1 Shakapanu Mfalumi kawalagaliliti wantu wawajojoniri wakulu woseri wa Yuda na wa Yerusalemu, 2 na mfalumi kagenda mu Numba Nkulu ya Mtuwa Mlungu pamuhera na wantu woseri wa Yuda na wenikaya woseri wa Yerusalemu na watambika pamuhera na wambuyi, wantu woseri wadidini kwa wakulu. Su, kawabetulira shitabu sha lipatanu shashiwonikiti mu Numba Nkulu ya Mtuwa Mlungu. 3 Shakapanu mfalumi kagoloka pakwegera pa mpanda na kutenda lipatanu palongolu pa Mtuwa Mlungu, kumfata Mtuwa Mlungu, kukola lagiru zakuyi, matakula na malagaliru gakuyi kwa moyu gwakuyi goseri na kwa rohu yakuyi yoseri, kutenda visoweru vyoseri vya lipatanu vyavilembitwi mushitabu ashi sha lipatanu. Wantu woseri wawera pamuhera kutenda lipatanu.

4 Shakapanu Yosia kamgambiziya mtambika mkulu Hilikiya na watambika watanga wakuyi na walolera walaviyi mu Nyumba Nkulu ya Mtuwa Mlungu vintu vyavinyawitwi kwaajili ya Baali, Ashera na kwaajili ya sayali, kavipambira kwa motu kunja kwa Yerusalemu mululalanda lwa Kidironi na kujega malivu gakuyi aku Beteli. 5 Shakapanu kawawusiya watambika woseri yawasyagulitwi na mfalumi gwa Yuda su kutumiziya ubani pahala pa kuguwira mumiji ya Yuda na kuzyengeta Yerusalemu. Viraa na walii yawatumiziyiti ubani kwa Baali, mshenji na mwezi na ntondu na sayali Mulihekalu lya Mtuwa Mlungu. 6 Kawusiyiti shinyagu sha Ashera kulawa mu Hekalu, kunja ku Yerusalemu, kayijega mpaka lushemba lwa Kidironi. Aku kashipambira kwa motu na kushisaga mpaka shiwera malivu na malivu gakuyi kagapalasiya pampindi pa masembi ga wantu. 7 Viravirii kabomoliti numba za wapalu yawaweriti wankutenda uhumba mu Numba Nkulu ya Mlungu, pahala peni wadala wapotiti mapazia ga Ashera. 8 Kawajojonira watambika woseri kulawa miji ya Yuda na kuwajega Yerusalemu. Shakapanu katula humba vitalawanda pahala pawalavililiti malaviwu, kulawa Geba mpaka Beeri Sheba. Viravilii kapabomola vitalawanda vyaviweriti uwega wa kumshigi wa ligomi lya mji peni migomi yayiweriti kunjira ya kwingilira ligomi lya Yoshua mkolamlima gwa mji. 9 Watambika awa yawajimiritwindiri kutenda lihengu pashitalawanda sha Mtuwa Mlungu mu Yerusalemu, kumbiti waliyiti mabumunda yagalekerwandiri simika gawapananitwi na watambika wayawu.

10 Mfalumi Yosia viraa kapahalibisiyiti pahala pa kuguwira wamlungu wa mpayu pahala papashemitwi Tofeti mululalanda lwa wana wa Hinomu, su muntu yoseri nakamlunguziya mwana gwakuyi mpalu ama mhinga kuwera tambiku kwa mlungu Moleki. 11 Ntambuiraayi kawusiyiti farasi yawatulitwi na wafalumi wa Yuda yawatenderitwi shaka sha kumguwira mlungu mshenji na kalunguziyiti mbutuka zazitendiritwi mukuguwira, kunjira ya kwingira mu Numba ya Mtuwa Mlungu, pakwegera na pakakala Natani Meleki, yakaweriti mlongozi gwawu mkulu. 12 Vitalawanda vyeni wafalumi wa Yuda wanyawiti mshumba kushitwiku sha Ahazi, pamuhera na shitalawanda sheni Manasi kanyawiti mumageleri mawili ga Numba ya Mlungu. Kashibomoliti na kushiposholanga, shakapanu kasiti malivu gakuyi mulushemba lwa Kidironi. 13 Viraa mfalumi Yosia kahalibisiya vitalawanda vyavinyawitwi na mfalumi Selemani vyaviweriti uwega wa kwagulawa mshenji mwa Yerusalemu na kugenda uwega wa lugongu lwa uhalibisiya, pahala mfalumi gwa Israeli pakanyawiti kwaajili ya Ashitaroti yakaweriti nkalaliru ya Wasidoni na Kemoshi yakaweriti nkalaliru ya Moabu na viraa kwajili ya Milikomu yakaweriti nkalaliru ya Waamoni. 14 Kamegiti mpanda vipandivipandi, viraa kavidumulanga vinyagu vya Ashera na kapadodiziya pahala papaweriti vigoloka vinyagu, kapamemiziyiti mihonju ya wantu.

15 Nentu ya aga kapahalibisiyiti aku Beteli pahala pa kuguwira papanyawitwi na mfalumi Yeroboamu mwana gwa Nebeti, yakawatenditi wantu wa Israeli watendi vidoda. Kahalibisiyiti vitalawanda avi na kumeganga mabuwi gakuyi vipandivipandi na shakapanu kaviponda mpaka viwera madikudiku, viraa kalunguziya viraa vinyagu vya Ashera. 16 Shakapanu Yosia pakagalambukiti kawoniti masembi pampindi pa shigongu, su kalagaliriti masembi gafukulwi na mihonju ilaviwi na yilunguziwi pampindi pa shitalawanda. Kwakutenda hangu su kashitula humba shitalawanda teratera na shisoweru sha Mtuwa Mlungu, sheni muntu gwa Mlungu kashibweriti, mbuyi yakatungiti malawiru aga. 17 Shakapanu mfalumi kakosiya, "Lisembi lyalinyawiti lyaniliwona kulii ndo lya gaa?"

Wantu wa mji wamwankula, "Ndo lisembi lya muntu gwa Mlungu mweni kiziti kulawa Yuda na kutunga mirandu yeni yaguyitenda kwa shitalawanda sha Beteli."

18 Na yomberi kalagalira, "Mulileki panu, muntu yoseri nakawusiya mihonju yakuyi." Hangu wayilekiti mihonju yakuyi, pamuhera na mihonju ya mbuyi gwa Mlungu yakalawiti Samaria.

19 Mukila isi ya Samaria mfalumi Yosia kahalibisiyiti pahala papanyawitwi kwa mabuwi toziya ya kuguwira wamlungu wa mpayu papanyawitwi na wafalumi wa Israeli, su wamtenda Mtuwa Mlungu kakalali. Vitalawanda vyoseri avi kavihalibisiyiti ntambu yakatenditi aku Beteli. 20 Kawalagiti watambika woseri wa wamlungu wa mpayu pampindi pa vitalawanda vyawu na kulunguziya mihonju yawu pampindi pa vitalawanda avi. Shakapanu kawuya Yerusalemu.

21 "Shakapanu mfalumi kawalagaliriti wantu woseri, pakalonga, mtendi msambu gwa pasaka kwa kumpanana ligoya Mtuwa Mlungu, Mlungu gwenu, ntambu yayilembitwi mushitabu ashi shashiwonikaniti mu Numba Nkulu ya Mlungu." 22 Kwahera Pasaka yainemeliritwi handa ayi kwanjira shaka sha walonguziya yawalongoziyiti Israeli pota shaka sha ufalumi wa Israeli ama wa Yuda. 23 Hangu mushinja sha lirongu na nane sha ukolamlima wa Yosia, Pasaka inemelelitwi kwajili ya ligoya lya Mtuwa Mlungu mu Yerusalemu.

24 Nentu ya aga, mfalumi Yosia kawusiya wakomalera washamshera, yawaguwira wamlungu, vinyagu vya kuguwira na vintu vimonga vyoseri vya kukalaziya vyaviwonekaniti mu Yuda na Yerusalemu. Aga katenditi su kutenda ntambu yayifiruwa kulinganira na lagiru lyalembitwi mushitabu shilii sheni Hilikia mtambika kashiwoniti mngati mu Numba Nkulu ya Mtuwa Mlungu. 25 Pamberi pa mfalumi Yosia na pa yomberi kwahera mfalumi yoseri yakaweriti gambira yomberi, mweni kamtenderiti Mtuwa Mlungu kwa moyu gwakuyi goseri, kwa likakala lyakuyi lyoseri na kwa rohu yakuyi yoseri kulinganira na lagiru ya Musa.

26 Kumbiti Mtuwa Mlungu kaweriti kangali kuwakalalira wantu wa Yuda toziya Manasi katenditi vintu vitangala vyavimtenditi kakalali. 27 Na yomberi Mtuwa Mlungu kalongiti, "Haniwawingi wantu wa Yuda kulawa palongolu paneni ntambu yantenditi kwa wantu wa Israeli, hunigulemi mji gwa Yerusalemu gweni nigusyaguliti panongiti, litawu lyangu haliweri amu."

28 Mirandu yoseri yakatenditi Yosia ilembitwi Mushitabu sha Maholu ga Wafalumi wa Yuda. 29 Shaka sha ukolamlima wa Yosia, mfalumi Neku gwa Misri kagenditi mpaka lushemba lwa Eufurate su kaliwoni na mfalumi gwa Ashuru. Mfalumi Yosia kawukiti su kalikomangi na yomberi, kumbiti Farawu Neku pakamwoniti kamlagiti kulii Megidu. 30 Wantumintumi wakuyi wapapiti mauti gakuyi mumbutuka na kugawuziya Yerusalemu na kumfintira kulisembi lyakuyi mweni.

Shakapanu wantu wa Yuda wamtola Yehoahazi mwana gwa Yosia wamswaga lipaki na kumlumika kuwera mfalumi pahala pa tati gwakuyi.

31 Yehoahazi kaweriti na vinja ishilini na vitatu pakanjiti kukolamlima, kakolamlima kwa miyezi mitatu aku Yerusalemu. Mawu gwakuyi wamshemiti Hamutali mhinga gwa Yerimiya kulawa Libina. 32 Yehoahazi katenditi makontola kulongolu kwa Mtuwa Mlungu handa wambuyi wakuyi ntambu yawatenditi. 33 Su nakendereya kukolamlima aku Yerusalemu, Farawu Neku mfalumi gwa Misri kambatiti aku Ribla muisi ya Hamati, kayitoza isi kodi ya elufu tatu na miya msheshi za madini ga feza na kilu selasini na msheshi za zahabu. 34 Mfalumi Farawu Neko kamlumika Eliakimu mwana gwa mfalumi Yosia pahala pa tati gwakuyi Yosia, kaligalambula litawu lyakuyi kuwera Yehoyakimu. Kumbiti kamtoliti Yehoahazi kamjegera patali mpaka Misri na kuhowera aku.

35 Mfalumi Yehoyakimu kampananiti Farao madini ga feza na zahabu, katenditi hangu kwa kuwatoza kodi wantu wakuyi su kawezi kutenda mafiruwa ga Farao ga kupananwa madini ga feza. Kawatoziti wantu madini ga feza na zahabu na kila muntu yumu kalaviyiti shilii shakalongiti mfalumi nayomberi kampananiti Farawu Neko mfalumi gwa Misri.

36 Yehoyakimu kaweriti na vinja ishilini na mhanu pakanjiti kukolamlima na kakolitimlima aku Yerusalemu kwa vinja lirongu na shimu. Litawu lya mawu gwakuyi liweriti Zebida mhinga gwa Pedaya kulawa Ruma. 37 Yehoyakimu katenditi makontola palongolu pa Mtuwa Mlungu, ntambu yawatenditi wambuyi wakuyi woseri.