1 Kumji gwa Samalia kuweriti na wana wapalu sabini wa Ahabu. Yehu kalembiti hamba na kutuma kwa wakolamlima wa mji, kwa walonguziya na wagolokera wa wana wa Ahabu. Luwamba lweni lulonga hangu. 2 "Toziya kwana wana wa mfalumi muwamu mwenu, ntambu iraayi mwana farasi na mbutuka za kukwega na farasi, vintu vya kulikomangira na miji ya maboma, 3 msyaguli na kumlumika yakana uwezu nentu pakati pa wana wa mfalumi kaweri mfalumi, shakapanu mkomangi nkondu kwajili ya kumlolera mfalumi."

4 Wakolamlima wa Samalia watiriti nentu na kulonga, "Tuwezahashi kumkoma Yehu shaka mfalumi Yoramu na mfalumi Ahazia wasinditi?" 5 Su mkulu gwa numba ya mfalumi na mkulu gwa mji, pawawera pamuhera na walonguziya wamonga na walolera, wamjegera Yehu ulagilagi awu. "Twenga twawamanda waku na twakala kutenda shoseri shagulonga. Kumbiti hapeni tumlumiki muntu yoseri kaweri mfalumi, gutendi shaguwona shiheri."

6 Yehu kawalembera hamba zimonga kawagambira. "Payiwera nakaka mwakala kufata malagalira ganeni na mwakala kufata malagalira gangu, mmujegi panu Yazireeli mituwi ya wana wa mtuwa gwenu, niyipati shilawu shaka handa ashi."

Wana sabini wa mfalumi Ahabu walikaliti kwa walonguziya wa Samalia, weni yawaweriti wankulerwa. 7 Su, barua palusokiti wawatoliti wana awa wa mfalumi na kuwalikitula woseri sabini. Watulitwi mituwi yawu mumajamanda na kumjegera Yehu aku Yezireeli.

8 "Shaka ntumintumi yumu kamgendera na kulonga, mituwi ya wana wa mfalumi ijegwa kala. Ndo kalagalira, vitulwi pasi mumafungu mawili kuligomi lya mji, shakapanu mvileki vilikali aku mpaka shilawu mandawira." 9 Mandawira shilawu yakuyi kalawa, kagoloka na kuwagambira wantu woseri, "Mwenga ndo mwahera likosa, guloli neni nimgalambuka mtuwa gwangu na kumalaga, Kumbiti ndo gaa kawalagiti woseri awa? 10 Muvimani handa visoweru vyoseri vyakalongiti Mtuwa Mlungu kuusu kaya ya Ahabu vitendeka. Mtuwa Mlungu kagatenda aga gakalongiti kwa njira ya ntumintumi gwakuyi Eliya." 11 Shakapanu Yehu kalaga kaya yoseri ya Ahabu yaiweriti yankulikala Yazreeli, pamuhera na wakulu wakuyi na waganja na watambika wakuyi, kamlekandiri muntu yoseri kalikali.

12 Shakapanu Yehu kawuka Yezireeli. Kagenda Samalia. Pakaweriti mnjira pahala yapashemwa, lugonjeru lwa Washugaji, 13 Kaliwoniti na walongu wa malahemu Ahazia, mfalumi gwa Yuda kawakosiya. "Mwenga mwashina gaa?" Wamwankula,

"Twenga twawalongu wa Ahazia. Twiza aku kuwakola mawoku wana wa mfalumi na wana wa malikiya." 14 Shakapanu kalonga, "Muwabati pawawera wakomu." Wawabata wantu alubayini na wawili, wawalagira pakwegera na linegu lya liringu lya Washungaji. Kwahera muntu yakasigaliti ata yumu.

15 Yehu kalawa kayi na pakasokiti mnjira kaliwona na Yehonadabu mwana gwa Rekabu, Yehu kamlamusiya, shakapanu kumgambira, "Gwenga gwana maholu teratera na gangu? Hashi, haguweli pamuhera na neni na kuntanga?" Yehonadabu kamwankula, "Yina, haweli pamuhera na gwenga."

Yehu kalonga,

"Su gumpanani liwoku lyaku." Walikolelera mawoku na Yehu kamkweniziya mumbutuka yakuyi. 16 Kamgambira, "Gunfati neni su guwoni ntambu yawera mwaminika kwa Mtuwa Mlungu." Su, wagenda mwanja pamuhera mumbutuka mwakuyi yakukwegwa. 17 Pawosokiti Samaria, Yehu kalagiti walongu wakuyi woseri wa Ahabu pota kumleka ata yumu gwawu. Iwera teratera Mtuwa Mlungu ntambu yakamgambiriti Eliya hayiweli.

18 Yehu kawajonjonira wantu wa Samaria na kuwagambira, "Mfalumi Ahabu kamgendiriti Baali padidini hera, Kumbiti neni hanimtendeli. 19 Guwashemi wambuyi woseri wa Baali, wantumintumi wakuyi woseri na watambika. Ndo mpaka kila yumu kasoki, toziya nfira kumlavilira Baali tambiku nkulu na yoseri yakasinda kusoka hakalagwi." Ayi iweriti ndo galambuka ya Yehu su kapati kuwalaga wantumintumi wa Baali. 20 Yehu kalonga. "Mshemi lijojoniku likulu lya kumguwira mlungu Baali!" Su libweru lilaviwa, 21 na Yehu kajega shisoweru muisi yoseri ya Israeli su wantumintumi woseri wa Baali wasoki kila yumu. Wasoka woseri na kumema nduu munumba ya Baali kulawa pembi yimu mpaka yimonga. 22 Hangu Yehu kamlagalira yakagolokiriti nguwu zazitulitwi gweka za kumguwira mlungu Baali pakalonga, "Gulaviyi nguwu azi na kuwapanana wantu yawasokiti kumguwira mlungu Baali." Mgolokera kalaviya nguwu azi, kawapanana. 23 Shakapanu Yehu kasokiti mulihekalu lya Baali pakalikolana na Yehonadabu na kuwagambira yawaweriti mulihekalu, "Mloli weri handa yawaweriti mnumba nkulu ndo walii yawamguwira Baali hera, na handa kwahera muntu yoseri yakamguwira Mtuwa Mlungu." 24 Shakapanu kingira pamuhera na Yehonadabu kumlavirira Baali malaviwu na tambiku za kulunguziwa tolosu. Yehu kaweriti katula wantu semanini kunja ku numba ayi ya kutambikira na kuwapanana malagaliru aga, "Muwalagi wantu awa woseri. Yoseri yakamleka ata yumu gwawu katugi hakalaguwi yombeli!"

25 Shakapanu Yehu pakamaliliti kulaviya tambiku ya kulunguziwa tolosu, kawagambiriti walolera na wakulu, "Mwingiri mkawalagi woseri. Nammuleka ata yumu katugi!" Wingira kala na magumba gawu na kulaga woseri, shakapanu walaviya shiwembu shawu kunja. Ndo wingira mulihekalu, 26 na kulaviya mpanda yakumguwira Baali na kushilunguziya tolosu kwa motu. 27 Wahalibisiya mpanda ya Baali pamuhera na numba, waigalambula numba iwera showu, hangu ndo ntambu yayiwera mpaka leru.

28 Hangu Yehu ndo ntambu yakawusiyiti kumguwira Baali Muisraeli. 29 Kumbiti kendeleyiti kutenda vidoda handa Yeroboamu mwana gwa Nebati kwa kuwalonguziya Waisraeli watendi vidoda. Katuliti shinyagu sha mwana gwa ng'ombi shipalu gwa zahabu aku Beteli na Dani. 30 Mtuwa Mlungu kamgambira Yehu, "Guwatendera wiwuka wa Ahabu goseri galii ganfiriti guwatenderi. Hangu nikugambiziya kuwera walelwa waku mpaka wiwuka wa msheshi hawakolimlima isi ya Israeli." 31 Kumbiti Yehu kajimira ndiri lagaliru lya Mtuwa Mlungu gwa Israeli, kwa moyu gwakuyi goseri. Yomberi, kafatiti vyakatenditi Yeroboamu kwakuwatenda wantu wa Israeli watenda vidoda.

32 Shaka ashi Mtuwa Mlungu kanjiti kupungula ukulu wa isi ya Israeli. Mfalumi Hazaeli gwa Aramu kapatola pahala pakulu pa isi ya Israeli, 33 kulawa uwega wa kushana wa lushemba lwa Yoridani na isi ya Gileyadi na Gadi na Reubeni na Manase na kulawa Aroeri yaguwera kululalanda lwa Arinoni kuisi ya Gileyadi na Bashani.

34 Mirandu imonga yoseri ga Yehu na vitendu vyakuyi vya ugangamala vilembwa mu Shitabu sha Maholu ga Wafalumi wa Israeli. 35 Na Yehu kahowa na kufintilwa Samalia. Mwana gwakuyi Yehoahazi kakolamlima pahala pakuyi. 36 Yehu kakolitimlima Israeli pakawera kumji gwa Samalia kwa vinja ishilini na nani.