1 Mushinja sha ishilini na tatu sha ukolamlima wa mfalumi Yoashi gwa Yuda, Yehoahazi mwana gwa Yehu kanjiti kukolamlima Israeli, kendereya kukolamlima aku Samaria kwa vinja kumi na saba. 2 Katenditi vidoda palongolu pa Mtuwa Mlungu ntambu yakatenditi mfalumi Yeruboamu mwana gwa Nebati, yakawatenditi wantu wa Israeli watenda vidoda. Yehoahazi kalekandiri matendu aga madoda. 3 Mtuwa Mlungu kakalaliti, kawatenda wantu wa Israeli wasindi kunkondu mala zivuwa na mfalumi Hazaeli gwa Aramu na mwana gwakuyi Beni Hadadi. 4 Yehoahazi kamluwa Mtuwa Mlungu na Mtuwa Mlungu kapikanira maluwa gakuyi pakawoniti mfalumi gwa Aramu ntambu yakawayoniriti wantu wa Israeli. 5 Mtuwa Mlungu kawapanana wantu wa Israeli mlonguziya yakawalopoliti kulawa kwa Waaramu, ndo walikala kwa ponga ntambu yawaweriti mashaka gapititi. 6 Ata hangu walekandiri kutenda vidoda vyeni mfalumi Yeruboamu kawatenda wantu wa Israeli watendi vidoda, nentu ya aga wendereyiti na vidoda vyawu na shinyagu sha wamlungu wa shidala Ashera shashitulitwi aku Samalia.

7 Yehoahazi kaweritindiri na mashonta, ilahera wakwena farasi amusini, mbutuka kumi na lishonta lya magulu elufi kumi. Ayi iweriti toziya ya mfalumi gwa Aramu kaweriti kagagamaziya mashonta ga Israeli na kugaposholanga pasi handa lidikudiku.

8 Matendu gamonga goseri ga Yehoahazi na ugangamala wakuyi galembitwi mu Shitabu sha Maholu ga wafalumi wa Israeli.

9 Yehoahazi kahowiti na kufintirwa aku Samalia na Yehoashi mwana gwakuyi kawera mfalumi pahala pakuyi.

10 Mushinja lwa selasini na saba sha ukolamlima wa Mfalumi Yoashi gwa Yuda, Yehoashi mwana gwakuyi Yehoahazi, kanjiti kukolamlima Israeli aku Samaria na ukolamlima wakuyi wendereya kwa vinja kumi na sita. 11 Yehoashi viraa katenditi vidoda kwa Mtuwa Mlungu na kufata vyakatenditi mfalumi Yeruboamu mwana gwa Nebati mweni kawapotuziyiti wantu wa Israeli. 12 Matendu gamonga goseri gakatenditi Yehoashi, ugangamala wakuyi mu nkondu zyakalikomangiti na mfalumi Amazia gwa Yuda, galembwitwi mu Shitabu sha Maholu ga Wafalumi wa Israeli. 13 Yehoashi kahowiti na kufintirwa mu masembi ga shifalumi aku Samalia na mwana gwakuyi Yeruboamu gwa pili kakolamlima pahala pakuyi.

14 Elisha yakaweriti mbuyi gwa Mlungu kalwaliti ulweri udoda nentu. Pakaweriti layilayi, mfalumi Yehoashi gwa Israeli kamtyangiriti. Pakamoniti Elisha, kaliliti pakalonga, "Tati gwangu, tati gwangu! Gwenga ndo mlolera mkulu gwa Israeli guwuka!"

15 Elisha kamgambira, "Gunjegeli upindi na misali!" Yehoashi kavijega, 16 "Elisha kamgambira kalitandi kuguma misali. Mfalumi kalitanda na Elisha kagatula mawoku gakuyi pampindi pamawoku ga mfalumi." 17 Mfalumi kafata malagalira ga mbuyi gwa Mlungu na kuvugula lidilisha lyaliloliti Aramu. Elisha kamgambira, "Gwasi msali!" Katepu mfalumi pakasiti msali, muntu gwa Mlungu kalonga, "Agu ndo msali Mtuwa Mlungu hakapati ukanka kwa Waaramu. Hagulikomangi na Waaramu yawawera aku Afeki mpaka guwakanki."

18 "Elisha ndo kamgambira mfalumi katoli misali imonga na kuikoma pasi. Mfalumi kaikoma misali pasi mala ntatu, shakapanu koya." 19 Elisha kakalaliti nentu, kamgambira mfalumi, "Hashi gugumandiri mala mhanu ama sita? Hangu haguwalagi Waaramu nakamu. Kumbiti vinu haguwakanki mala ntatu hera."

20 Elisha kahowiti na kufintirwa.

Kila shinja, vipinga vya Wamoabu wiza kuyikomanga isi ya wantu wa Israeli. 21 Shaka shimu, shaka sha kufintira, wantu wawoniti shipinga shimu sha wakondu shakwiza wasa mauti galii mlisembi lya Elisha na kutuga. Katepuhera mauti galii pagashinkuliti mihonju ya Elisha, kazyukiti na kugoloka.

22 Mfalumi Hazaeli gwa Aramu kawayoniriti nentu wantu wa Israeli shaka shoseri sha ukolamlima wa Yehoahazi. 23 Kumbiti Mtuwa Mlungu kaweriti mheri na kawawonera lusungu. Kawalekandiri walaguwi ila kwatanga toziya ya lipatanu lyakuyi na Abrahamu na Isaka na Yakobu, kayaluwandiri wantu wakuyi mpaka leru.

24 Hazaeli mfalumi gwa Shamu pakahowiti, Beni Hadadi mwana gwakuyi kakolitimlima pahala pakuyi. 25 Mfalumi Yehoashi kamkangiti Beni Hadadi mala ntatu na kuyikombola miji yoseri yailopolitwi shaka sha ukolamlima wa Yehoahazi, tati gwakuyi Yehoashi.