Gênesis 18

23 Ulaimo ngamandikila Bhambo, ngankonya, "Bho, chakaka namakomelekeya bhando bhibhatenda ghambone pamonga na bhanganandela? 24 Pange bhabhii bhando bhibhatenda ghambone makome nhwano umuche gwenio. Bho, namukomelekeya muche gwenio amu namuuleka nhwalo gwa bhando bheniya bhibhatenda ghambone makome nhwano bhubhii umuche gwenio? 25 Ne nihole jhe kubhehe nantenda yene! Kwakoma bhando bhibhatenda ghambone pamonga na bhanganandela, bhambone kwatenda tela na bhanganandela! Yene, jwakutemulana nnema ghoha nakotoka jhe kutenda ilebhe ibhii tela!"

26 Bhambo Chapanga ngannobholila Ulaimo kubhehe, "Chakaka anda nakolii bhando makome nhwalo ku muche gwa ku Sodoma, naniuleka muche ghoha gwa ku Sodoma muteeke kwa nhwalo gwabhe."

27 Ulaimo ngalonge, "Nenga nyogwipe jhe kulonge na mwenga ma Bhambo Chapanga, ne jhupanginwe kuhuma mundope na malio tugha. 28 Pange pihoto kubhehe na bhando bhibhatenda ghambone makome ncheche nu nhwano chehemo jha bhando makome nhwano. Bho, namukomelekeya muche ghoha nhwalo bhapongwii bhando nhwano abha?"

Bhambo Chapanga ngajhangwila, "Niniukomelekeya jhe muche ghoha anda bhabhii bhando bhambone makome ncheche nu nhwano."

29 Ulaimo ngajhendilila kulonge, "Bho, anda bhabhii bhando makome ncheche bhahotwii kubhonekana mwenio."

Bhambo Chapanga ngalongila, "Kwa nhwalo jha bhando makome ncheche bhibhatenda ghambone naniukomelekeya jhe muche gwenio."

30 Ulaimo ngajhendilila kulonge, "Ma Mabhambo, chonde nnyopa mangayome jhe, ne mbakulonge kabhena. Pange jhe nabhabhonekana bhando bhibhatenda ghambone makome matato."

Bhambo Chapanga ngajhangwila, "Nandendi jhe gheniya anda nakolii bhando makome matato bhibhatenda ghambone."

31 Ulaimo ngalonge, "Bhambo nijhopa unyeketelete kulonge na mwenga kabhele. Bho, pange nabhabhonikana bhando bhibhatenda ghambone makome mabhele."

Bhambo Chapanga ngajhangwila, "Kwa nhwalo jha bhando makome mabhele, nikikomelekeya jhe muche gwenio."

32 Kubhoke peniya Ulaimo ngalonge, "Ma Mabhambo ninyopa mangayoma jhe, nambo mbakulonge kibhele chimo tu. Bho, pange nabhabhonekana bhando bhibhatenda ghambone likome limo tugha."

Bhambo Chapanga ngajhangwila, "Kwa nhwalo jha bheniya kome nikikomelekeya jhe muche gwenio." 33 Bhambo Chapanga pajhomolila kulonge nu Ulaimo ngabhokita na Ulaimo hele ngabhujhita kajhake.