inyong dalangin.

5 Kapag nag-aayuno kayo,

nagpepenitensya kayo.

Yumuyuko kayo

na parang mga damong kugon.

Nagsusuot kayo ng damit na panluksa*58:5 damit na panluksa: Sa Hebreo, sakong damit.

at humihiga sa abo.

Iyan ba ang tinatawag ninyong ayuno?

Akala ba ninyoʼy nakakalugod iyon

sa Panginoon?

6 Ang ayunong makapagpapalugod sa akin

ay ang ayunong may kasamang

matuwid na pag-uugali.

Tigilan ninyo ang paggawa ng kasamaan,

pairalin nʼyo na ang katarungan,

palayain ninyo ang mga inaalipin

at ang inaapi ay inyong tulungan.