1 Shaka sha ukolamlima wa Yehoyakimu, Nebukadineza mfalumi gwa Babeli kayikomangiti Yuda na kamkankanikiti Yehoyakimu kamtendiri ntambu yakafiriti yomberi. Yehoyakimu kamtendiriti kwa vinja vitatu, shakapanu kaleka kumjimira na kamgalambuka. 2 Su, Mtuwa Mlungu kamjegera vipinga vya Wababuloni na Waaramu na Wamowabu na Waamoni wayikomangi isi ya Yuda kwa vumu na kuyiharibisiya, kulinganira na shisoweru sha Mtuwa Mlungu shakalongiti kwa wantumintumi wakuyi wambuyi. 3 Nakaka mirandu ayi iyipatiti isi ya Yuda kwa lagiru lya Mtuwa Mlungu, su kawahamiziyi kulawa palongolu pakuyi, toziya ya vidoda vya mfalumi Manasi na vyoseri vyakatenditi, 4 natoziya ya malaga ga wantu yawahera makosa yawagwititi. Mtuwa Mlungu kamlekeziyandiri makosa aga.

5 Su mirandu imonga ya Yehoyakimu na goseri gakatenditi galembwa mu Shitabu sha Maholu ga Wafalumi wa Yuda. 6 Yehoyakimu kahowa na mwana gwakuyi Yehoyakini kanjiti kukolamlima.

7 Mfalumi gwa Misri kalawakayindiri na mashonta wakuyi muisi mwakuyi, toziya mfalumi gwa Babeli kiyitoliti na kuyikolamlima isi yoseri yayiweriti pasi pa mfalumi gwa Misri pakwanja kwanjira lushemba lwa Misri mpaka lushemba lwa Eufrati.

8 Yehoyakini kaweriti na vinja lirongu nanani pakanjiti kukolamlima, kakolitimlima aku Yerusalemu kwa shaka sha miyezi mitatu. Mawu gwakuyi kaweriti Nehushita mhinga Elinatani, kulawa Yerusalemu. 9 Yehoyakini katenditi makontola kulongolu kwa Mtuwa Mlungu ntambu yakatenditi tati gwakuyi.

10 Shaka ashi lishonta lya Nebukadineza mfalumi gwa Babeli, ligukomanga mji gwa Yerusalemu na kuguzyengeta. 11 Shaka mashonta pagaweriti gaguzyengeta mji, Nebukadineza mweni kiziti Yerusalemu, 12 na Yehoyakini Mfalumi gwa Yuda, kanyasula mawoku na kulijega mweni kwa mfalumi gwa Babeli, mweni pamuhera na mawu gwakuyi, wantumintumi wakuyi, wakulu na mashonta wakulu. Mfalumi gwa Babeli kamtoliti lopola mushinja sha nani sha kukolamlima kwakuyi. 13 Viraa handa Mtuwa Mlungu ntambu yakalongiti, Nebukadineza katoliti lunda yoseri yayiweriti mngati mu Numba Nkulu ya Mlungu na mngati muliboma. Kameganga vyombu vya zahabu vyeni Selemani mfalumi gwa Israeli kanyawiti. Vyombu avi viweriti mu Numba Nkulu ya Mlungu. 14 Nebukadreza kawatoliti wantu woseri wa Yerusalemu, wakulu woseri na wantu woseri yawaweriti wagangamala na wanyawa woseri na waponda vyuma handa lopola na walanga yawu ndo elufi kumi. Kwahera yakasigaliti ila yawaweriti wahushu nakamu muisi.

15 Kamtoliti Yehoyakini mpaka Babeli pamuhera na mawu gwakuyi mfalumi, wadala wakuyi mfalumi, wantumintumi wakuyi na wakulu wa isi, woseri awa kawalaviyiti Yerusalemu na kawajegera Babeli. 16 Nebukadineza katoliti wantu wagangamala wa Yuda walanga yawu wantu elufu saba pamuhera na wanyawa wagangamala na waponda vyuma,walanga yawu elufu yimu. Woseri awa pawawera wantu wana makakala na yawaweza kulikomanga nkondu.

17 Nebukadineza kamlumika Matania, mlongu gwakuyi Yehoyakini, kaweri mfalumi pa yomberi, mfalumi kamgalambuliti litawu lyakuyi kamshema Sedekia.

18 Sedekia kaweriti na vinja ishilini na yimu pakanjiti kukolamlima, kakolitimlima vinja lirongu na gumu aku Yerusalemu. Mawu gwakuyi kashemitwi Hamutali mhinga gwa Yerimiya, mwenikaya gwa mji gwa Libina. 19 Mfalumi Sedekia katenditi makontola kulongolu kwa Mtuwa Mlungu ntambu yakatenditi mfalumi Yehoyakimu. 20 Mtuwa Mlungu kawakalaliriti nentu wantu wa Yerusalemu na Yuda, ata kawawinga kutali na yomberi.