Kutumbula 26

Ichaka ahamii ku Gelale

1 Peniya ngaipitila njala mu kilambo chenio, njala jhenio ikibha ngolongwa kupeta njala jhipitila kipinde cha ughome gwa Ulaimo. Ichaka ngajhenda ku muche gwa ku Gelale kwa Abemileke munahota nkolongwa jwa Akafiliste. 2 Bhambo Chapanga ngampitii Ichaka nu kunnobholela, "Mangajhenda jhe ku Michile, nambo ntama mu kilambo chimbakunnobholela. 3 Ntama mu kilambo chenio kwa machiko ghandina, nane nama pamonga na mwenga nukumpe mota. Mana mbakumpe mwenga na ibheluko ino ilambo yenio yoha. Mbakulenganikiya lilaghano linabheka na tate gwino Ulaimo. 4 Mbakujhonjekeya ibheluko ino ibhaha mbwe ngita ndondo ya kunane kwa Chapanga na kwape ilambo henge yoha. Kubhoke mu ibheluko ino ilambo yoha pannema naibhaha na mota. 5 Mbakumpe mota, nhwalo Ulaimo akatembekii na kunyokanikiya na ngakamwila malaghalikilo ghango na mihilo jhango."

6 Peniya Ichaka ngatama ku muche gwa ku Gelale. 7 Bhando bha ku Gelale pubhankonya panane jha nhwanamundo ngalonge, "Bheniya alombo bhango." Nhwalo ajhogwipa kulonge nhwanamundo, abhajhogwipa akolo muche kunkoma kwa nhwalo jha Lebeka, mana Lebeka akibha lembulembu hake. 8 Ichaka ngatamita pala machiko ghamahele, Abimeleke munahota nkolongwa jwa Akafiliste ngalingulii palidilicha ngammona Ichaka ankumbatii Lebeka nhwanamundo.