1 Shaka shiraashi mbuyi gwa Mlungu Elisha kamshemiti yumu gwa wafunda wa wambuyi, kamgambira, "Gulitandi kugenda Ramoti Gileyadi. Gutoli supa ayi ya lipaki, 2 pagusoka aku, gumsakuli Yehu mwana gwa Yehoshofati na mzukulu gwa Nimshi. Gumtoli mushumba kati su nakawera na wayaguyi, 3 shakapanu gutoli supa ayi ya lipaki, gumwitiliri kumtuyi na kumgambira, Mtuwa Mlungu kalonga hangu. Nikusyaga lipaki kuwera mfalumi gwa Israeli. Shakapanu guvuguli ligomi na kuwuka kalongola."

4 Su, Mbuyi gwa Mlungu ayu mntemba kagenda Ramoti Gileyadi, 5 pakasokiti kawawonita wakulu wa lishonta mkuliwona. Kalonga, "Mkulu gwa lishonta nana ulagilagi waku."

Yehu kamkosiya, Ndo gaa pakati petu yagumgambira? Kankula,

"Gwenga, mkulu gwa lishonta." 6 Woseri wawili ndo wingira mushumba kati na aku mbuyi gwa Mlungu kamumiminira Yehu lipaki kumtuwi na kumgambira, "Mtuwa Mlungu, Mlungu gwa Israeli, kalonga, nikumiminira lipaki guweri mfalumi pampindi pa wantu waneni wa Israeli. 7 Na gwenga haguwalagi kaya ya mtuwa gwaku Ahabu su nimwuziliri Yezebeli kwa kuwalaga wantumintumi waneni wambuyi na wantumintumi waneni wamonga. 8 Hagutendi hangu toziya kaya yoseri ya Ahabu ilaguwa, viraa haniwalagi kila mpalu gwa walongu wa Ahabu kaweri mmanda ama muntu lekeru. 9 Haniwatendeli kaya yakuyi handa kaya ya Yeruboamu mwana gwa Nebeti na kaya ya Baasha mwana gwa Ahiya. 10 Kwahela muntu yakamfindila Yezebeli, mawuti gakuyi hagaliyiwi na wang'ang'a muisi ya Yezireeli." Pa kamaliliti kulonga hangu, mbuyi gwa Mlungu kawuka mushumbakati na kutuga.

11 Yehu pakawuyiti kwa wayaguwi, yumu gwawu kamkosiya, "Kwana shitwatira shoseri?" Muntu ayu kana lukwali ayu kafira shishi kwagwenga?

Yehu kawankula, "Shakalongiti shahela mana."

12 Na womberi wamgambira, "Ayi ndo nakaka ndiri! Gutugambiri shakalongiti!" Yehu Kawagambira,

"Kang'ambiriti handa Mtuwa Mlungu kalonga, nikulumika guweri mfalumi gwa Israeli."

13 Palaa panu wakulu wa mashonta wayaguyi wavula mahabiti gawu, wayalika pamuhera kulukweneru su kagoloki pampindi pakuyi, wagomba magoli na kubotanga, "Yehu ndo mfalumi"

14 Yehu mwana gwa Yehoshofati, mweni viraa kaweriti mzukulu gwa Nimishi, kamgalambuka Yoramu. Yoramu na wantu woseri wa Israeli waweriti Ramoti Gileyadi kumdiwira mfalumi Hazaeli kulawa Aramu nakaguhalibisiya mji agu. 15 Kumbiti mfalumi Yoramu kawuyiti aku Yezreeli su kaponi vironda vyakapatiti shaka sha kulikomanga nkondu na mfalumi Hazaeli gwa Aramu. Yehu kawagambiriti wakulu wayaguwi, "Payiwera hamjimilirani naneni, muntu yoseri nakalawa Ramoti kugenda Yezreeli kujega visoweru avi." 16 Ndo kakwena mbutuka yakuyi ya kukwega na farasi na kugenda aku Yezreeli. Yoramu kaweriti keniponi na Ahazia mfalumi gwa Yuda kaweriti aku kumtyangira.

17 Mlolera yakaweriti pampindi pa shindwalingu sha Yezreeli kalonga, "Mona wantu pawiza na mbutuka!"

Yoramu kankula, "Gumsyaguli mkwena farasi yumu, gumtumi su kuliwoni na womberi, kawakosiyi, kwana ponga?"

18 Su, mlagilagi ayu pakagenditi kaliwoniti na Yehu na kumgambira, "Mfalumi kakosia. Mwiza kwa ponga?"

Yehu kankula, "Ntambu gaa gukosiya aku kwana ponga? Gwenga gugalambuki gumfati neni."

Mlolera pampindi pashindwalingu kalonga, "Mlagilagi kasoka, kumbiti kawuyandiri." 19 Shakapanu mlagilagi gwa pili kalagalirwa, viraavilii kamkosiyiti Yehu likosiwu liraaali. Yehu kamgambira ntambu iraa, "Ntambu gaa gunkosiya kuusu ponga? Gwenga gugalambuki gumfati neni!"

20 Kwa mala imonga kayi mlolera yakawera pashindwalingu kalonga, mlagilagi kawasokera kumbiti kawuya ndiri. Shakapanu kongera, "Wendesha mbutuka za kukwegwa na farasi ndo handa wa Yehu mwana gwa Nimshi, toziya yomberi katugiziya nentu."

21 Su, Yoramu mfalumi wa Israeli kalagalira pakalonga, "Gutandi mbutuka za kukwega na farasi." Na womberi wamtandiriti mbutuka yakuyi. Shakapanu Yoramu mfalumi wa Israeli na Ahazia mfalumi gwa Yuda wawukiti kila yumu pakakwena mbutuka yakuyi, wagenda kuliwona na Yehu. Wamwona muluwaga lwa Naboti gwa Yezreeli. 22 Payiwera Yoramu, pakamwoniti Yehu, kamkosiya,

"Hashi, gwiza kwa ponga, Yehu?" Yehu kamwankula, "Ponga gaa, shaka wahumba na wahawi wa mawu gwaku Yezebeli ndo wavuwa?"

23 Yoramu kagalambula mbutuka yakuyi ya kukwega na farasi na kuwuka, agawu pakamgambira Ahazia, "Agu ndo mgomiziwu Ahazia!" 24 Yehu kawutola upindi wakuyi na kwasa msali gweni gupena pakati pamawega ga Yoramu na kusoma moyu gwakuyi, na yomberi kahowa palaa palii mumbutuka mwakuyi ya kukwega na farasi. 25 Yehu kamgambira ntumintumi gwakuyi Bidikari, "Gutoli mauti gakuyi gugasili kulirambu ali lya Naboti kulawa Yezireeli. Guliholi gwenga na neni patuweriti tukwena farasi gwetu kumbeli kwa Yoramu tati gwakuyi Ahabu, Mtuwa Mlungu ntambu yakalongiti visoweru avi kuusu yomberi. 26 Mtuwa Mlungu kalonga, toziya malaga ga Naboti na ga wana wakuyi gamoniti mashaka gagapititi nililapa handa hanikuwuzilili mulilambu ali. Hangu, gutoli mauti ga Yoramu gugasi mulilambu lya Naboti ntambu yakalongiti Mtuwa Mlungu."

27 Ahazia mfalumi gwa Yuda pakawoniti yagalawiliti katugiti kugenda kumji gwa Beti Hagani, agawu pakafatwa na Yehu. Yehu kawahimiziya wantu wakuyi, "Mmulagi viraa na yomberi!" Na womberi wamlasa msali pakawera mbutuka ya kukwega na farasi kunjira ya kukwena Guri pakwegera na mji gwa Ibleamu. Shakapanu kendeleya kugenda mpaka Megido na kuhowera aku. 28 Wantumintumi wakuyi wagutola mauti gakuyi mngati mwa mbutuka yakuyi ya kukwenga na farasi na kuyijega Yerusalemu na aku kafindirwa mulisembi lya shifalumi mulushi lwa Dawudi.

29 Mushinja sha kumi na moja sha ukolamlima wa Yoramu mwana gwa Ahabu kukolamlima Yuda, ndo Ahazia pakanjiti kakolamlima Israeli.

30 Yehu pakasokiti aku Yezireeli, Yezebeli kaweriti kapatiti kala visoweru vya vitwatira vyavilawiriti. Kalipakaziya langi mmasu na kuzitula weri viri zakuyi, ndo kagenda kulidilisha na kulola pasi. 31 Yehu pakingiriti kuligomi, Yezebeli kalongiti. "Gwiza kwa ponga, gwenga yaguwera handa Zimri! Yaguwalaga watuwa waku?"

32 Yehu kalola kumpindi na kulonga "Ndo gaa yakawera uwega waneni?" Wakulu wawili ama watatu walaviya mituwi yawu kumlola kupitira palidilisha, 33 na Yehu kawagambira, "Mmwasi mdala ayu pasi!" Wamwasa pasi na mwazi gwakuyi gwitika pampindi pa shibambaza na mufarasi. Shakapanu katimbangatimbanga. 34 Su Yehu kingira munumba ya shifalumi na aku kaliya na kulanda. Shakapanu kawalagalila. "Mmufintiri mdala ayu yakapangiriti, toziya kaweliti mhinga gwa mfalumi." 35 Pawalawiti mnumba kugenda kumfintira, kumbiti wawonandiri shoseri ila lubalanga lwa mtuwi, mawoku na lwayu. 36 Shakapanu wawuya na kumgambila Yehu visoweru avi, na yomberi kalonga, "Hangu ndo Mtuwa Mlungu ntambu yakatungiti kupitira kwa ntumintumi gwakuyi Eliya kulawa Tishibi pakalonga, wang'ang'a hawaliyi nshimba ya Yezebeli muisi ya Yezreeli. 37 Mauti gakuyi Yezebeli hagapalasiwi handa mapimba mulilambu muisi ya Yezireeli, hangu kwahera yakaweza kummana."