1 Uru ni rwo rutonde rw’Abisirayeli, bari abakuru b’amazu, abakuru b’ingabo igihumbi, abakuru b’ingabo ijana, n’abakuru batwara abandi, bakorera umwami mu bijanye n’imice y’ingabo baramukirwa gukora uko ukwezi gutashe mu mwaka wose. Umuce wose waba ugizwe n’ingabo ibihumbi mirongo ibiri na bine.

2 Yashobeyamu mwene Zabudiyeli ni we yari ajejwe umuce wa mbere, wari ujejwe gukora mu kwezi kwa mbere. Mu muce wiwe harimwo ingabo ibihumbi mirongo ibiri na bine. 3 Yari uwo mu ruvyaro rwa Perezi kandi yari umukuru yatwara abakuru mu ngabo bajejwe gukora mu kwezi kwa mbere.

4 Dodayi Umwahohi ni we yari ajejwe umuce wo mu kwezi kwa kabiri; Mikiloti ni we yari umukuru w’uwo muce. Uwo muce wari ugizwe n’ingabo ibihumbi mirongo ibiri na bine.

5 Umukuru w’ingabo agira gatatu, yari ajejwe ukwezi kwa gatatu, yari Benaya mwene Yehoyada umuherezi. Yari umukuru kandi umuce wiwe warimwo ingabo ibihumbi mirongo ibiri na bine. 6 Uwo Benaya ni we yari umuhizi muri bamwe mirongo itatu kandi ni we yari umukuru wabo. Umuhungu wiwe Amizabadi yari ajejwe uwo muce wa se.

7 Umukuru w’ingabo agira kane, yari ajejwe gukora mu kwezi kwa kane, yari Asaheli yavukana na Yowabu; umuhungu wiwe Zebadiya ni we yamusubiriye. Mu muce wiwe harimwo ingabo ibihumbi mirongo ibiri na bine.

8 Umukuru w’ingabo agira gatanu, yari ajejwe ukwezi kwa gatanu, yari Shamuhuti Umwizirahi. Umuce wiwe warimwo ingabo ibihumbi mirongo ibiri na bine.

9 Umukuru w’ingabo agira gatandatu, yari ajejwe ukwezi kwa gatandatu, yari Ira mwene Ikeshi w’i Tekowa. Mu muce wiwe harimwo ingabo ibihumbi mirongo ibiri na bine.

10 Umukuru w’ingabo agira indwi, yari ajejwe ukwezi kw’indwi, yari Helezi Umupeloni, Umwefurayimu. Mu muce wiwe harimwo ingabo ibihumbi mirongo ibiri na bine.

11 Umukuru w’ingabo agira umunani, yari ajejwe ukwezi kw’umunani, yari Sibekayi Umuhushati w’Umuzera. Mu muce wiwe harimwo ingabo ibihumbi mirongo ibiri na bine.

12 Umukuru w’ingabo agira icenda, yari ajejwe ukwezi kw’icenda, yari Abiyezeri Umwanatoti, w’Umubenyamini. Mu muce wiwe harimwo ingabo ibihumbi mirongo ibiri na bine.

13 Umukuru w’ingabo agira icumi, yari ajejwe ukwezi kw’icumi, yari Maharayi Umunetofati, w’Umuzera. Mu muce wiwe harimwo ingabo ibihumbi mirongo ibiri na bine.

14 Umukuru w’ingabo agira icumi na rimwe, yari ajejwe ukwezi kw’icumi na rimwe, yari Benaya Umupiratoni, w’Umwefurayimu. Mu muce wiwe harimwo ingabo ibihumbi mirongo ibiri na bine.

15 Umukuru w’ingabo agira icumi na kabiri, yari ajejwe ukwezi kw’icumi na kabiri, yari Heludayi Umunetofati, wo mu muryango wa Otiniyeli. Mu muce wiwe harimwo ingabo ibihumbi mirongo ibiri na bine.

16 Abari abakuru b’imiryango y’Abisirayeli ni aba:

Mu bakomoka kuri Reyubeni: Eliyezeri mwene Zikuri;

mu bakomoka kuri Simeyoni: Shefatiya mwene Mayaka;

17 mu bakomoka kuri Lewi: Hashabiya mwene Kemuweli;

mu bakomoka kuri Aroni: Sadoki;

18 mu bakomoka kuri Yuda: Elihu, yavukana na Dawidi;

mu bakomoka kuri Isakari: Omuri mwene Mikayeli;

19 mu bakomoka kuri Zebuloni: Ishimaya mwene Obadiya;

mu bakomoka kuri Nafutali: Yerimoti mwene Aziriyeli;

20 mu bakomoka kuri Efurayimu: Hoseya mwene Azaziya;

mu bakomoka ku gice c’umuryango wa Manase: Yoweli mwene Pedaya;

21 mu bakomoka ku gice c’umuryango wa Manase kindi c’i Gileyadi: Ido mwene Zakariya;

mu bakomoka kuri Benyamini: Yayasiyeli mwene Abuneri;

22 mu bakomoka kuri Dani: Azareli mwene Yerohamu.

Abo ni bo bari abakuru batwara imiryango y’Abisirayeli.

23 Igihe Dawidi yaharura abantu ntiyaharuyemwo abafise imyaka mirongo ibiri canke batarayishikana, kuko Uhoraho yari yarasezeranye ko azogwiza Abisirayeli ngo bangane n’inyenyeri zo kw’ijuru. 24 Yowabu mwene Zeruwiya atangura guharura abantu ariko ntiyaheza. Uburake buziriringira Abisirayeli kubera ukwo guharurwa, maze ico gitigiri nticandikwa mu gitabu c’ibigenda biraba c’umwami Dawidi.

25 Azimaveti mwene Adiyeli yari ajejwe amazu y’ububiko bw’umwami.

Yonatani mwene Uziya yari ajejwe amazu y’ububiko yari mu ntara, mu bisagara, mu bigwati no ku minara yo gucungererako.

26 Ezuri mwene Kelubi yari ajejwe abakozi bo mu mirima barima mu matongo.

27 Shimeyi w’i Ramati yari ajejwe imirima y’imizabibu.

Zabudi w’i Shifumi yari ajejwe umwimbu w’imizabibu n’ububiko bw’umuvinyu.

28 Bayali-Hanani w’i Gederi yari ajejwe imyelayo n’imisukomora mu gice c’uburengero.

Yowashi yari ajejwe ububiko bw’amavuta ya elayo.

29 Shiturayi w’i Sharoni yari ajejwe inka zarisha i Sharoni.

Shafati mwene Adulayi yari ajejwe amasho yo mu biyaya.

30 Obili Umwishimayeli yari ajejwe ingamiya.

Yehudeya w’i Meronoti yari ajejwe indogoba.

31 Yazizi Umuhaguri yari ajejwe imikuku y’impene n’intama.

Abo bose bari abakuru bajejwe ubutunzi bw’umwami Dawidi.

32 Yonatani, sewabo wa Dawidi, yari umuhanuzi, umugabo w’ubwenge akaba n’umwanditsi.

Yehiyeli mwene Hakumoni yari ajejwe abahungu b’umwami.

33 Ahitofeli yari umuhanuzi w’umwami.

Hushayi umwaruki yari umugenzi w’umwami.

34 Ahitofeli yasubiriwe na Yehoyada mwene Benaya na Abiyatari.

Yowabu yari umukuru w’ingabo z’umwami.